നാം ചാന്ദ്ര ദൗത്യം പരാജയമാണെന്ന ആശങ്കയിലിരിക്കുമ്പോള്‍ അറിയേണ്ടത് ലോകരാജ്യങ്ങളെല്ലാം നടത്തിയ ആദ്യ ചാന്ദ്ര ദൗത്യങ്ങളെല്ലാം പരാജയമായിരുന്നു എന്നുള്ളതാണ് എന്നാല്‍ മറ്റൊരു വസ്തുത എന്നത് എങ്കിലും നമ്മുടെ ദൗത്യം 95 ശതമാനം ഫലം കണ്ടു വെറും 5 ശതമാനം മാത്രമാണ് പാളിപ്പോയത്, ചന്ദ്രനിലേക്കുള്ള ആദ്യ ലാന്‍ഡര്‍ ദൗത്യങ്ങളായ റഷ്യയുടെ ലൂണ ഇ6 ദൗത്യങ്ങളെല്ലാം ആദ്യഘട്ടങ്ങളില്‍ത്തന്നെ പാളിയവയാണ്. ലൂണ 5 ദൗത്യം ചന്ദ്രന്റെ ഉപരിതലത്തിനു തൊട്ടടുത്തെത്തിയെങ്കിലും ത്രസ്റ്റര്‍ റോക്കറ്റുകള്‍ പ്രവര്‍ത്തിക്കാത്തതിനാല്‍ ബ്രേക്കിങ് ഘട്ടം നടന്നില്ല.

തുടര്‍ന്ന് ചന്ദ്രോപരിതലത്തിലേക്ക് ഇടിച്ചിറങ്ങി നശിച്ചു. 11 ലാന്‍ഡര്‍ ദൗത്യങ്ങള്‍ പരീക്ഷിച്ചു പരാജയപ്പെട്ട ശേഷമാണ് ചന്ദ്രനിലെ ആദ്യ ലാന്‍ഡറായ ലൂണ 9 റഷ്യയ്ക്കു വിജയിപ്പിക്കാനായത്.യുഎസ്സിന്റെ 3 ലാന്‍ഡര്‍ ദൗത്യങ്ങള്‍ പരാജയങ്ങളായിരുന്നു. 1973ല്‍ റഷ്യ വിട്ട ലൂണ 21നു ശേഷം 4 പതിറ്റാണ്ട് ഒരു രാജ്യവും ലാന്‍ഡര്‍ ദൗത്യങ്ങള്‍ ചന്ദ്രനിലേക്ക് അയച്ചില്ല. സങ്കീര്‍ണതയും ചെലവുമായിരുന്നു കാരണം. ഒടുവില്‍ 2013ല്‍ ചൈന ചാങ് ഇ 3 എന്ന ലാന്‍ഡര്‍ ചന്ദ്രനിലിറക്കി അതിനു വിരാമമിട്ടു. തുടര്‍ന്ന്, സ്വകാര്യ പങ്കാളിത്തത്തോടെ ഉന്നത സാങ്കേതികവിദ്യ ഉപയോഗിച്ച് ഈ വര്‍ഷം ബെറഷീറ്റ് എന്ന ലാന്‍ഡര്‍ ഇസ്രയേല്‍ വിക്ഷേപിച്ചെങ്കിലും സോഫ്റ്റ് ലാന്‍ഡിങ് നടന്നില്ല. ചന്ദ്രയാന്‍ 2ലെ വിക്രമിനെപ്പോലെതന്നെ താഴോട്ടിറക്ക ഘട്ടത്തില്‍ (ഡിസന്റ് സ്റ്റേജ്) ബെറഷീറ്റുമെത്തിയിരുന്നു. എന്നാല്‍ അവസാനപാദത്തില്‍ ബ്രേക്കിങ് ത്രസ്റ്ററുകള്‍ പ്രവര്‍ത്തനരഹിതമായി. ഒരിടവേളയ്ക്കുശേഷം അവ വീണ്ടും പ്രവര്‍ത്തിച്ചെങ്കിലും വൈകിപ്പോയിരുന്നു. ബെറഷീറ്റ് ചന്ദ്രോപരിതലത്തില്‍ ഇടിച്ചിറങ്ങി നശിച്ചു.

