ജമ്മു കശ്മീരിന്റെ വികസനപ്രവർത്തനങ്ങൾക്ക് ഊന്നൽ കൊടുത്തായിരിക്കും ഇനി കേന്ദ്ര സർക്കാരിന്റെ ഓരോ ചുവടുവെപ്പും..അതിനുള്ള ചുവടുപടികളിൽ ഒന്നാണ് വന്ദേ ഭാരത് എക്‌സ്പ്രസ്..പൂര്‍ണ്ണമായും ഇന്ത്യയില്‍ നിര്‍മ്മിച്ച എഞ്ചിനില്ലാ ഹൈസ്പീഡ് ട്രെയിന്‍ ആയ വന്ദേഭാരത് എക്‌സ്പ്രസ് ഇനി കത്ര വരെ സർവീസ് നടത്താൻ കേന്ദ്ര സർക്കാർ തീരുമാനിച്ചു . വൈഷ്ണോ ദേവീ തീർത്ഥാടനത്തിനു എത്തുന്നവർക്ക് സുഗമമായ സഞ്ചാരമൊരുക്കുക എന്ന ലക്ഷ്യത്തോടെയാണ് ട്രെയിൻ യാത്രയിലേക്ക് നീട്ടുന്നത്

ജമ്മു കശ്മീരിന്റെ വികസനത്തിനും മത ടൂറിസത്തെ പ്രോത്സാഹിപ്പിക്കുന്നതിനും വന്ദേ ഭാരത് എക്‌സ്പ്രസ് സഹായിക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ പറഞ്ഞു . ദില്ലിയില്‍ നിന്ന് ജമ്മുവിലെ കത്രയിലേക്കുള്ള ഇന്ത്യയിലെ ഏറ്റവും വേഗതയേറിയ ട്രെയിനായ വന്ദേ ഭാരത് എക്‌സ്പ്രസ് അമിത് ഷാ ഫ്ലാഗ് ഓഫ് ചെയ്തു.
ദില്ലിക്കും വൈഷ്‌ണോ ദേവി ക്ഷേത്രത്തിലേക്കുള്ള അവസാന സ്റ്റേഷനായ കത്രയിലേക്കുമുള്ള അതിവേഗ ട്രെയിന്‍ ഓടിയെത്തുന്ന സമയം 12 മണിക്കൂറില്‍ നിന്ന് എട്ട് മണിക്കൂറായി കുറയ്ക്കും. രാജ്യത്തെ രണ്ടാമത്തെ വന്ദേ ഭാരത് എക്‌സ്പ്രസ് ആണ് ഉദ്ഘാടനം ചെയ്തത്. ആദ്യത്തേത് ദില്ലിക്കും വാരണാസിക്കും ഇടയിലാണ്.

പരീക്ഷണാടിസ്ഥാനത്തിൽ ട്രയിൻ സർവീസ് നടത്താനുള്ള തീരുമാനം കേന്ദ്ര സർക്കാർ കൈക്കൊണ്ടിരുന്നു . നിലവിൽ 12 മണിക്കൂറാണ് ഡൽഹിയിൽ നിന്ന് കത്ര വരെയുള്ള ട്രയിൻ യാത്രയ്ക്ക് വേണ്ടി വരുന്നത് . വന്ദേ ഭാരത് എക്സ്പ്രസ് വരുന്നതോടെ അത് എട്ടു മണിക്കൂറിൽ താഴെയാകും .

ചെന്നൈയിലെ ഇന്‍റഗ്രേറ്റഡ് കോച്ച് ഫാക്ടറിയിൽ പൂര്‍ണ്ണമായും തദ്ദേശീയമായി നിര്‍മിച്ച ട്രെയിനിന് 160 കിലോമീറ്ററാണ് പരമാവധി വേഗം. 97 കോടി രൂപ ചെലവിൽ 18 മാസം കൊണ്ടാണ് നിര്‍മാണം പൂര്‍ത്തീകരിച്ചത്. പൂര്‍ണ്ണമായും ശീതീകരിച്ച കോച്ചുകളുള്ള ട്രെയിൻ ഓടാൻ പ്രത്യേക എൻജിൻ്റെ ആവശ്യമില്ല. മെട്രോ ട്രെയിനുകളുടെ മാതൃകയിൽ കോച്ചുകള്‍ക്ക് അടിയിൽ ഘടിപ്പിച്ചിരിക്കുന്ന ഇലക്ട്രിക് മോട്ടോറുകളുടെ സഹായത്തോടെയാണ് ട്രെയിൻ ചലിക്കുന്നത്.

