കെ.എസ് ആര്‍ .ടി.സിക്ക് ധനവകുപ്പ് 240 കോടി രൂപ നല്‍കാന്‍ ധാരണയായി
പ്രതിസന്ധിയിലായ കെ.എസ്.ആര്‍ .ടി.സിയെ രക്ഷിക്കാന്‍ ധനവകുപ്പ് 240 കോടി രൂപ നല്‍കാന്‍ ധാരണയായി. മുഖ്യമന്ത്രി ഉമ്മന്‍ ചാണ്ടിയും മന്ത്രിമാരായ കെ.എം. മാണിയും തിരുവഞ്ചൂര്‍ രാധാകൃഷ്‌ണനും തമ്മില്‍ നടന്ന ചര്‍ച്ചയാലാണ്‌ ഈ തീരുമാനമുണ്ടായത്. ഇതിലേക്കായി പുതിയ വികസനത്തിനും നവീകരണത്തിനുമായുള്ള പദ്ധതിയുടെ റിപ്പോര്ട്ട് കെ.എസ്.ആര്‍ .ടി.സി ധനവകുപ്പിന്‌ സമര്‍പ്പിക്കണം.
മുന്നുമാസത്തെ പെന്‍ഷന്‍ മുടങ്ങിയെങ്കിലും വരുമാനം വര്‍ദ്ധിപ്പിക്കാനുള്ള നടപടികളെടുക്കാതെ കെ.എസ്.ആര്‍.ടി.സിക്ക് പണം നല്‍കില്ലെന്നായിരുന്നു ധനവകുപ്പിന്റെ നിലപാട്. ഇത് വിവാദമായതോടെയാണ് മുഖ്യമന്ത്രി ഇടപെട്ടത്.
പെന്‍ഷന്‍ഫണ്ടിലേക്ക് 240 കോടി രൂപ നല്‍കാമെന്ന് സര്‍ക്കാര്‍ നേരത്തേ സമ്മതിച്ചിരുന്നു. ഇതില്‍നിന്ന് പിന്നാക്കം പോകാനാവില്ലെന്ന കര്‍ശനനിലപാടിലായിരുന്നു മന്ത്രി തിരുവഞ്ചൂര്‍. ഇതെത്തുടര്‍ന്നാണ് കെ.എസ്.ആര്‍.ടി.സിക്ക് അനുകൂലമായ തീരുമാനമുണ്ടായത്.
പെന്‍ഷന്‍ ഫണ്ട് എന്നപേരില്‍ പൊതുമേഖലാ സ്ഥാപനമായ കെ.എസ്.ആര്‍.ടി.സിക്ക് മാത്രമായി പണം നല്‍കാനാവില്ലെന്ന തീരുമാനത്തില്‍ ധനവകുപ്പ് ഉറച്ചുനിന്നു. അതിനാലാണ് വികസന നവീകരണ പാക്കേജ് സമര്‍പ്പിക്കാന്‍ നിര്‍ദ്ദേശിച്ചത്.
https://www.facebook.com/Malayalivartha
