വിവാഹം കഴിഞ്ഞ് അടുത്ത ദിവസം തന്നെ വരന്റെ വരന്റെ വിലപിടിപ്പുള്ള വസ്തുക്കളുമായി മുങ്ങിയ സ്ത്രീയെ പോലീസ് അറസ്റ്റ് ചെയ്തു. 

അവിവാഹിതയാണെന്ന് തെറ്റിദ്ധരിപ്പിച്ചാണ് വിവാഹം നടത്തിയത്. സ്ത്രീക്ക് രണ്ട് മക്കളും ഉണ്ടെന്ന് അന്വേഷണത്തില്‍ കണ്ടെത്തി. ഇന്ത്യന്‍ ശിക്ഷാ നിയമം 406 (ക്രിമിനല്‍ വിശ്വാസലംഘനം), 420 (വഞ്ചന) എന്നീ വകുപ്പുകള്‍ പ്രകാരമാണ് ക്രാന്തി ചൗക്ക് പോലീസ് സ്ത്രീയ്‌ക്കെതിരെ കേസെടുത്തിരിക്കുന്നത് . അവരുടെ രണ്ട് കൂട്ടാളികള്‍ക്കായി പോലീസ് തെരച്ചില്‍ ആരംഭിച്ചു, അവരില്‍ ഒരാള്‍ വനിതാ മാട്രിമോണിയല്‍ ഏജന്റാണ്.
സംഭവത്തെ കുറിച്ച് പോലീസ് പറയുന്നതിങ്ങനെ: ജല്‍ഗാവ് ജില്ല സ്വദേശിയായ ശ്രീറാം വീരഭന്‍ പാട്ടീല്‍ അനുയോജ്യമായ ഒരു വിവാഹാലോചന തേടുകയായിരുന്നുവെന്ന് പോലീസ് പറഞ്ഞു. ഒരു മാട്രോമോണിയല്‍ ഏജന്റായി സ്വയം പരിചയപ്പെടുത്തിയ ഈ സ്ത്രീയെ അയാള്‍ കണ്ടു, എളിയ പശ്ചാത്തലത്തില്‍ നിന്ന് അനുയോജ്യമായ ഒരു മണവാട്ടിയെ കണ്ടെത്താന്‍ സഹായിക്കുമെന്ന് ഉറപ്പ് നല്‍കി.
എല്ലാ വിവാഹച്ചെലവുകളും പാട്ടീല്‍ വഹിക്കണമെന്ന് ഏജന്റ് അറിയിച്ചു. തുടര്‍ന്ന് ജനുവരി 30 ന് ജല്‍ഗാവില്‍ വച്ച് വിവാഹം നിശ്ചയിച്ചു. വനിതാ ഏജന്റും പുരുഷ കൂട്ടാളിയും പാട്ടീലിന് അനുയോജ്യമായ വധുവിനെ കണ്ടെത്തിയതിന് ഒരു ലക്ഷം രൂപ വാങ്ങിയതായാണ് റിപ്പോര്‍ട്ട്.
വിവാഹത്തിന്റെ അടുത്ത ദിവസം തന്നെ, അമ്മയ്ക്ക് സുഖമില്ലെന്ന് പാട്ടീലിന്റെ ഭാര്യ അറിയിച്ചു. അതനുസരിച്ച്, യുവതിയുടെ ജന്മനാട്ടിലേക്കുള്ള ബസ് പിടിക്കാനായി പാട്ടീലും ഭാര്യയും ഔറംഗബാദിലെ സെന്‍ട്രല്‍ ബസ് സ്റ്റാന്‍ഡിലെത്തി. വിവാഹ സമയത്ത് പാട്ടീല്‍ നല്‍കിയ സ്വര്‍ണ്ണാഭരണങ്ങളാണ് യുവതി ധരിച്ചിരുന്നത്.
തുടര്‍ന്ന് ബാത്ത്‌റൂമില്‍ പോകുന്നുവെന്ന വ്യാജേന യുവതി മുങ്ങുകയായിരുന്നു. ഭാര്യ തിരിച്ചെത്താതായപ്പോള്‍ അയാള്‍ അവളെ അന്വേഷിക്കാന്‍ തുടങ്ങി, പക്ഷേ വെറുതെയായി. ഭാര്യയെ കാണാതായതില്‍ ആശങ്കപ്പെട്ട പാട്ടീല്‍ ക്രാന്തി ചൌക്ക് പോലീസ് സ്‌റ്റേഷനില്‍ പരാതി നല്‍കി.
തുടര്‍ന്ന് പോലീസ് നടത്തിയ അന്വേഷണത്തില്‍ യുവതി സ്വദേശത്തക്ക് മടങ്ങിയതായി കണ്ടെത്തി. പ്രാഥമിക അന്വേഷണത്തില്‍ യുവതി വിവാഹിത മാത്രമല്ല രണ്ട് കുട്ടികളുടെ അമ്മയുമായിരുന്നുവെന്ന് വ്യക്തമായി. പാട്ടീലിനെ കബളിപ്പിച്ചതുപോലെയുള്ള ആളുകളെ വഞ്ചിക്കുന്ന ഒരു റാക്കറ്റിന്റെ ഭാഗമായിരുന്നു അവര്‍. അറസ്റ്റിനെക്കുറിച്ച് അറിഞ്ഞയുടനെ യുവതിയുടെ കൂട്ടാളികള്‍ ഒളിവില്‍ പോയതായി പോലീസ് പറഞ്ഞു.
പാട്ടീലില്‍ നിന്ന് ഓടി രക്ഷപ്പെടുന്നതിനിടെ യുവതി എടുത്ത സ്വര്‍ണാഭരണങ്ങളും പണവും പോലീസ് കണ്ടെടുത്തു.