ആന്ധ്രാപ്രദേശില്‍ കോണ്‍ഗ്രസിനെ ശക്തിപ്പെടുത്തുക എന്ന ചുമതല ഉമ്മന്‍ ചാണ്ടിക്ക് ; ഉമ്മന്‍ ചാണ്ടി എ ഐ സി സി ജനറല്‍ സെക്രട്ടറി
മുതിര്‍ന്ന കോണ്‍ഗ്രസ് നേതാവും മുന്‍മുഖ്യമന്ത്രിയുമായ ഉമ്മന്‍ ചാണ്ടിക്ക് എ ഐ സി സി ജനറല്‍ സെക്രട്ടറി പദം. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുൾപ്പെടുന്ന നേതൃത്വമാണ് ഉമ്മന്‍ ചാണ്ടിക്ക്എ ഐ സി സി ജനറല്‍ സെക്രട്ടറി പദം നൽകിയത്. ആന്ധ്രപ്രദേശിന്റെ ചുമതലയാണ് അദ്ദേഹത്തിന് നല്‍കുക.
എ ഐ സി സി പുനഃസംഘടനയുടെ ഭാഗമായി കേരളത്തില്‍നിന്നുള്ള ചില നേതാക്കളെ ദേശീയനേതൃത്വത്തിലേക്ക് എത്തിക്കുമെന്ന് നേരത്തെ തന്നെ സൂചനകളുണ്ടായിരുന്നു. ഇതിന്റെ ഭാഗമായാണ് എ ഐ സി സി ജനറല്‍ സെക്രട്ടറി പദത്തിലേക്ക് ഉമ്മന്‍ ചാണ്ടിയെ എത്തിച്ചിരിക്കുന്നത്.
നിലവില്‍ ദിഗ്‌വിജയ് സിങ്ങിനാണ് ആന്ധ്രാപ്രദേശിന്റെ ചുമതല. ദിഗ് വിജയ് സിങ് ചുമതലയില്‍ നിന്ന് ഒഴിയുന്നതിലേക്കാണ് ഉമ്മന്‍ചാണ്ടിയുടെ നിയമനം. ബംഗാള്‍, ആന്‍ഡമാന്‍ നിക്കോബാര്‍ ദ്വീപുകളുടെ ചുമതലയില്‍നിന്ന് സി പി ജോഷിയെയും നീക്കിയിട്ടുണ്ട്‌. ഗൗരവ് ഗൊഗോയിക്കാണ് പുതിയ ചുമതല
കഴിഞ്ഞ നിയമസഭാ തിരഞ്ഞെടുപ്പിലും ലോക്‌സഭാ തിരഞ്ഞെടുപ്പിലും ദയനീയമായ പ്രകടനം കാഴ്ചവച്ച ആന്ധ്രാപ്രദേശില്‍ കോണ്‍ഗ്രസിനെ ശക്തിപ്പെടുത്തുക എന്ന ചുമതലയാണ് ഉമ്മന്‍ ചാണ്ടിക്ക് .
ഉമ്മന്‍ ചാണ്ടിയെ കൂടാതെ രണ്ട് എ ഐ സി സി സെക്രട്ടറിമാരാണ് നിലവില്‍ കേരളത്തില്‍നിന്നുള്ളത്. കര്‍ണാടകയുടെ ചുമതല കെ സി വേണുഗോപാലും ഡല്‍ഹിയുടെ ചുമതല പി സി ചാക്കോയും വഹിക്കും.
https://www.facebook.com/Malayalivartha
