മലപ്പുറം പ്രസ് ക്ലബില്‍ ആക്രമണം നടത്തിയ രണ്ട് ആര്‍.എസ്.എസ് പ്രവര്‍ത്തകരെ പൊലീസ് അറസ്റ്റ് ചെയ്തു. വാഴക്കാട് കല്ലിക്കുത്തൊടി ഷിബു, നടത്തലക്കണ്ടി ദിലീപ് കുമാര്‍ എന്നിവരാണ് അറസ്റ്റിലായത്. ആര്‍.എസ്​. എസ്​ മലപ്പുറം സംഘ്​ ജില്ല കാര്യാലയത്തിന്​ നേരെ അജ്ഞാതര്‍ ഗുണ്ട്​ എറിഞ്ഞുവെന്നാരോപിച്ച്‌​ കഴിഞ്ഞ ദിവസം നടത്തിയ പ്രകടനത്തിനിടെയാണ് മലപ്പുറം പ്രസ്​ ക്ലബിന്​ നേരെ ആക്രമണമുണ്ടായത്.

ബുധനാഴ്​ച രാത്രി 11.30ഒാടെ​യാണ്​ മലപ്പുറം മുണ്ടുപറമ്പിലെ ആര്‍.എസ്​.എസ്​ കാര്യാലയത്തിന്​ നേരെ ആക്രമണമുണ്ടായത്​. ഇതില്‍ പ്രതിഷേധിച്ച്‌​ നടന്ന പ്രകടനത്തിലാണ്​ അക്രമ സംഭവങ്ങളുണ്ടായത്​. മുണ്ടുപറമ്ബില്‍ നിന്ന്​ കുന്നുമ്മല്‍ ഭാഗത്തേക്ക്​ വന്ന പ്രകടനത്തിനിടെ ഗതാഗതക്കുരുക്കുണ്ടായപ്പോള്‍ അതുവഴി വന്ന ബൈക്ക്​ യാത്രക്കാരനായ തറയില്‍ അബ്​ദുല്ല ഫവാസ്​ സമീപത്തു കൂടെ പോകാന്‍ ശ്രമിച്ചു. ഇതില്‍ പ്രകോപിതരായവര്‍ ഫവാസിനെ കൈകാര്യം ചെയ്യുകയായിരുന്നു. കഴുത്തില്‍ പിടിച്ച്‌​ തള്ളുകയും മര്‍ദിക്കുകയും ചെയ്​തു.

അക്രമം നടക്കുമ്പോള്‍ പ്രസ്​ ക്ലബിലുണ്ടായിരുന്ന ചന്ദ്രിക ഫോട്ടോഗ്രാഫര്‍ ഫുആദ്​ മൊബൈല്‍ ഫോണ്‍ ഉപയോഗിച്ച്‌​ ഫോ​ട്ടോ എടുക്കാന്‍ ശ്രമിച്ചതോടെ പ്രകടനക്കാരില്‍ ഏതാനും പേര്‍ അകത്തേക്ക്​ പാഞ്ഞു കയറുകയായിരുന്നു. ഫുആദിനെ ചവിട്ടിയ അക്രമികള്‍ ​മൊബൈല്‍ പിടിച്ചുവാങ്ങി കൊണ്ടുപോയി. മൊറയൂര്‍ സ്വദേശിയായ ഫുആദിനെ മലപ്പുറം സഹകരണ ആശുപത്രിയില്‍ പ്രവേശിപ്പിച്ചു.