കസബയെ വിമര്‍ശിച്ചതിന്റെ പേരില്‍ പാര്‍വതിയെ അനുകൂലിച്ചും പ്രതികൂലിച്ചും നിരവധി പേർ രംഗത്ത് വന്നിരുന്നു. പാർവതിക്ക് നേരെയുണ്ടായ സൈബര്‍ ആക്രമണത്തെ തുടർന്ന് അറസ്റ്റ് വരെ ഉണ്ടായി. ഇപ്പോളിതാ പാർവതിയെ അനുകൂലിച്ചുകൊണ്ട് മുരളി ഗോപി രംഗത്ത് വന്നിരിക്കുകയാണ്.

മലയാള സിനിമയിലെ ഏറ്റവും പ്രതിഭാധനരായ അഭിനേതാക്കളില്‍ ഒരാളാണ് പാര്‍വ്വതിയെന്ന് നടന്‍ മുരളിഗോപി പറയുന്നു. പാര്‍വതി പറഞ്ഞത് തെറ്റോ ശരിയോ ആയിക്കൊള്ളട്ടെ, പറഞ്ഞതിന്റെ പേരില്‍ അവര്‍ പങ്കുകൊള്ളുന്ന സിനിമകള്‍ക്ക് നേരെ പടനീക്കം നടത്തുക എന്നത് തികച്ചും നിരാശാജനകമാണെന്ന് മുരളി ഗോപി ഫേസ്ബുക്കില്‍ കുറിച്ചു.

മുരളി ഗോപിയുടെ ഫേസ്ബുക് പോസ്റ്റ് ഇങ്ങനെ :

മലയാള സിനിമയിലെ ഏറ്റവും പ്രതിഭാധനരായ അഭിനേതാക്കളില്‍ ഒരാളാണ് പാര്‍വ്വതി. അവര്‍ ഒരു അഭിപ്രായം (അത് തെറ്റോ ശരിയോ ആയിക്കൊള്ളട്ടെ!) പറഞ്ഞതിന്റെ പേരില്‍ അവര്‍ പങ്കുകൊള്ളുന്ന സിനിമകള്‍ക്ക് നേരെ പടനീക്കം നടത്തുക എന്നത് തികച്ചും നിരാശാജനകമാണ്. ഒരുപാട് പേരുടെ പ്രയത്നമാണ് ഒരു സിനിമ. അഭിപ്രായങ്ങളെ അഭിപ്രായങ്ങള്‍ കൊണ്ടോ മൗനം കൊണ്ടോ നേരിടാം. അസഭ്യം കൊണ്ടും ആയുധം കൊണ്ടും നേരിട്ടാല്‍... ഓര്‍മ്മയാകുന്നത് ഔചിത്യവും മര്യാദയും ആയിരിക്കും.