വരാപ്പുഴയില്‍ പൊലീസ്​ കസ്​റ്റഡിയില്‍ മരിച്ച ശ്രീജിത്തി​​ന്റെ വീട്​ സി.പി.എം സംസ്ഥാന സെക്രട്ടറി കോടിയേരി ബാലകൃഷ്​ണന്‍ സന്ദര്‍ശിച്ചു. വരാപ്പുഴയില്‍ സി.പി.എം സംഘടിപ്പിക്കുന്ന രാഷ്​ട്രീയ വിശദീകരണ യോഗത്തിന്​ മുൻപായിരുന്നു സന്ദര്‍ശനം.

അതേസമയം മുൻപ് മുഖ്യമന്ത്രി പിണറായി വിജയന്‍ ശ്രീജിത്തി​ന്റെ വീട്​ സന്ദര്‍ശിക്കാത്തത്​ വിവാദമായിരുന്നു. ഇതിന്​ പിന്നാലെയാണ്​ കോടിയേരിയുടെ സന്ദര്‍ശനം.

കഴിഞ്ഞ ദിവസം മുഖ്യമന്ത്രി പിണറായി വിജയന്​ എറണാകുളത്ത്​ ഒൗദ്യോഗിക പരിപാടികളുണ്ടായിരുന്നു. പരിപാടികള്‍ക്കായി പിണറായി എത്തിയെങ്കിലും ശ്രീജിത്തി​​​​ന്റെ വീട്​ സന്ദര്‍ശിച്ചിരുന്നില്ല. ശ്രീജിത്തി​​​ന്റെ വീട്​ ഉള്‍പ്പെടുന്ന പ്രദേശം ഒഴിവാക്കിയായിരുന്നു മുഖ്യമന്ത്രിയുടെ യാത്ര. ഇത്​ വന്‍ വിമര്‍ശനത്തിന്​ കാരണമായിരുന്നു.

അതേസമയം ശ്രീജിത്തിന്റെ വീട്ടില്‍ മുഖ്യമന്ത്രി പിണറായി വിജയന്‍ എത്താത്തത് ബോധപൂര്‍വമല്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്‌ണന്‍ പറഞ്ഞു. ശ്രീജിത്തിന്റെ മരണത്തിന് കാരണക്കാര്‍ ആരായാലും അതെത്ര ശക്തന്മാരായാലും അവര്‍ക്ക് മാതൃകാപരമായ ശിക്ഷവാങ്ങി നല്‍കാന്‍ പരിശ്രമിക്കുമെന്നും സി.പി.എം എപ്പോഴും ഇരകളുടെ കൂടെയാണെന്നും ഒരിക്കലും വേട്ടക്കാര്‍ക്കൊപ്പം നില്‍ക്കില്ലെന്നും ശ്രീജിത്തിന്റെ കുടുംബത്തിന് സര്‍ക്കാര്‍ ആശ്വാസധനം പ്രഖ്യാപിക്കണമെന്നും ഭാര്യയ്‌ക്ക് ജോലി നല്‍കണമെന്നും അദ്ദേഹം പറഞ്ഞു.