ജപ്പാനില്‍ പിടിച്ചിട്ട ആഡംബരകപ്പലില്‍ നിന്ന് തങ്ങളെ രക്ഷിക്കണമെന്ന അഭ്യര്‍ത്ഥനയുമായി ഇന്ത്യക്കാരായ ജീവനക്കാര്‍. കൊറോണ വൈറസ് ബാധയെതുടര്‍ന്ന് തിങ്കളാഴ്ച നടത്തിയ പരിശോധനയില്‍ കപ്പലിലെ 66 പേര്‍ക്ക് വൈറസ് ബാധ സ്ഥിരീകരിച്ചിരുന്നു. 160 ഇന്ത്യന്‍ ജീവനക്കാരണ് കപ്പലിലുള്ളത്. യാത്രക്കാരില്‍ ചിലര്‍ക്ക് കൊറോണ വൈറസ് ബാധ സ്ഥിരീകരിച്ചതോടെയാണ് ഫെബ്രുവരി അഞ്ച് മുതല്‍ കപ്പല്‍ ജപ്പാനിലെ യൊക്കോഹാമ തീരത്ത് പിടിച്ചിട്ടത്. കപ്പലിലെ 3700 ലധികം വരുന്ന യാത്രക്കാര്‍ രണ്ടാഴ്ചയായി നിരീക്ഷണത്തില്‍ തുടരുകയാണ്.

കപ്പലില്‍ പാചകക്കാരനായി ജോലി ചെയ്യുന്ന ബംഗാള്‍ സ്വദേശി ബിനി കുമാര്‍ സര്‍ക്കാര്‍ തങ്ങളെ സഹായിക്കണമെന്നും ഭീതിയിലാണെന്നുമുള്ള അഭ്യര്‍ത്ഥനയുമായി സോഷ്യല്‍മീഡിയ വഴി രംഗത്തെത്തിയിരുന്നു. കപ്പലില്‍ വെച്ച് ചിത്രീകരിച്ച വീഡിയോയില്‍, തങ്ങളെ രക്ഷപ്പെടുത്തണമെന്ന് ബിനികുമാര്‍ അഭ്യര്‍ത്ഥിച്ചു. തങ്ങളെ പരിശോധിച്ചിട്ടില്ലെന്നും ബിനികുമാര്‍ വ്യക്തമാക്കി. ബിനി കുമാറിനോടൊപ്പം ഇന്ത്യക്കാരായ അഞ്ച് സഹപ്രവര്‍ത്തകരെയും വീഡിയോയില്‍ കാണാം. മാക്‌സ് ധരിച്ചാണ് എല്ലാവരും വീഡിയോയില്‍ പ്രത്യക്ഷപ്പെട്ടിരിക്കുന്നത്. വീഡിയോ എന്‍.ഡി.ടിവി പുറത്തുവിട്ടു. കഴിയുന്നതും വേഗം ഞങ്ങളെ രക്ഷിക്കൂ. ഞങ്ങള്‍ക്ക് എന്തെങ്കിലും സംഭവിച്ചാല്‍ പിന്നെ എന്താണ് പ്രയോജനം. എനിക്ക് ഇന്ത്യന്‍ സര്‍ക്കാരിനോട് പറയാനുള്ളത് ഇതാണ്. മോദിജി, ദയവായി ഞങ്ങളെ കപ്പലില്‍ നിന്ന് രക്ഷപ്പെടുത്തി സുരക്ഷിതമായി നാട്ടിലേക്ക് എത്തിക്കുക''അദ്ദേഹം പറഞ്ഞു.