പ്രശസ്ത ഡിറ്റക്ടീവ് നോവലിസ്റ്റ് കോട്ടയം പുഷ്പനാഥ് അന്തരിച്ചു. 80 വയസായിരുന്നു. വാർദ്ധക്യകാല അസുഖങ്ങളെ തുടർന്ന് കോട്ടയത്തെ വസതിയിൽ ആയിരുന്നു അദ്ദേഹത്തിന്റെ അന്ത്യം.

മലയാളത്തിലെ പ്രമുഖ ജനപ്രിയ സാഹിത്യകാരനായ പുഷ്പനാഥൻ പിള്ള കോട്ടയം പുഷ്പനാഥ് എന്ന തൂലികാനാമത്തിലുടെയാണ് അറിയപ്പെടുന്നത്. ഡിറ്റക്ടീവ് നോവലുകളിലൂടെയാണ് കോട്ടയം പുഷ്പനാഥ് പ്രശസ്തനായത്. ഇവയിൽ ഏറെയും പുസ്തകരൂപത്തിൽ പുറത്തു വന്നവയാണെങ്കിലും ചിലതെല്ലാം വാരികകളിൽ പരമ്പരയായി പ്രസിദ്ധീകരിക്കപ്പെട്ടവയാണ്. ഒരു സ്വകാര്യ കുറ്റാന്വേഷകനായ ഡിറ്റക്ടീവ് മാർക്സിനെ കേന്ദ്ര കഥാപാത്രമാക്കിയാണ് ഇദ്ദേഹത്തിന്റെ മിക്ക കൃതികളും രചിച്ചിട്ടുള്ളത്.

നൂറിലേറെ മാന്ത്രിക,​ ഡിറ്റക്ടീവ് നോവലുകൾ ഇദ്ദേഹത്തിന്റെ തൂലികയിൽ നിന്നും പിറവിയെടുത്തിട്ടുണ്ട്. കർദ്ദിനാളിന്റെ മരണം. നെപ്പോളിയന്റെ പ്രതിമ,​ യക്ഷിക്കാവ്,​ രാജ്കോട്ടിലെ നിധി,​ ലണ്ടൻ കൊട്ടാരത്തിലെ രഹസ്യങ്ങൾ,​ ദി ബ്ലെയ്ഡ്,​ ബ്രഹ്മരക്ഷസ്സ്,​ ടൊർണാഡോ,​ ഗന്ധർവ്വയാമം,
ദേവയക്ഷി തുടങ്ങിയവ അദ്ദേഹത്തിന്റെ പ്രശസ്ത കൃതികളാണ്.

സംസ്കാരം പിന്നീട് നടക്കും.