ബിഎഡ് വിദ്യാർത്ഥിയുടെ അഡ്മിറ്റ് കാര്‍ഡില്‍ സ്വന്തം ചിത്രത്തിന് പകരം അച്ചടിച്ച് വന്നത് അമിതാഭ് ബച്ചന്‍റെ ചിത്രം. ഫൈസാബാദ് ജില്ലയിലെ ഡോ.റാം മനോഹര്‍ ലോഹ്യ അവധ് സര്‍വ്വകലാശാലയിൽ നിന്നും ലഭിച്ച കാർഡിലാണ് വിദ്യാർത്ഥിയുടെ ഫോട്ടോക്ക് പകരം അമിതാഭ് ബച്ചന്‍റെ ഫോട്ടോ വന്നിരിക്കുന്നത്. പരീക്ഷയ്ക്കുള്ള രേഖകള്‍ ഓണ്‍ലൈനായി സമര്‍പ്പിക്കുമ്പോള്‍ വിദ്യാര്‍ത്ഥിയോ ഇന്റര്‍നെറ്റ് കഫേക്കാരോ തെറ്റായി ഫോട്ടോ അപ്‌ലോഡ് ചെയ്തതാവാം കാരണമെന്നാണ് കോളേജ് അധികൃതര്‍ പറഞ്ഞത്.

എന്നാല്‍ താന്‍ കൃത്യമായിട്ടാണ് എല്ലാം നല്‍കിയതെന്ന് വിദ്യാര്‍ത്ഥി പറഞ്ഞു. മറ്റു രേഖകള്‍ ഹാജരാക്കിയതിനെത്തുടര്‍ന്ന് വിദ്യാര്‍ത്ഥിയെ പരീക്ഷയെഴുതാന്‍ അനുവദിച്ചു. എന്നാല്‍ അമിതാഭ് ബച്ചന്റെ ഫോട്ടോ പതിച്ച മാര്‍ക്ക് ഷീറ്റായിരിക്കുമോ തനിക്ക് ലഭിക്കുക എന്ന ആശങ്കയിലാണ് ഗോണ്ട ജില്ലയിലെ രവീന്ദ്ര സിംഗ് സ്മാരക് മഹാവിദ്യാലയത്തിലെ വിദ്യാര്‍ഥിയായ അമിത് ദ്വിവേദിയ്ക്ക്.

യൂണിവേഴ്‌സിറ്റിയുടെ ഭാഗത്ത് നിന്ന് വീഴ്ചയുണ്ടായിട്ടുണ്ടോ എന്ന് പരിശോധിക്കുമെന്നും കൃത്യമായ മാര്‍ക്ക് ഷീറ്റ് ലഭ്യമാക്കുമെന്നും കോളേജ് അധികൃതര്‍ പറഞ്ഞു.