ഐപിസി, പോലീസ് ആക്ടില് ഭേദഗതി... സര്ക്കാര് ഉദ്യോഗസ്ഥരെ ആക്രമിച്ചാല് കര്ശന നടപടി
സര്ക്കാര് ഉദ്യോഗസ്ഥര്ക്കും അവരുടെ കുടുംബാംഗങ്ങള്ക്കും എതിരായ ആക്രമണങ്ങള്ക്കെതിരായ ശിക്ഷ കര്ശനമാക്കും. രാഷ്ട്രീയ പാര്ട്ടികള്, രജിസ്റ്റര് ചെയ്ത സാമൂഹ്യസംഘടനകള് എന്നിവയുടെ ഓഫീസുകള്ക്കും മറ്റ് വസ്തുവകകള്ക്കും നാശം വരുത്തുന്നതിനുമുള്ള ശിക്ഷയും കര്ശനമാക്കുന്നതിന് ഇന്ത്യന് ശിക്ഷാനിയമത്തിലും ക്രിമിനല് നടപടിച്ചട്ടത്തിലും ഭേദഗതി കൊണ്ടുവരാനുളള കരട് ബില് മന്ത്രിസഭ അംഗീകരിച്ചു.
സര്ക്കാര് ഉദ്യോഗസ്ഥര്ക്കും അവരുടെ കുടുംബാംഗങ്ങള്ക്കും എതിരെ വൈരാഗ്യപൂര്വം ആക്രമണം നടത്തിയെന്നു തെളിഞ്ഞാല് മൂന്നുവര്ഷം വരെ തടവ് ശിക്ഷ ലഭിക്കും. മാരകമായ പരിക്കുകള് ഏല്പ്പിച്ചെന്ന് തെളിഞ്ഞാല് പത്തുവര്ഷംവരെ തടവ് ശിക്ഷ ലഭിക്കും. രാഷ്ട്രീയ പാര്ട്ടികളുടെയും സന്നദ്ധസംഘടനകളുടെയും വസ്തുവകകള് നശിപ്പിച്ചാല് അഞ്ചുവര്ഷംവരെ തടവ് ശിക്ഷ ലഭിക്കും.
സര്ക്കാര് ഉദ്യോഗസ്ഥരുടെയോ അവരുടെ കുടുംബാംഗങ്ങളുടെയോ വസ്തുവകകള്ക്ക് നാശനഷ്ടമുണ്ടാക്കിയാലും അഞ്ചുവര്ഷംവരെ തടവ് ശിക്ഷ ലഭിക്കും. എല്ലാ കേസിലും പിഴ ഈടാക്കാനും കരട് ബില്ലില് വ്യവസ്ഥയുണ്ട്.
https://www.facebook.com/Malayalivartha
