കോടികള്‍ വായ്പയെടുത്ത് വിദേശത്ത് മുങ്ങിയ വ്യവസായികളായ വിജയ്മല്യയ്ക്കും നീരവ് മോദിക്കും സംരക്ഷണം നല്‍കുന്ന നമ്മുടെ പൊതുമേഖലാ ബാങ്കുകള്‍ സാധാരണ ജനങ്ങളോട് ഒരു വിട്ട് വീഴ്ചയ്ക്കും തയ്യാറല്ല. തിരുവനന്തപുരം കോര്‍പ്പറേഷന്‍ ബാങ്ക് യാതോരു മര്യാദയുമില്ലാതെ നഗരത്തിലെ ഒരു ഹോട്ടലുടമയോട് ചെയ്ത ക്രൂരത ഇതാണ്. പുളിമൂടുള്ള തക്കാരം റസ്റ്റോറന്റ് നാസര്‍ എന്നയാളുടെ ഉടമസ്ഥതയിലുള്ള ബില്‍ഡിംഗിലാണ് പ്രവര്‍ത്തിക്കുന്നത്. അഞ്ച് വര്‍ഷത്തേക്കാണ് ബില്‍ഡിലെ ഒരു ഭാഗം റസ്റ്ററന്റ് നടത്താന്‍ കണ്ണൂരുള്ള ചിലര്‍ വാടയ്ക്ക് എടുത്തത്.

കൃത്യമായി വാടകയും കൊടുത്തിരുന്നു. എന്നാല്‍ നാസ് ബില്‍ഡിംഗിന്റെ ഉടമ നാസര്‍ വായ്പ അടയ്ക്കാത്തതിന്റെ പേരില്‍ തിരുവനന്തപുരം കോര്‍പ്പറേഷന്‍ ബാങ്ക് അധികൃതര്‍ ഇന്നലെ ഹോട്ടല്‍ പൂട്ടി ജപ്തി ചെയ്തു. ഭക്ഷണസാധനങ്ങളും മറ്റും പുറത്തേക്ക് വലിച്ചെറിഞ്ഞു. സാധനങ്ങളും മറ്റും മാറ്റാനും തൊഴിലാളികളെ മറ്റ് റസ്റ്റോറന്റുകളിലേക്ക് വിന്യസിക്കാനും അഞ്ച് ദിവസത്തെ അവധി ചോദിച്ചെങ്കിലും ബാങ്ക് അധികൃതര്‍ വഴങ്ങിയില്ല. മാര്‍ച്ച് 23 വരെ വായ്പ തിരിച്ചടയ്ക്കാന്‍ സമയമുണ്ട എന്നിട്ടും ബാങ്കിലെ ചില ഉദ്യോഗസ്ഥരുടെ താല്‍പര്യപ്രകാരം പെട്ടെന്ന് ജപ്തി നടത്തുകയായിരുന്നു. ഇതിനെതിരെ റസ്റ്ററന്റ് ഉടമയും തൊഴിലാളികളും ഫെയിസ്ബുക്ക് ലൈവില്‍ പ്രതിഷേധവുമായി രംഗത്തെത്തി.

നാസറിന്റെ ഉടമസ്ഥതയിലുള്ള മറ്റൊരു ബില്‍ഡിംഗ് തൊട്ടടുത്തുണ്ട്. അത് ജപ്തി ചെയ്യാതെ തക്കാരം പ്രവര്‍ത്തിക്കുന്ന ബില്‍ഡിംഗ് ജപ്തി ചെയ്തതിന് പിന്നില്‍ പല കളികളുമുണ്ടെന്ന് റസ്റ്ററന്റ് ഉടമ ആരോപിച്ചു. തിരുവനന്തപുരം കോര്‍പ്പറേഷന്‍ ബാങ്കിലെ ചില ഉദ്യോഗസ്ഥരാണ് ഇതിന് പിന്നില്‍ പ്രവര്‍ത്തിച്ചത്. നഗരത്തില്‍ ഉത്തരകേരളത്തിലുള്ള പ്രത്യേക വിഭവങ്ങള്‍ ലഭിക്കുന്ന റസ്റ്റോറന്റാണ് തക്കാരം. വ്യാഴാഴ്ച ഭക്ഷണം പാകം ചെയ്ത് റസ്റ്ററന്റ് തുറക്കാന്‍ നേരമാണ് ബാങ്ക് അധികൃതര്‍ ജപ്തി നടപടിക്ക് എത്തിയത്. ഹോട്ടല്‍ ഉടമകളെയും തൊഴിലാളികളെയും സംരക്ഷിക്കാന്‍ രാജ്യത്ത് ആരുമില്ലെന്നും തൊഴിലാളികളും ഉടമയും ഫെയ്‌സ്ബുക്ക് ലൈവില്‍ ആരോപിക്കുന്നു.