അനധികൃത നിര്മ്മിച്ച കെട്ടിടം പൊളിച്ചു നീക്കാനെത്തിയ ഉദ്യോഗസ്ഥയെ ഹോട്ടലുടമ വെടിവെച്ചു കൊന്നു; ഉദ്യോഗസ്ഥര് ഗസ്റ്റ് ഹൗസിന്റെ ഗേറ്റിലെത്തിയപ്പോള് വിജയ്കുമാര് ആകാശത്തേയ്ക്ക് വെടിയുതിര്ത്തു; തുടര്ന്ന് പിന്മാറാതിരുന്ന ഉദ്യോഗസ്ഥയേയും സംഘത്തേയും വെടിവച്ചു
അനധികൃതമായി ഹോട്ടല് നിര്മ്മിച്ചത് പൊളിച്ചടുക്കാന് ശ്രമിച്ച ഉദ്യോഗസ്ഥയ്ക്ക് ദാരുണാന്ത്യം. ഹോട്ടല് കെട്ടിടം പൊളിച്ചു നീക്കാനെത്തിയ ഉദ്യോഗസ്ഥയെ ഉടമ വെടിവെച്ചു കൊന്നു. ഹിമാചല് പ്രദേശിലെ സോളന് ജില്ലയിലാണ് സംഭവം. അസിസ്റ്റന്റ് ടൗണ് ആന്ഡ് കണ്ട്രി പ്ലാനിങ് ഓഫീസര് ഷൈല് ബാലയാണ് കൊല്ലപ്പെട്ടത്. നാരായണി ഗസ്റ്റ് ഹൗസ് എന്ന സ്ഥാപനത്തിന്റെ ഉടമ വിജയ്കുമാറാണ് ഷൈല് ബാലയെ വെടിവെച്ചു കൊന്നത്. ആക്രമണത്തില് മറ്റൊരു ഉദ്യോഗസ്ഥന് പരിക്കേല്ക്കുകയും ചെയ്തു.
സോളന് ജില്ലയിലെ 13 ഹോട്ടലുകള് അനധികൃതമായി നിര്മ്മിച്ചവയാണെന്നും അത് പൊളിച്ചു നീക്കണമെന്നും സുപ്രീം കോടതി സംസ്ഥാന സര്ക്കാരിനോട് നിര്ദേശിച്ചിരുന്നു. ഇതിന്റെ ഭാഗമായി സംസ്ഥാന സര്ക്കാര് നാല് സംഘങ്ങള് രൂപവത്കരിച്ചിരുന്നു. ഇതില് ഒരു സംഘത്തിന്റെ മേധാവിയായിരുന്നു ഷൈല്.
ഉദ്യോഗസ്ഥര് നാരായണി ഗസ്റ്റ് ഹൗസിന്റെ ഗേറ്റിലെത്തിയപ്പോള് വിജയ്കുമാര് ആകാശത്തേയ്ക്ക് വെടിയുതിര്ത്തു. പിന്നീടിയാള് ഉദ്യോഗസ്ഥരുമായി വാക്കുതര്ക്കത്തിലേര്പ്പെടുകയും വെടിയുതിര്ക്കുകയുമായിരുന്നു. വെടിയേറ്റ ഷൈല്ബാല സംഭവസ്ഥലത്തു തന്നെ മരിച്ചു. ഇതോടെ വിജയ്കുമാര് ഓടിരക്ഷപ്പെട്ടു. ഇയാള്ക്കു വേണ്ടിയുള്ള തിരച്ചില് പുരോഗമിക്കുകയാണ്. ഇയാളെക്കുറിച്ച് വിവരം നല്കുന്നവര്ക്ക് ഒരു ലക്ഷം രൂപ നല്കുമെന്നും പോലീസ് പറഞ്ഞു.
https://www.facebook.com/Malayalivartha
