കണ്ണൂരില്‍ യൂത്ത് കോണ്‍ഗ്രസ് പ്രവര്‍ത്തകന്‍ ശുഹൈബിന്റെ കൊലപാതകവുമായി ബന്ധപ്പെട്ട് സമരം ശക്തമാക്കാന്‍ കോണ്‍ഗ്രസ് തീരുമാനം. കൊലപാതകം സിബിഐ അന്വേഷണം പ്രഖ്യാപിക്കുവരെ പിന്നോട്ടില്ലെന്നാണ് യുഡിഎഫ് നേതൃത്വത്തിന്റെ തീരുമാനം. അതേസമയം യഥാര്‍ത്ഥ പ്രതികളെ പിടികൂടണമെന്നാവശ്യപ്പെട്ട് കെ സുധാകരന്‍ നടത്തിവരുന്ന നിരാഹാര സമരം അഞ്ചാം ദിവസത്തിലേക്ക് പിന്നിട്ടിരിക്കുകയാണ്.

കണ്ണൂരില്‍ ചേര്‍ന്ന സമാധാന യോഗത്തിന് ശേഷം മന്ത്രി എകെ ബാലനാണ് ശുഹൈബ് വധത്തില്‍ സര്‍ക്കാര്‍ സിബിഐ അന്വേഷണത്തിന് തയ്യാറാണെന്ന് പറഞ്ഞത്. എന്നാല്‍ ശുഹൈബിന്റെ പിതാവിന്റെ പരാതിയില്‍ പ്രതിപക്ഷ നേതാവ് രമേശ് ചെന്നിത്തല മുഖ്യമന്ത്രിക്ക് കത്ത് കൈ മാറിയിട്ടും സര്‍ക്കാരിന്റെ ഭാഗത്ത് നിന്ന് അനുകൂലമായ നിലപാട് ഉണ്ടാകാത്ത സാഹചര്യത്തിലാണ് കെ സുധാകരന്‍ നിരാഹാര സമരം തുടരുന്നത്.

കൂടാതെ സമരം ശക്തമാക്കുന്നതിന്റെ ഭാഗമായി വടക്കന്‍ മലബാറിലെ 93 മണ്ഡലങ്ങളില്‍ വിശദീകരണ യോഗവും ,അനുസ്മരണ പരിപാടിയും സംഘടിപ്പിക്കും. ഇതിന് പുറമെ കണ്ണൂരിലെ 11 മണ്ഡലങ്ങളില്‍ രാപ്പകല്‍ സമരം നടത്താനും ജില്ലാ കോണ്‍ഗ്രസ്സ് കമ്മറ്റി തീരുമാനിച്ചിട്ടുണ്ട് . അതെ സമയം സമരം കൂടുതല്‍ ശക്തമാക്കുന്നതിന്റെ ഭാഗമായി കണ്ണൂര്‍ ജില്ലാ കമ്മറ്റി ഇന്ന് ഉച്ചക്ക് ശേഷം അടിയന്തര യോഗം ചേരും.

ശുഹൈബ് വധക്കേസില്‍ സിബിഐ അന്വേഷണം ആവശ്യപ്പെട്ട് പ്രതിപക്ഷം മുഖ്യമന്ത്രിയെ കാണും. സിബിഐ അന്വേഷണം ആവശ്യപ്പെട്ട് ശുഹൈബിന്റെ പിതാവ് നല്‍കിയ കത്ത് മുഖ്യമന്ത്രിക്ക് കൈമാറുമെന്നും പ്രതിപക്ഷ നേതാവ് രമേശ് ചെന്നിത്തല അറിയിച്ചു. മൂന്ന് മണിക്ക് ചേരുന്ന യുഡിഎഫ് നേതൃയോഗത്തില്‍ സമരം മുന്നോട്ടുകൊണ്ടുപോകണമോ എന്ന കാര്യത്തില്‍ അന്തിമ തീരുമാനം കൈകൊള്ളുമെന്നും ചെന്നിത്തല കൂട്ടിചേര്‍ത്തു.

പൊലീസിനെ സര്‍ക്കാര്‍ നിര്‍വീര്യമാക്കുകയാണ് ചെയ്യുന്നത്. ശുഹൈബ് വധക്കേസില്‍ സ്വതന്ത്രാന്വേഷണം വേണമെന്നും അദ്ദേഹം ആവശ്യപ്പെട്ടു. കൊലപാതകവുമായി ബന്ധപ്പെട്ട് സിബിഐ അന്വേഷണം വേണമെന്ന ശുഹൈബിന്റെ പിതാവിന്റെ ആവശ്യത്തെ പിന്തുണയ്ക്കുന്നുവെന്നും ചെന്നിത്തല പറഞ്ഞു.

ശുഹൈബ് വധക്കേസില്‍ അന്വേഷണ സംഘത്തില്‍ വിശ്വാസമില്ലെന്ന് രമേശ് ചെന്നിത്തല. യഥാര്‍ത്ഥ പ്രതികളെ പൊലീസ് സംരക്ഷിക്കാന്‍ ശ്രമിക്കുന്നുവെന്നും ചെന്നിത്തല പറഞ്ഞു. കോഴിക്കോട്ട് വാര്‍ത്താസമ്മേളനത്തില്‍ സംസാരിക്കുകയായിരുന്നു പ്രതിപക്ഷ നേതാവ് രമേശ് ചെന്നിത്തല.

സിപിഐഎം ഭീകര സംഘടനയായി മാറിയിരിക്കുകയാണ്. ഉന്നത പാര്‍ട്ടി നേതൃത്വത്തിന്റെ അറിവോടെയാണ് കൊലപാതകം നടന്നതെന്നും ചെന്നിത്തല ആരോപിച്ചു. ഷുഹൈബ് വധത്തിന് പിന്നില്‍ പ്രവര്‍ത്തിച്ച യഥാര്‍ത്ഥ ഗൂഢാലോചനക്കാരെ കണ്ടെത്തണമെന്നും ചെന്നിത്തല ആവശ്യപ്പെട്ടു.

ശുഹൈബിന്റെ കൊലപാതകം കോണ്‍ഗ്രസ് വലിയ വിഷയമാക്കുന്നുവെന്ന് ആരോപിക്കുന്നത് അക്രമ സംഭവങ്ങളില്‍ മുഴുകുന്ന സിപിഐഎമ്മിന് ഇത് സാധാരണ സംഭവം മാത്രമായതുകൊണ്ടാണെന്നും ചെന്നിത്തല പറഞ്ഞു.

അന്വേഷണ സംഘത്തില്‍ ഇപ്പോള്‍ ജനങ്ങള്‍ക്ക് വിശ്വാസമില്ലാതായിരിക്കുകയാണ്. സംസ്ഥാനം ഭരിക്കുന്ന പാര്‍ട്ടിയുടെ സംസ്ഥാന സെക്രട്ടറി പറയുന്നതാണോ അതോ എഡിജിപി പറയുന്നതാണോ ജനങ്ങള്‍ വിശ്വസിക്കേണ്ടതെന്നും ചെന്നിത്തല ചോദിച്ചു. കേസ് അന്വേഷണം നടത്തിക്കൊണ്ടിരുന്ന എസ്പി ശിവ വിക്രം എന്തിനാണ് അവധിയില്‍ പോയതെന്ന് വ്യക്തമാക്കണമെന്നും ചെന്നിത്തല ആവശ്യപ്പെട്ടു.