ആലുവായില്‍ ഉസ്മാന്‍ എന്ന യുവാവിന് പൊലീസിന്റെ മര്‍ദ്ദനമേറ്റ വാര്‍ത്ത ചില ചാനലുകള്‍ വര്‍ഗീയവല്‍ക്കരിക്കാന്‍ ശ്രമിക്കുന്നെന്ന് മുതിര്‍ന്ന മാധ്യമപ്രവര്‍ത്തകനായ ആര്‍. സുരേഷ്. ഇന്നലെ ചാനലുകളില്‍ വന്നുതുടങ്ങിപ്പോള്‍ മുതല്‍ തോന്നിയതാണ്, ഇത് വര്‍ഗ്ഗീയവല്‍ക്കരിക്കാനുള്ള ഒരു ശ്രമം നടക്കുന്നില്ലേയെന്ന്- അദ്ദേഹം ഫെയിസ്ബുക്കിലൂടെ ചോദിക്കുന്നു. വാര്‍ത്തകളില്‍ നിരവധി പ്രാവശ്യമാണ് നോമ്പിനെക്കുറിച്ച് പരാമര്‍ശിച്ചത്. പുണ്യ റമസാന്റെ ഭാഗമായ നോമ്പും മറ്റ് ചടങ്ങുകളും മുസ്്‌ലിം സമുദായത്തിന് എത്ര പ്രധാനപ്പെട്ടതാണെന്ന് വ്യക്തമായി മനസിലാക്കി തന്നെയായിരിക്കണം ആ പ്രയോഗങ്ങള്‍. മറ്റൊരു രാഷ്ട്രീയ ഗൂഢലക്ഷ്യവും കൂടി അതിനുണ്ടെന്നും മംഗളം പത്രത്തിന്റെ രാഷ്ട്രീയ ലേഖകനായ അദ്ദേഹം പറയുന്നു.

2016ലെ തെരഞ്ഞെടുപ്പുമുതല്‍ മുസ്ലീംന്യൂനപക്ഷങ്ങള്‍ സി.പി.എമ്മിനെ ശത്രുക്കളായി കാണുന്നില്ല. അത് തിരുത്തിയില്ലെങ്കില്‍ അടുത്ത തെരഞ്ഞെടുപ്പുകളില്‍ പലര്‍ക്കും പച്ചതൊടാനാവില്ല. അതിനുള്ള മറുമരുന്നായിരുന്നു വാര്‍ത്തകളിലെ ആ അമിതപ്രയോഗങ്ങള്‍. അതാണ് ഇന്ന് നിയമസഭയിലും കണ്ടത്. ആവശ്യത്തിനും അനാവശ്യത്തിനും റംസാനും നൊയമ്പും എടുത്തിട്ട് അവിടെയും ഒരു വിഭജനത്തിന് ശ്രമം നടന്നു. അത് മനസിലാക്കിയായിരിക്കും മുഖ്യമന്ത്രിയും തിരിച്ചടിച്ചത്. അത് അല്‍പ്പം കടന്നുപോയി. എന്നാലും അടിക്ക് മരുന്ന് തിരിച്ചടിയെന്ന നിലയിലായി. നമ്മുടെ രാഷ്ട്രീയം രാഷ്ട്രീയത്തില്‍ നിന്നും വര്‍ഗ്ഗീയതയെ ആശ്രയിക്കുമ്പോഴുണ്ടാകുന്ന ഗതികേടാണ് ഇതൊക്കെ. എല്ലാവര്‍ക്കും ഇത് ഉപേക്ഷിച്ചിട്ട് മനുഷ്യനെ മനുഷ്യനായി കണ്ടുകൊണ്ട് രാഷ്ട്രീയത്തിലൂന്ന് രാഷ്ട്രീയപ്രവര്‍ത്തനം നടത്താന്‍ കഴിയില്ലേ? എന്നും അദ്ദേഹം ചോദിക്കുന്നു.