സര്ക്കാരിനെ മനപൂര്വം കരിവാരി തേക്കാന് ചില എംപിമാര് ശ്രമിക്കുന്നതായി പ്രധാനമന്ത്രി നരേന്ദ്രമോഡി, സഭയില് ഹാജരാകാത്ത എംപിമാര് പാര്ട്ടിയില് കാണില്ലെന്നും പ്രധാനമന്ത്രി
കഴിഞ്ഞ രണ്ട് ദിവസങ്ങളിലായി പ്രധാനമന്ത്രി നരേന്ദ്രമോഡി കടുത്ത ദേശ്യത്തിലാണ്. ഇപ്പോള് നടന്നു വരുന്ന പാര്ലമെന്റിന്റെ ബജറ്റ് സമ്മേളനത്തിനിടെ രാജ്യസഭയില് തിരിച്ചടിയേറ്റതാണ് പ്രധാനമന്ത്രിയെ കടുത്ത അതൃപ്തിയിലെത്തിച്ചത്. ചില എംപിമാര് മനപ്പൂര്വം സര്ക്കാരിനെ കരിവാരിതേക്കാന് ഇറങ്ങിയിരിക്കുകയാണെന്നാണ് പ്രധാനമന്ത്രിയുടെ വാദം. ഇതിന് ചില മുതിര്ന്ന നേതാക്കളുടെ പിന്തുണയും ഇവര്ക്ക് ലഭിക്കുന്നുണ്ടെന്ന് മോഡി കരുതുന്നുണ്ട്.
എന്നാല് സഭയില് ഹാജരാകാത്ത എംപിമാര്ക്കെതിരെ നടപടിയെടുക്കാന് ബിജെപി അധ്യക്ഷന് അമിത് ഷായോട് മോഡി നിര്ദ്ദേശിച്ചതായാണ് സൂചന. ഇത്തരക്കാന് പാര്ട്ടിയില് ഉണ്ടാവില്ലെന്നും മോഡി പറഞ്ഞു. തുടര്ന്ന് സഭയില് ഹാജരാകാത്ത സ്വന്തം എംപിമാരോടും സഖ്യകക്ഷി എംപിമാരോടും മറുപടി തേടി പ്രധാനമന്ത്രി കത്തയച്ചു. രാഷ്ട്രപതിയുടെ പ്രസംഗത്തില് തിരുത്തല് ആവശ്യപ്പെട്ട് സിപിഐഎം നേതാക്കളായ സീതാറാം യെച്ചൂരി, പി രാജീവ് എന്നിവര് കൊണ്ടുവന്ന പ്രമേയം രാജ്യസഭയില് 57നെതിരേ 118 വോട്ടുകളോടെ പാസായതാണ് മോഡിയെ ചൊടിപ്പിച്ചത്. ഈ സമയത്ത് രാജ്യസഭയിലെ ബിജെപി എംപിമാരില് 10 പേരും സഖ്യ കക്ഷികളില് നിന്നുള്ള 12 അംഗങ്ങളും സഭയിലുണ്ടായിരുന്നില്ല. \'വോട്ടിങ് നടക്കുമ്പോള് ഹാജരാകാത്ത മന്ത്രിമാരുള്പ്പെടെയുള്ള എല്ലാ എംപിമാരോടു കാരണം വിശദീകരിക്കാന് ആവശ്യപ്പെട്ടിട്ടുണ്ട്,\' ഒരു പാര്ട്ടി നേതാവ് പറഞ്ഞു.
അതേസമയം അംഗങ്ങളുടെ അസാന്നിദ്ധ്യത്തിലും ബിജെപിക്ക് എഐഎഡിഎംകെ, സ്വതന്ത്രര് തുടങ്ങിയവരുടെ വോട്ടുകള് ലഭിച്ചു. പ്രതിപക്ഷ അംഗങ്ങളില് എല്ലാവരും ഹാജരുണ്ടായിരുന്നില്ലെങ്കിലും പ്രതിപക്ഷ പാര്ട്ടികളായ കോണ്ഗ്രസ്, എസ്പി, ബിഎസ്പി, തൃണമൂല് കോണ്ഗ്രസ്, ഡിഎംകെ, ജെഡിയു, സിപിഐ എന്നിവര് ഒന്നടങ്കം സിപിഐ എമ്മിന്റെ പ്രമേയത്തെ അനുകൂലിച്ചതോടെ വലിയ തടസ്സങ്ങളില്ലാതെയാണ് ഭേദഗതി പാസായത്.
എന്ഡിഎ സര്ക്കാര് രാജ്യസഭയില് ന്യൂനപക്ഷമാണെന്നിരിക്കെ ഇവരുടെ സാന്നിദ്ധ്യവും വലിയ മാറ്റമൊന്നും ഉണ്ടാക്കുമായിരുന്നില്ല. അതേസമയം ഇങ്ങനെ ഒരു വിശദീകരണം തേടലിലൂടെ ഭാവിയിലുണ്ടാകുന്ന സമാന സാഹചര്യങ്ങളില് രാജ്യസഭയില് എല്ലാ അംഗങ്ങളുടേയും സാന്നിധ്യം ഉറപ്പിക്കുകയാണ് മോഡി ലക്ഷ്യമിടുന്നത്. നടപ്പു സമ്മേളനത്തില് നിരവധി ബില്ലുകള് രാജ്യസഭയില് അവതരിപ്പിക്കാനിരിക്കെ ഇനിയും ഇത്തരമൊരു സാഹചര്യത്തെ തള്ളിക്കളയാനാവില്ല. ബിജെപിയുടെ 46 അംഗങ്ങള്ക്കു പുറമെ ടിഡിപിയുടെ ആറ്, ശിവസേന, ശിരോമണി അകാലിദള് എന്നിവരുടെ മൂന്നു വീതം അംഗങ്ങളും, പിഡിപിയുടെ രണ്ട് അംഗങ്ങളും ചെറുപാര്ട്ടികളുടെ ഓരോന്ന് വീതം അംഗങ്ങളുമാണ് രാജ്യസഭയില് എന് ഡി എയുടെ ശക്തി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
