ബിജെപി സര്‍ക്കാരിനെ ഫാസിസ്റ്റ് എന്ന് വിളിക്കുന്നവരെ അറസ്റ്റ് ചെയ്യുകയാണെങ്കില്‍ രാജ്യത്ത് ലക്ഷക്കണക്കിന് പേരെ ദിവസം പ്രതി അറസ്റ്റ് ചെയ്യേണ്ടി വരുമെന്ന് സ്റ്റാലിന്‍. തമിഴ്‌നാട് ബിജെപി അധ്യക്ഷ തമിഴിസൈ സൗന്ദര്‍രാജനെതിരെ മുദ്രാവാക്യം വിളിച്ചകേസിൽ അറസ്റ്റിലായ ലൂയിസ് സോഫിയയെ മോചിപ്പിക്കണമെന്ന് ആവശ്യപ്പെട്ടു കൊണ്ടുള്ള തന്റെ ട്വിറ്ററില്‍ ആണ് സ്റ്റാലിന്‍ ഇക്കാര്യം കുറിച്ചത്.

അതേസമയം ലൂയിസ് സോഫിയക്ക് ജാമ്യം ലഭിച്ചു. തൂത്തുക്കുടി ജുഡീഷ്യല്‍ മജിസ്‌ട്രേറ്റ് കോടതിയാണ് സോഫിയയ്ക്ക് ജാമ്യം അനുവദിച്ചത്. ബിജെപി അധ്യക്ഷയുമായി വാക്കുതര്‍ക്കത്തിലേര്‍പ്പെട്ട സോഫിയ 'ബി.ജെ.പി സര്‍ക്കാര്‍ മൂര്‍ദ്ദാബാദ്' എന്ന് മുദ്രാവാക്യം വിളിക്കുകയായിരുന്നു. വിമാനത്തില്‍ തമിഴിസൈയ്ക്കു തൊട്ടു പിന്നിലെ സീറ്റിലാണു സോഫിയ ഇരുന്നത്. യാത്രയ്ക്കിടെ സോഫിയ ബിജെപിക്കെതിരെയും കേന്ദ്ര സര്‍ക്കാരിനെതിരെയും മുദ്രാവാക്യം മുഴക്കി. ഇതിനെച്ചൊല്ലി തമിഴിസൈയും സോഫിയയും വിമാനത്തിനകത്ത് ചൂടേറിയ വാഗ്വാദം നടന്നു. വിമാനത്തില്‍ നിന്നിറങ്ങി തമിഴിസൈ പോകാനൊരുങ്ങുന്നതിനിടെ, 'ഫാസിസ്റ്റ് സര്‍ക്കാര്‍ തുലയെട്ടെ'യെന്നു സോഫിയ മുദ്രാവാക്യം മുഴക്കി.

ഇതേതുടർന്ന് തമിഴിസൈ പൊലീസിനു പരാതി നല്‍കുകയായിരുന്നു. കാനഡയിലെ മോണ്‍ട്രിയാല്‍ സര്‍വകലാശാലയിലെ ഗവേഷകയും തമിഴ്‌നാട് സ്വദേശിനിയുമാണ് ലോയിസ് സോഫിയ.