തിരുവാഭരണവിഭൂഷിതനായ അയ്യപ്പന്റെ ശ്രീകോവിലില്‍ ദീപാരാധനയുടെ മണിനാദത്തിനൊപ്പം ഭക്തലക്ഷങ്ങള്‍ വിഹായസിലേക്കു കൂപ്പുകൈകളുയര്‍ത്തി. പൊന്നമ്പലമേട്ടില്‍ തെളിഞ്ഞ മകരജ്യോതിക്ക് ആയിരക്കണക്കിനു കണ്ഠങ്ങളില്‍നിന്നുയര്‍ന്ന ശരണഘോഷങ്ങള്‍ അര്‍ച്ചനയായി... മലമടക്കുകളില്‍ വെടിക്കെട്ടിന്റെ പ്രഭാപൂരം. മകരവിളക്ക് ദിനമായ ഇന്നലെ കലിയുഗവരദനു ചാര്‍ത്താനുള്ള തിരുവാഭരണങ്ങള്‍ വഹിച്ചുകൊണ്ടുള്ള ഘോഷയാത്ര കാനനപാതകള്‍ താണ്ടി വലിയാനവട്ടവും ചെറിയാനവട്ടവും കടന്ന് 5.30ന് ശരംകുത്തിയിലെത്തി. ഇവിടെ ഘോ ഷയാത്രയെ ദേവസ്വം എക്‌സിക്യൂട്ടീവ് ഓഫീസര്‍ വി.എന്‍. ചന്ദ്രശേഖരന്റെ നേതൃത്വത്തില്‍ സ്വീകരിച്ച് സന്നിധാനത്തേക്കാനയിച്ചു. പതിനെട്ടാംപടി കയറി കൊടിമരച്ചുവട്ടില്‍ എത്തിയ ഘോഷയാത്ര ദേവസ്വം മന്ത്രി കടകംപള്ളി സുരേന്ദ്രന്‍, ബോര്‍ഡ് പ്രസിഡന്റ് പത്മകുമാര്‍, അംഗം ഡോ. ശങ്കര്‍ദാസ് തുടങ്ങിയവര്‍ ചേര്‍ന്നു സ്വീകരിച്ചു. തന്ത്രി കണ്ഠര് മഹേഷ് മോഹനരും മേല്‍ശാന്തി ഉണ്ണിക്കൃഷ്ണന്‍ നമ്പൂതിരിയും ചേര്‍ന്ന് തിരുവാഭരണപേടകം ഏറ്റുവാങ്ങി ശ്രീലകത്തെത്തിച്ച് ഭഗവാനു തിരുവാഭരണങ്ങള്‍ ചാര്‍ത്തി. മകരജ്യോതി ദര്‍ശനത്തിന് സിനിമാതാരം ജയറാം, ഗായിക കെ.എസ്. ചിത്ര, കൊടിക്കുന്നില്‍ സുരേഷ് എം.പി. തുടങ്ങിയവരും സന്നിധാനത്ത് എത്തിയിരുന്നു.ഇന്നലെ വൈകിട്ടു മുതല്‍ മാമലകള്‍ക്കുമേലെ ഭക്തര്‍ കണ്ണുനട്ടിരുന്നത് പൊന്നമ്പലമേട്ടിലേക്കായിരുന്നു. പുഷ്പാലംകൃതമായ പൊന്നമ്പലത്തില്‍ ദീപാരാധന നടക്കവേ ആകാശത്ത് മകരനക്ഷത്രം തെളിഞ്ഞു. പൊന്നമ്പല മേട്ടില്‍ 6.45 ന് ആദ്യം മകരജ്യോതി തെളിഞ്ഞു. ഒരു മിനിറ്റ് ഇടവിട്ട് രണ്ടു തവണ കൂടി ജ്യോതി തെളിഞ്ഞു.
18ന് കളഭം നടക്കുന്നതു വരെയേ നെയ്യഭിഷേകം ഉണ്ടായിരിക്കൂ. ഭക്തര്‍ക്കു ദര്‍ശനം 19നൂ കൂടി മാത്രം. 20നു പന്തളം രാജപ്രതിനിധിയുടെ ദര്‍ശനത്തിനു ശേഷം നടയടയ്ക്കുന്നതോടെ ഈ മകരവിളക്ക് തീര്‍ഥാടനകാലത്തിനു സമാപനമാകും.