പാലക്കാട് തൃത്താലയില് ക്ഷീരസഹകരണ സംഘത്തിന്റെ ധനസഹായം വിതരണം ചെയ്യാനെത്തിയ വി.ടി ബല്റാം എം.എല്.എയ്ക്ക് നേരെ സി.പി.എം പ്രവര്ത്തകര് കല്ലെറിഞ്ഞു
തൃത്താല കൂടല്ലൂരില് വി.ടി ബല്റാമിന് നേരേ സി പി എം ആക്രമം. കാറിന്റെ ചില്ലുകള് അടിച്ച് തകര്ത്തു. ബല്റാമിന് പരിക്ക് പറ്റി. എ.കെ.ജിയെ വിമര്ശിച്ച് ഫെയിസ്ബുക്ക് പോസ്റ്റ് ഇട്ടത് മുതല് പാലക്കാട്ട് ബല്റാമിനെതിരെ സി.പി.എം പ്രക്ഷോഭം നടത്തിവരുകയായിരുന്നു. തൃത്താല എം.എല്.എയെ വീടിന് പുറത്തിറങ്ങാന് അനുവദിക്കില്ലെന്ന് ഭീഷണിയും മുഴക്കിയിരുന്നു. പൊതുപരിപാടികള്ക്കിടെ എം.എല്.എയ്ക്ക് നേരെ കല്ലെറിയാന് ശ്രമവും നടന്നിരുന്നു. ജില്ലയിലെ സി.പി.എം ജനപ്രതിനിധികളെല്ലാം എം.എല്.എ പങ്കെടുക്കുന്ന പരിപാടികളില് പങ്കെടുക്കുന്നുമില്ല. കരുണ, കണ്ണൂര് മെഡിക്കല് കോളജുകളിലെ പ്രവേശനം സാധൂകരിക്കുന്നതിന് സര്ക്കാര് കൊണ്ടുവന്ന ബില്ലിനെ പ്രതിപക്ഷം പിന്തുണച്ചിട്ടും ബല്റാം പരസ്യമായി എതിര്പ്പ് പ്രകടിപ്പിച്ചിരുന്നു. സുപ്രീംകോടതി അത് ശരിവയ്ക്കും വിധം ഓര്ഡിനന്സ് റദ്ദാക്കുകയും ചെയ്തു.
ബില്ലില് ഒപ്പിടാതെ ഗവര്ണര് തടഞ്ഞ് വയ്ക്കുകയും ചെയ്തതോടെ സര്ക്കാര് വെട്ടിലായിരുന്നു. ഇതിനിടെയാണ് ബല്റാമിനെതിരെ സി.പി.എം ആക്രമണം നടത്തിയത്. തൃത്താല കൂടല്ലൂരിനു സമീപത്ത് വച്ച് എംഎഎയെ സിപിഎം പ്രവര്ത്തകര് കരിങ്കൊടി കാണിച്ചു. കരിങ്കൊടിയുമായി എത്തിയ പ്രവര്ത്തകര് എംഎല്എയുടെ കാറിനു കല്ല് എറിയുകയായിരുന്നു. ആക്രമണത്തില് ബല്റാമിന്റെ കാറിന്റെ സൈഡ് ഗ്ലാസ് തകര്ന്നു.
ആനക്കര പഞ്ചായത്തിലെ കൂട്ടക്കടവില് ക്ഷീരസഹകരണ സംഘത്തിന്റെ സഹായധന വിതരണം ഉദ്ഘാടനം ചെയുന്നതിനെത്തിയതായിരുന്നു ബല്റാം. എകെജിക്ക് എതിരായ വിവാദ പരാമര്ശത്തിനു സിപിഎം പ്രവര്ത്തകര് പതിവായി കരിങ്കൊടി കാണിച്ച് പ്രതിഷേധിക്കുന്നുണ്ട്.
സംഭവം നടക്കുമ്പോള് പൊലീസ് സ്ഥലത്ത് ഉണ്ടായിരുന്നു, എന്നിട്ടും അക്രമം തടയുന്നതിനുള്ള നടപടി സ്വീകരിച്ചില്ലെന്ന് ബല്റാം ആരോപിച്ചു. സിപിഎം പ്രവര്ത്തകര്ക്ക് പ്രതിഷേധത്തിന്റെ മറവില് അഴിഞ്ഞാടാനുള്ള സഹായം പൊലീസ് ചെയതുവെന്നും' അദ്ദേഹം വിമര്ശിച്ചു. സംഭവത്തില് പ്രതിഷേധിച്ച് കോണ്ഗ്രസ് പ്രവര്ത്തകര് റോഡ് ഉപരോധിച്ചു.
https://www.facebook.com/Malayalivartha
