റണ്വേയിലൂടെ അതിവേഗത്തില് വിമാനം കുതിക്കവേ അപ്രതീക്ഷിതമായി പൈലറ്റ് കണ്ടത് മുന്നില് ജീപ്പും ഒരാളും... കൂട്ടിയിടിക്കാതിരിക്കാന് പൊടുന്നനെ വിമാനം പറത്തിയപ്പോള് വാലറ്റം നിലത്തുതട്ടി, ഒടുവില്...
അപ്രതീക്ഷിതമായി റണ്വേയിലേക്കുവന്ന ജീപ്പുമായി കൂട്ടിയിടിക്കുന്നത് ഒഴിവാക്കാന് പൊടുന്നനെ പറന്നുയര്ന്ന എയര് ഇന്ത്യാ വിമാനത്തിന് നിലത്തുരഞ്ഞ് കേടുപാടുപറ്റി. വലിയ അപകടത്തില്നിന്ന് രക്ഷപ്പെട്ട വിമാനം സുരക്ഷിതമായി ലക്ഷ്യത്തിലെത്തി. ശനിയാഴ്ച രാവിലെ പുണെയില്നിന്ന് ഡല്ഹിക്കു തിരിച്ച എയര്ബസ് എ 321 വിമാനം പറന്നുയരാന് ഒരുങ്ങുമ്പോഴാണ് സംഭവം. റണ്വേയിലൂടെ 222 കിലോമീറ്റര് വേഗത്തില് കുതിക്കുമ്പോഴാണ് മുന്നില് ഒരു ജീപ്പും ഒരാളും നില്ക്കുന്നത് പൈലറ്റുമാരുടെ ശ്രദ്ധയില്പ്പെട്ടത്.
കൂട്ടിയിടിക്കുന്നത് ഒഴിവാക്കാന് റണ്വേയുടെ അറ്റത്ത് എത്തുന്നതിനു മുമ്പുതന്നെ വിമാനം മുകളിലേക്കെടുക്കാന് പൈലറ്റുമാര് തീരുമാനിച്ചു. പൊടുന്നനെ പറന്നുയര്ന്നപ്പോള് വിമാനത്തിന്റെ വാലറ്റം നിലത്തുതട്ടി. ഉടല്ഭാഗം നിലത്തുരഞ്ഞ് കേടുപറ്റുകയുംചെയ്തു. എങ്കിലും 180 യാത്രക്കാരുമായി സുരക്ഷിതമായി ഡല്ഹി വിമാനത്താവളത്തിലിറങ്ങാന് കഴിഞ്ഞു. കേടുപറ്റിയ വിമാനത്തെ പരിശോധനയ്ക്കും അറ്റകുറ്റപ്പണിക്കുമായി മാറ്റിയിരിക്കുകയാണ്. പുറംപാളിക്കുമാത്രമേ കേടുള്ളൂ എന്നാണ് അറിയുന്നത്. സംഭവത്തെക്കുറിച്ച് ഡയറക്ടര് ജനറല് ഓഫ് സിവില് ഏവിയേഷന് അധികൃതര് അന്വേഷണം തുടങ്ങിയിട്ടുണ്ട്.
വിമാനത്തിന്റെ കോക്പിറ്റ് വോയ്സ് റെക്കോഡര് അഴിച്ചെടുത്ത് പരിശോധിക്കുന്നുണ്ട്. എയര് ട്രാഫിക് കണ്ട്രോളിലെ രേഖകള് സൂക്ഷിച്ചുവെക്കാന് വ്യോമസേനയ്ക്ക് നിര്ദേശം നല്കിയിട്ടുണ്ട്. പുണെ വിമാനത്താവളം വ്യോമസേനയുടെ എയര് സ്ട്രിപ്പുകൂടിയായി ഉപയോഗിക്കുന്നുണ്ടെന്നതുകൊണ്ട് എയര് ട്രാഫിക് കണ്ട്രോളിന്റെ നിയന്ത്രണം വ്യോമസേനയ്ക്കാണ്. വിമാനം പറന്നുയരുന്ന സമയത്ത് ആളുകളോ മറ്റുവാഹനങ്ങളോ റണ്വേയിലുണ്ടാകാന് പാടില്ലെന്നാണ് ചട്ടം. അതിവേഗത്തില് കുതിക്കുന്ന വിമാനം റണ്വേയിലുള്ള തടസ്സങ്ങളില് തട്ടിയാല് തകര്ന്നുപോകാനുള്ള സാധ്യത കൂടുതലാണ്. അതൊഴിവാക്കാനാണ് റണ്വേയുടെ അറ്റത്ത് എത്തുന്നതിനുമുമ്പുതന്നെ പൈലറ്റുമാര് വിമാനം മുകളിലേക്ക് ഉയര്ത്തിയത്.
https://www.facebook.com/Malayalivartha
