കേരളത്തില് റോറോ സംവിധാനം ഒരുങ്ങുന്നു... കേരളത്തിലെ ആദ്യത്തെ റോറോ സര്വീസ് റെയില്വേ പാലക്കാട് ഡിവിഷനു ലഭിക്കുമെന്ന് സൂചന
ലാഭകരമായി ഒരേ സമയം നിരവധി ലോറികളെ ലക്ഷ്യസ്ഥാനത്തെത്തിക്കുന്ന സംവിധാനം കേരളത്തിലും. റോറോ (റോള് ഓണ് റോള് ഓഫ്) സംവിധാനമാണ് കേരളത്തില് ഒരുങ്ങുന്നത്. ചരക്കുലോറികളെ ട്രെയിനില് കയറ്റി ലക്ഷ്യസ്ഥാനത്തെത്തിക്കുന്ന സംവിധാനമാണിത്. കേരളത്തിലെ ആദ്യത്തെ റോറോ സര്വീസ് റെയില്വേ പാലക്കാട് ഡിവിഷനു ലഭിക്കുമെന്നാണു സൂചന.
ചരക്കുവാഹനങ്ങളുടെ നീക്കം സുഗമമാക്കാന് കൊങ്കണ് റെയില്വേ വിജയകരമായി നടപ്പാക്കി വരുന്ന പദ്ധതിയാണു റോറോ. വിമാനത്താവളവും തുറമുഖവും പ്രവര്ത്തനസജ്ജമാകാനിരിക്കുന്ന കണ്ണൂരില് റോറോ ട്രെയിന് സര്വീസ് ആരംഭിക്കണമെന്ന ആവശ്യം വ്യാപാരവാണിജ്യ സമൂഹം ഉന്നയിച്ചിട്ടുണ്ട്. നോര്ത്ത് മലബാര് ചേംബര് ഓഫ് കോമേഴ്സ് ഭാരവാഹികള് ഇതു സംബന്ധിച്ചു നേരത്തേ റെയില്വേയ്ക്കു നിവേദനം നല്കിയിരുന്നു. റെയില്വേ ഉദ്യോഗസ്ഥര് കഴിഞ്ഞ ദിവസം കണ്ണൂരിലെത്തി വാണിജ്യവ്യവസായ മേഖലകളിലെ സംഘടനാ പ്രതിനിധികളുമായി ചര്ച്ച നടത്തി.
വിദൂരസ്ഥലങ്ങളിലേക്കു ചരക്കുമായി പോകുന്ന ലോറികളെ വഴിയിലെ നഗരപ്രദേശങ്ങളിലെ ഗതാഗതക്കുരുക്കില് നിന്ന് ഒഴിവാക്കാന് നിശ്ചിത ദൂരം ട്രെയിനില് കയറ്റുകയാണു റോറോയില് ചെയ്യുന്നത്. ഒരു ട്രെയിനില് മുപ്പതോ നാല്പ്പതോ വലിയ ലോറികള് കയറ്റാം. ചരക്കുവാഹനങ്ങള്ക്കു കുറഞ്ഞ സമയം കൊണ്ടു ലക്ഷ്യത്തിലെത്താം എന്നു മാത്രമല്ല, അത്രയും ദൂരത്തെ ഡീസല് വിനിയോഗം, അന്തരീക്ഷ മലിനീകരണം, മനുഷ്യാധ്വാനം തുടങ്ങിയവയും ഒഴിവാക്കാം.
പല നഗരപ്രദേശങ്ങളിലും തിരക്കേറിയ പകല് സമയത്തു ചരക്കുലോറികള് ഹൈവേകളില് ഓടാന് അനുമതിയില്ല. രാത്രി മാത്രമേ ഓടാവൂ. റോറോ ട്രെയിന് സര്വീസ് തുടങ്ങിയാല് പകലിലും ഓടാമെന്നതിനാല് ആ വകയിലും സമയലാഭം ഉറപ്പ്. റോറോ സൗകര്യം നിലവില് വന്നാല് സംസ്ഥാനത്തെ റോഡപകടങ്ങളില് വലിയൊരു പങ്ക് ഒഴിഞ്ഞു പോകുകയും ചെയ്യും.
കൊങ്കണ് റെയില്വേയില് 1999ലാണു റോറോ സര്വീസ് തുടങ്ങിയത്. സൂറത്ത്കല്, മഡ്ഗാവ്, മഹാരാഷ്ട്രയിലെ കാറാഡ് എന്നിവിടങ്ങളി!ല് റോറോ സര്വീസിനു വേണ്ടി ചരക്കുവാഹനങ്ങള് ട്രെയിനില് കയറ്റാനും ഇറക്കാനും സൗകര്യമുണ്ട്. കേരളത്തില് നിന്നു വടക്കേ ഇന്ത്യയിലേക്കു ചരക്കുമായി പോകുന്ന പല വാഹനങ്ങളും സൂറത്ത്കലില് നിന്നു റോറോ ട്രെയിനില് കയറ്റി കാറാഡ് ഇറക്കുകയാണു പതിവ്. തെല്ലും ഗതാഗതക്കുരുക്കില്ലാതെ അറുനൂറോളം കിലോമീറ്ററാണ് ഇങ്ങനെ താണ്ടാന് കഴിയുന്നത്.
റെയില്വേ ഡല്ഹി മേഖലയിലും കഴിഞ്ഞ വര്ഷം റോറോ ട്രെയിന് സര്വീസ് പരീക്ഷണാടിസ്ഥാനത്തില് നടപ്പാക്കിയിരുന്നു. ഹരിയാനയിലെ ഗുരുഗ്രാമില് നിന്നു യുപിയിലെ മുറാദ്നഗറിലേക്കാണു റോറോ ട്രെയിന് ഏര്പ്പെടുത്തിയത്. ഡല്ഹിയില് റോറോ സര്വീസ് വ്യാപകമാക്കണമെന്ന ആവശ്യത്തിനു പതിറ്റാണ്ടുകള് പഴക്കമുണ്ട്. ഡല്ഹിയിലൂടെ പ്രതിദിനം ഓടുന്ന അറുപതിനായിരത്തിലേറെ ചരക്കുവാഹനങ്ങളില് മൂന്നിലൊന്നും ഡല്ഹിയിലേക്കുള്ളവയല്ല. അവയ്ക്കു തലസ്ഥാന നഗര മേഖലയില് നിര്ത്തേണ്ട ഒരു കാര്യവുമില്ലെങ്കിലും അതുവഴി കടന്നു പോകാതെ വേറെ വഴിയില്ല. അത്രയും ചരക്കുവാഹനങ്ങളുടെ നീക്കം ട്രെയിനിലാക്കിയാല് തലസ്ഥാനത്തെ ഗതാഗതക്കുരുക്കിനു വലിയ പരിഹാരമാകുമെന്നും റോറോ വാദികള് ചൂണ്ടിക്കാട്ടുന്നു.
https://www.facebook.com/Malayalivartha