അംബാല, ലുധിയാന, ജമ്മു തവി വഴിയാകും വന്ദേ ഭാരത് എക്സ്പ്രസ്സിന്റെ കത്ര യാത്ര . രണ്ട് മിനിട്ടാകും ഒരു സ്റ്റേഷനിൽ ട്രയിൻ നിർത്തുക .ഇന്ത്യൻ എൻജിനീയര്‍മാരുടെ നേതൃത്വത്തിൽ നിര്‍മിച്ച വന്ദേഭാരത് എക്സ്പ്രസ് രാജ്യത്ത് ലോകനിലവാരത്തിലുള്ള ട്രെയിനുകള്‍ നിര്‍മിക്കാമെന്നതിന്‍റെ മികച്ച ഉദാഹരണമാണെന്ന് കേന്ദ്ര റെയിൽവേ മന്ത്രി പീയൂഷ് ഗോയൽ ട്രെയിനിന്‍റെ പേര് പ്രഖ്യാപിച്ചു കൊണ്ട് പറഞ്ഞിരുന്നു..

ജമ്മു കശ്മീരിന് പ്രത്യേക പദവി നല്‍കിയിരുന്ന ആര്‍ട്ടിക്കിള്‍ 370 ആയിരുന്നു സംസ്ഥാനത്തിന്റെ വികസനത്തിലെ ഏറ്റവും തടസ്സമെന്ന് ആഭ്യന്തരമന്ത്രി പറഞ്ഞു. ആര്‍ട്ടിക്കിള്‍ 370 റദ്ദാക്കുന്നതിനുമുമ്പ്, ജമ്മു കശ്മീരിന്റെ വികസനത്തിലേക്കുള്ള പാതയില്‍ നിരവധി തടസ്സങ്ങള്‍ ഉണ്ടായിരുന്നു. അടുത്ത 10 വര്‍ഷത്തിനുള്ളില്‍ ജമ്മു കശ്മീര്‍ ഏറ്റവും വികസിത സംസ്ഥാനങ്ങളിലൊന്നായി മാറും.

വന്ദേ ഭാരത് എക്‌സ്പ്രസ് സജ്ജമാക്കിയതോടെ വികസന യാത്ര ആരംഭിച്ചു കഴിഞ്ഞു . ഇനി സംസ്ഥാനത്ത് ടൂറിസം വര്‍ധിപ്പിക്കുകയാണ് ലക്ഷ്യമെന്നും അമിത് ഷാ പറഞ്ഞു. റെയില്‍വേ മന്ത്രി പീയൂഷ് ഗോയല്‍, കേന്ദ്രമന്ത്രിമാരായ ഡോ. ജിതേന്ദ്ര സിംഗ്, ഡോ. ഹര്‍ഷ് വര്‍ധന്‍ എന്നിവറൺ ഫ്ലാഗ് ഓഫിനു എത്തിയിരുന്നു..

ട്രെയിന്‍ നമ്പര്‍ 22439 ന്യൂഡല്‍ഹി-കത്ര വന്ദേ ഭാരത് എക്‌സ്പ്രസ് ദില്ലി റെയില്‍വേ സ്റ്റേഷനില്‍ നിന്ന് രാവിലെ 6 ന് ആരംഭിച്ച് 2 മണിക്കാണ് കത്രയിലെത്തുന്നത് . ട്രെയിനിന് രണ്ട് മിനിറ്റ് വീതം അംബാല കന്റോണ്‍മെന്റ്, ലുധിയാന, ജമ്മു തവി എന്നിവിടങ്ങളില്‍ സ്റ്റോപ്പുകള്‍ ഉണ്ടാകും. അതേ ദിവസം തന്നെ മടക്കയാത്രയില്‍ കത്ര-ദില്ലി വന്ദേ ഭാരത് എക്‌സ്പ്രസ് കത്രയില്‍ നിന്ന് 3 മണിക്ക് പുറപ്പെട്ട് രാത്രി 11 ന് ദില്ലി റെയില്‍വേ സ്റ്റേഷനില്‍ എത്തും

2022 ഓഗസ്റ്റ് 15 ന് മുമ്പ് കശ്മീരില്‍ നിന്ന് കന്യാകുമാരിയിലേക്ക് റെയില്‍ വഴി രാജ്യത്തെ ബന്ധിപ്പിക്കുമെന്ന് ഗോയല്‍ പറഞ്ഞു. 'എന്റെ സഹോദരിമാര്‍ക്കും ജമ്മുവിന്റെ സഹോദരന്മാര്‍ക്കും വൈഷ്ണവോ ദേവിയുടെ ഭക്തര്‍ക്കുമുള്ള നവരാത്രി സമ്മാനമാണ് ഇതെന്ന് പ്രധാനമന്ത്രി നരേന്ദ്ര മോദി ട്വീറ്റ് ചെയ്തു.