68 ന്‍റെ നിറവില്‍ പ്രധാനമന്ത്രി നരേന്ദ്ര മോദി; ആഘോഷം വാരണാസിയില്‍ ; രാജ്യത്തെ ജനങ്ങള്‍ക്ക് വേണ്ടി ഇനിയും ഒരുപാട് കാലം സേവനമനുഷ്ഠിക്കാന്‍ സാധിക്കട്ടെയെന്നും ദീര്‍ഘായുസ് നേരുന്നുവെന്നും രാഷ്ട്രപതി രാംനാഥ് കോവിന്ദ് ട്വിറ്ററില്‍ കുറിച്ചു
പ്രധാനമന്ത്രി നരേന്ദ്ര മോദിയുടെ അറുപത്തി എട്ടാം ജന്മദിനം ഇന്ന്. സ്വന്തം മണ്ഡലമായ വാരണാസിയിലാണ് മോദിയുടെ ജന്മദിനം ചെലവഴിക്കുന്നത്. ഇന്നും നാളെയും അദ്ദേഹം വാരണാസിയിൽ വിവിധ പരിപാടികളിൽ പങ്കെടുക്കും. ഉച്ചയോടെ മണ്ഡലത്തിലെത്തുന്ന മോദി വാരണാസി ജില്ലയിലെ നരൗർ ഗ്രാമത്തിൽ കാശി വിദ്യാപീഠത്തിലെ പ്രൈമറി സ്കൂൾ വിദ്യാർഥികളുമായി സംവദിക്കും.
നാളെ ബനാറസ് ഹിന്ദു യുണിവേഴ്സിറ്റിയിലെ ആംഫി തിയേറ്ററിൽ നടക്കുന്ന ചടങ്ങിൽ 500 കോടിയുടെ വികസന പദ്ധതികളുടെ ഉദ്ഘാടനം പ്രധാനമന്ത്രി നിർവഹിക്കും. പുതിയ പദ്ധതികളുടെ പ്രഖ്യാപനവും ഉണ്ടാകും. മോദിയുടെ ജന്മദിനത്തോട് അനുബന്ധിച്ച് ജില്ലയിലെ 68 ഇടങ്ങളിൽ പ്രത്യേക മെഡിക്കൽ ക്യാമ്പ് സംഘടിപ്പിക്കും. പ്രസിഡന്‍റ് രാം നാഥ് കോവിന്ദ് ഉള്‍പ്പെടെ നിരവധി രാഷ്ട്രീയ, സിനിമാ പ്രവര്‍ത്തകര്‍ ട്വിറ്ററിലൂടെ പ്രധാനമന്ത്രിയ്ക്ക് ജന്മദിനാശംസകള്‍ അറിയിച്ചു.
രാജ്യത്തെ ജനങ്ങള്‍ക്ക് വേണ്ടി ഇനിയും ഒരുപാട് കാലം സേവനമനുഷ്ഠിക്കാന്‍ സാധിക്കട്ടെയെന്നും ദീര്‍ഘായുസ് നേരുന്നുവെന്നും രാഷ്ട്രപതി രാംനാഥ് കോവിന്ദ് ട്വിറ്ററില്‍ കുറിച്ചു. ഊര്‍ജസ്വലനും ശ്രേഷ്ഠനുമായ പ്രധാനമന്ത്രിക്ക് പിറന്നാള്‍ ആശംസകള്‍ നേരുന്നുവെന്ന് ധനമന്ത്രി അരുണ്‍ ജയ‌റ്റ്‌ലി ട്വിറ്ററില്‍ കുറിച്ചു. അദ്ദേഹത്തിന് ആരോഗ്യവും ദീ‌ര്‍ഘായുസും നേരുന്നു. രാജ്യത്തിന് വേണ്ടി ഇനിയും ഒരുപാട് വര്‍ഷം മഹത്തായ സേവനം അനുഷ്‌ഠിക്കാന്‍ അദ്ദേഹത്തിന് സാധിക്കട്ടെ. അതിലൂടെ രാജ്യത്തിന് വിജയം വരിക്കാനകട്ടെയെന്നും അദ്ദേഹം അദ്ദേഹം പറഞ്ഞു. ഗോവ മുഖ്യമന്ത്രി മനോഹര്‍ പരീക്ക‌ര്‍, ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്, മുന്‍ ഇന്ത്യന്‍ ക്രിക്കറ്റ് ക്യാപ്‌റ്റന്‍ സൗരവ് ഗാംഗുലി തുടങ്ങിയവരും ആശംസകള്‍ അറിയിച്ചു.
1950 സെപ്റ്റംബര്‍ എട്ടിന് ദാമോദര്‍ദാസ് മുല്‍ചന്ദ് മോദിയുടെയും ഹീരാബെന്‍ മോദിയുടെയും ആറു മക്കളില്‍ മൂന്നാമനായിട്ടായിരുന്നു മോദിയുടെ ജനനം.
https://www.facebook.com/Malayalivartha
