സോളാര്‍ കമ്മിഷന്‍ റിപ്പോര്‍ട്ടിനെതിരെ മുന്‍ മുഖ്യമന്ത്രി ഉമ്മന്‍ചാണ്ടി നല്‍കിയ കേസില്‍ ഹൈക്കോടതിയില്‍ സര്‍ക്കാരിന് വേണ്ടി വാദിക്കാന്‍ ഡല്‍ഹിയില്‍ നിന്നെത്തിയ അഭിഭാഷകന്‍ രഞ്ജിത്കുമാറിന് ഫീസിനത്തില്‍ ചെലവ് ഒരു കോടി രൂപ. ഒരു തവണ ഹാജരാകാന്‍ 20 ലക്ഷം. വിമാനക്കൂലിയും താമസച്ചെലവും പുറമേ നല്‍കണം. മുന്‍ സോളിസിറ്റര്‍ ജനറലാണ് രഞ്ജിത്കുമാര്‍.

കേസ് ആദ്യം കോടതിയിലെത്തിയപ്പോള്‍ അഡിഷണല്‍ അഡ്വക്കറ്റ് ജനറലായിരുന്നു സര്‍ക്കാരിന് വേണ്ടി ഹാജരായത്. ഫെബ്രുവരി 27ന് അവധിക്ക് വച്ചപ്പോഴാണ് രഞ്ജിത്കുമാറിനെ കൊണ്ടുവരാന്‍ തീരുമാനിച്ചത്. അദ്ദേഹത്തിന് നല്‍കാന്‍ 20 ലക്ഷം രൂപയുടെ ഡിമാന്‍ഡ് ഡ്രാഫ്റ്റ് എടുത്തു വച്ചിരുന്നെങ്കിലും അന്ന് കേസെടുത്തില്ല. തുടര്‍ന്ന് മാര്‍ച്ച് ഒന്നു മുതല്‍ നാലു വരെ തുടര്‍ച്ചയായി അദ്ദേഹം ഹാജരായി.

മാര്‍ച്ച് ഒന്നിലെ പ്രതിഫലമായി ഡിഡി നല്‍കി. 60 ലക്ഷം അഡ്വക്കേറ്റ് ജനറലും കൈമാറി. അങ്ങനെ 80 ലക്ഷം ഇതുവരെ നല്‍കി. 17ന് ഹാജരാകുന്നതിനുള്ള 20 ലക്ഷം കൂടി അനുവദിക്കാനാവശ്യപ്പെട്ട് നിയമസെക്രട്ടറിക്ക് എ.ജി കത്ത് നല്‍കിയിട്ടുണ്ട്. ഇതിന്റെ ഫയല്‍ നിയമ മന്ത്രി അംഗീകരിച്ച് മുഖ്യമന്ത്രിയുടെ പരിഗണനയ്ക്ക് വിട്ടിരിക്കുകയാണ്.