ചൊവ്വ, ബുധന്‍, ശനിയുടെ ഉപഗ്രഹമായ ടൈറ്റന്‍ എന്നിവിടങ്ങളില്‍ മനുഷ്യര്‍ വിജയകരമായി ലാന്‍ഡറുകള്‍ ഇറക്കിയിട്ടുണ്ട്. മികച്ച അന്തരീക്ഷമുള്ള ഇവിടങ്ങളില്‍ എയ്‌റോ ബ്രേക്കിങ് എന്ന ശൈലിയിലാണു ലാന്‍ഡറുകള്‍ ഇറങ്ങുന്നത്. ഗ്രഹത്തെ പലതവണ ചുറ്റുന്നതുമൂലം അന്തരീക്ഷത്തില്‍ നിന്നുണ്ടാകുന്ന വിപരീത ഊര്‍ജം (ഡ്രാഗ്) മൂലം വേഗം കുറയുന്ന ശൈലിയാണിത്. പക്ഷേ കട്ടിയുള്ള അന്തരീക്ഷത്തിന്റെ അഭാവമുള്ള ചന്ദ്രനില്‍ ഈ രീതി നടപ്പില്ല.ഭൂമിയില്‍നിന്നു വിഭിന്നമായ പ്രതലവും വളരെ നേര്‍ത്ത അന്തരീക്ഷവുമുള്ള ചന്ദ്രനിലെ ലാന്‍ഡിങ്ങിനെ ചന്ദ്രന്റെ ഗുരുത്വബലവും ബാധിക്കും. കണക്കുകൂട്ടലുകളുടെയും ഗവേഷണത്തിന്റെയും പശ്ചാത്തലത്തിലാണ് ലാന്‍ഡിങ് രൂപകല്‍പന ചെയ്യുന്നത്. സാങ്കേതികപരമായ എല്ലാ പഴുതുകളുമടച്ചാലും ഭാഗ്യം വളരെ വലിയൊരു ഘടകമാണ് മൂണ്‍ ലാന്‍ഡിങ്ങില്‍. ലാന്‍ഡറുകളില്‍ ത്രസ്റ്റര്‍ റോക്കറ്റ് ഘടിപ്പിച്ച് ചന്ദ്രന്റെ ഗുരുത്വബലത്തിനു വിപരീതമായ ഊര്‍ജം നല്‍കി ബ്രേക്ക് ചെയ്താണു ചന്ദ്രനില്‍ ലാന്‍ഡറുകള്‍ ഇറക്കുന്നത്. ഏതു ഘട്ടത്തിലും പിഴവുകള്‍ വരാം. ഇത്തരം സങ്കീര്‍ണതകള്‍ മൂണ്‍ ലാന്‍ഡിങ്ങിനെ ലക്ഷ്യം നേടാന്‍ പ്രയാസമുള്ള പ്രക്രിയയാക്കുന്നു. ഭൂമിയിലെ രണ്ടാഴ്ച ദൈര്‍ഘ്യമുള്ള ചന്ദ്രനിലെ ഒരു പകല്‍, താപനിലയില്‍ വ്യത്യാസം വരുത്തുന്നതിനാല്‍ ലാന്‍ഡറുകളുടെ ഇലക്ട്രോണിക് ഉപകരണങ്ങളും നശിക്കാന്‍ സാധ്യതയുണ്ട്.

ചന്ദ്രനിലേക്കു വിവിധ ബഹിരാകാശ ഏജന്‍സികള്‍ അയച്ച ദൗത്യങ്ങളില്‍ 60% മാത്രമാണു വിജയിച്ചതെന്നു യുഎസ് ബഹിരാകാശസ്ഥാപനമായ നാസ പറയുന്നു. ഉപദൗത്യങ്ങളായി തരംതിരിക്കാതെയിരുന്നാല്‍ ഇതുവരെ 109 ദൗത്യങ്ങള്‍ ചന്ദ്രനിലേക്കു പോയിട്ടുണ്ട്. ചന്ദ്രനെ ചുറ്റുന്ന ഓര്‍ബിറ്റര്‍, അടുത്തുകൂടി തെന്നിമാറിപ്പോകുന്ന ഫ്‌ലൈബൈ, ഇടിച്ചിറങ്ങുന്ന ഇംപാക്ടര്‍, തൊട്ടുതൊട്ടിറങ്ങുന്ന ലാന്‍ഡര്‍ തുടങ്ങിയ വിഭാഗങ്ങളിലുള്ളവ ഇവയില്‍ ഉള്‍പ്പെടും. ഇവയില്‍ 61 എണ്ണം വിജയം നേടിയപ്പോള്‍ 48 എണ്ണം പരാജയപ്പെടുകയാണുണ്ടായത്. ഇന്ത്യ, യുഎസ്, റഷ്യ, ജപ്പാന്‍, യൂറോപ്യന്‍ സ്‌പേസ് ഏജന്‍സി, ചൈന എന്നീ രാജ്യങ്ങളാണ് ഈ ദൗത്യങ്ങള്‍ വിക്ഷേപിച്ചത്.1958 ഓഗസ്റ്റ് 17ന് ആണ് ആദ്യ ചാന്ദ്രദൗത്യമായ പയനിയര്‍ 0 അമേരിക്കന്‍ വ്യോമസേന വിക്ഷേപിച്ചത് പരാജയപ്പെടുകയാണുണ്ടായത്. ആ വര്‍ഷം തന്നെ ലൂണ ഇ1 എന്ന ദൗത്യം റഷ്യ വിട്ടെങ്കിലും ഇതേ വിധി തന്നെയായിരുന്നു. തുടര്‍ന്ന് 8 ദൗത്യങ്ങള്‍ ഇരു രാജ്യങ്ങളും കൂടി വിക്ഷേപിച്ചെങ്കിലും എല്ലാം പരാജയപ്പെട്ടു. തുടര്‍ന്നാണ് ആദ്യ വിജയ ചാന്ദ്രദൗത്യമായ ലൂണ 2 ചന്ദ്രനിലിറങ്ങിയത്.