ശീതകാല പച്ചക്കറി മേഖലയില്‍ വണ്ടുകളുടെ ആക്രമണം മൂലം കാബേജ്‌ നശിക്കുന്നു. കാന്തല്ലൂര്‍, പുത്തൂര്‍, പെരുമല, കീഴാന്തൂര്‍, ആടിവയല്‍ എന്നി മേഖലകളില്‍ കൃഷിചെയ്യുന്ന കാബേജുകളിലാണ്‌ വണ്ടുകളുടെ ആക്രമണം കൂടുതലും കണ്ടുവരുന്നത്‌.   തൈ നട്ട്‌ ദിവസങ്ങള്‍ക്കുള്ളിലാണ്‌ ഇലകളെ കാര്‍ന്ന്‌ തിന്ന്‌ ദ്വാരങ്ങള്‍ വീഴ്‌ത്തുന്നത്‌. ഇലകള്‍ കൂടി കാബേജ്‌ രൂപപ്പെടുന്ന വളര്‍ച്ചാ ഘട്ടത്തിലുള്ള വണ്ടുകളുടെ ആക്രമണമാണ്‌ വിളയെ പ്രതികൂലമായി ബാധിക്കുന്നത്‌. ഇത്‌ മൂന്നു കിലോ മുതല്‍ അഞ്ച്‌ കിലോ വരെ തൂക്കം വയ്‌ക്കുന്ന കാബേജുകള്‍ അരക്കിലോയായി ഉത്‌പാദനം കുറയുന്നു. വിളവെടുക്കുന്നതുവരെ വണ്ടുകളുടെ ആക്രമണത്തെ തടയാന്‍ കീടനാശിനി പ്രയോഗം നടത്തുന്നുവെങ്കിലും പ്രതിരോധിക്കാന്‍ കഴിയുന്നില്ലാ എന്നതാണ്‌ കര്‍ഷകരെ ആശങ്കയിലാഴ്‌ത്തുന്നത്‌.   കാബേജിന്‌ വിപണിയിലുണ്ടായിരിക്കുന്ന വിലയിടിവിനാലും വണ്ടാക്രമണംമൂലവും വേണ്ടത്ര വിളവ്‌ ലഭിക്കാത്തതിനാലും കൃഷിയിടത്തില്‍ തന്നെ ഉല്‍പന്നം ഉപേക്ഷിക്കുകയാണ്‌ കര്‍ഷകര്‍. ഇതിനൊരു ശാശ്വത പരിഹാരം കാണണമെന്നതാണ്‌ കര്‍ഷകരുടെ ആവശ്യം.