വാഹനാപകടങ്ങൾ സൃഷ്ടിക്കുന്ന ദുഃഖം നാടിന്റെ തീരാ സങ്കടമായിട്ട് കാലങ്ങളായി. സമീപകാലത്തായി മദ്യപിച്ചും ലഹരി ഉപയോഗിച്ചും വാഹനം ഓടിച്ചുള്ള അപകടങ്ങളും, കൗമാരപ്രായക്കാർ പ്രതികളാകുന്ന ദുരന്തങ്ങളും തുടർക്കഥയാവുകയാണ്. അപകടത്തിൽ സ്വന്തം തെറ്റില്ലാതെ ജീവൻ പൊലിയുന്നവർക്കും അവരുടെ കുടുംബങ്ങൾക്കും നീതി ലഭിക്കണം എന്നത് ജാതി-മത-ദേശ ഭേദമന്യേ ഏതൊരു മലയാളിയിലും ഉണ്ടാകുന്ന സാമാന്യ മാനുഷിക വികാരമാണ്.

മാനന്തവാടി (വയനാട്) എടവക രണ്ടേനാലിൽ കാറിടിച്ചു മരിച്ച ആറാം ക്ലാസ് വിദ്യാർഥിനി ദിവയ്ക്കു നാടു കണ്ണീരോടെ വിട നൽകി. മകളുടെ വിയോഗ വാർത്തയറിഞ്ഞ് ഓസ്ട്രിയയിൽ നിന്നെത്തിയ പിതാവ് രാജേഷ് ചോക്കലേറ്റ് പെട്ടികൾ പേടകത്തിൽ വച്ചപ്പോൾ അതുവരെ ദുഃഖം കടിച്ചമർത്തി നിന്നവരെല്ലാം പൊട്ടിക്കരഞ്ഞു. രാജേഷ് നേരത്തെ മാനന്തവാടി മെഡിക്കൽ കോളജിൽ ഐടി കോ-ഓർഡിനേറ്ററായി ജോലി ചെയ്തിരുന്നു. മാതാവ് സ്വപ്ന മാനന്തവാടിയിൽ ദിഗ്‌സ് സ്പാ ബ്യൂട്ടി പാർലർ നടത്തിവരികയാണ്.ഇന്നലെ വൈകിട്ടു മൂന്നോടെയാണു സംസ്കാരച്ചടങ്ങുകൾ ആരംഭിച്ചത്.

ഭവനത്തിൽനിന്നു മൃതദേഹം വിലാപയാത്രയായി ദീപ്തിഗിരി സെന്റ് തോമസ് പള്ളിയിലെത്തിച്ചു. രൂപതയിൽ നിന്നുള്ള പ്രത്യേക അനുമതിയോടെ സംസ്കാരച്ചടങ്ങിൽ കുർബാനയും അർപ്പിച്ചു. രാജേഷ് തന്നെയാണു കുർബാനയ്ക്കു ഗായക സംഘത്തോടൊപ്പം പാട്ടുപാടി മകളെ യാത്രയാക്കിയത്.പാട്ടുപാടിയും കഥയും കവിതയും എഴുതിയും ചിത്രം വരച്ചും സമൂഹമാധ്യമങ്ങളിലും താരമായിരുന്നു ദിവ.കഴിഞ്ഞ ശനിയാഴ്ച സഹോദരൻ ഡെറിക്കിനൊപ്പം നടന്നുപോവുകയായിരുന്ന ദിവയെ പിന്നിൽ നിന്നെത്തിയ കാർ ഇടിച്ചുതെറിപ്പിക്കുകയായിരുന്നു.

വിദഗ്ധചികിത്സയ്ക്കായി ആശുപത്രിയിൽ പ്രവേശിപ്പിച്ചെങ്കിലും രക്ഷിക്കാനായില്ല. അപകടത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ടായിരുന്നു . കല്ലോടി ഭാഗത്തുനിന്ന് മാനന്തവാടിയിലേക്ക് സഞ്ചരിച്ച കാർ റോഡിന്റെ ഇടതുവശത്തുകൂടി പോകേണ്ടതിന് പകരം നിയന്ത്രണം നഷ്ടപ്പെട്ട് വലതുവശത്തേക്ക് നീങ്ങിയാണ് കുട്ടികളെ ഇടിച്ചത്. ഇടിയുടെ ആഘാതത്തിൽ കുട്ടികൾ തെറിച്ചുവീണു. തുടർന്ന് എതിരെ വന്ന സ്കൂട്ടറിലും കാർ ഇടിച്ചു.

അതിനുശേഷമാണ് വാഹനം നിന്നത്.ഗുരുതരമായി പരിക്കേറ്റ ദിവയെ ആദ്യം മാനന്തവാടി മെഡിക്കൽ കോളജ് ആശുപത്രിയിലും പിന്നീട് മേപ്പാടിയിലെ സ്വകാര്യ ആശുപത്രിയിലും എത്തിച്ചു. എന്നാൽ ചികിത്സയ്ക്കിടെ ജീവൻ രക്ഷിക്കാനായില്ല. അപകടത്തിൽ സഹോദരൻ ഡെറിക്കിനും പരിക്കേറ്റെങ്കിലും കുട്ടി രക്ഷപ്പെട്ടു. സ്കൂട്ടറിലുണ്ടായിരുന്നവർക്കും പരിക്കേറ്റിട്ടുണ്ട്.അപകടസമയത്ത് കാർ ഓടിച്ചിരുന്ന അയിലമൂല സ്വദേശി സജി എബ്രഹാമിന് ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് വയനാട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.