‘ഇന്ത്യൻ 2’ ചിത്രീകരണത്തിനിടെ അപകടത്തിൽപ്പെട്ട ക്രയിനിന്റെ ഡ്രൈവർ ഒളിവിൽ
‘ഇന്ത്യൻ 2’ ചിത്രീകരണത്തിനിടെ അപകടത്തിൽപ്പെട്ട ക്രയിനിന്റെ ഡ്രൈവർ ഒളിവിൽ. കമൽ ഹാസൻ നായകനായ ‘ഇന്ത്യൻ 2’ ചിത്രീകരണത്തിനിടെയായിരുന്നു അപകടമുണ്ടായതും 3 പേർ മരിച്ചതും. സിനിമാ മേഖലയിലെ താഴെ തട്ടിൽ പ്രവർത്തിക്കുന്ന തൊഴിലാളികൾക്കു സുരക്ഷ ഉറപ്പാക്കണമെന്നു കമൽ ഹാസൻ പറഞ്ഞിരുന്നു. ഈ ആവശ്യം ഉയർന്നതോടെ ഇതുമായി ബന്ധപ്പെട്ട ചർച്ചകളും സജീവമായി. ഇതിനിടെ, അപകടവുമായി ബന്ധപ്പെട്ട് ക്രെയിൻ ഓപ്പറേറ്റർ രാജനെതിരെയും നിർമാതാക്കളായ ലയ്ക പ്രൊഡക്ഷൻസിനെതിരെയും പൊലീസ് കേസെടുക്കുകയും ചെയ്തു.
എന്നാൽ ഓപ്പറേറ്റർ ഇപ്പോൾ ഒളിവിലാണ്. പരുക്കേറ്റു കിൽപോക് മെഡിക്കൽ കോളജിൽ ചികിൽസയിലുള്ള 9 പേരുടെ നില ഗുരുതരമല്ല. അസിസ്റ്റന്റ് ഡയറക്ടർ കൃഷ്ണ, ആർട് അസിസ്റ്റന്റ് ചന്ദ്രൻ, പ്രൊഡക്ഷൻ അസിസ്റ്റന്റ് മധു എന്നിവരാണ് അപകടത്തിൽ കൊല്ലപ്പെട്ടത്. നസ്രത്ത്പെട്ടിലെ ഇവിപി ഫിലിം സിറ്റിയിൽ ചിത്രീകരണത്തിനിടെ ലൈറ്റിങ് ഒരുക്കുമ്പോഴായിരുന്നു അപകടം സംഭവിച്ചത്. ബുധനാഴ്ച രാത്രിയായിരുന്നു അപകടം നടന്നത്. 150 അടി ഉയരമുള്ള ക്രെയിനിന്റെ മുകളിൽനിന്നും കൂറ്റൻ ലൈറ്റ് ഉൾപ്പെടെ ക്രെയിനിന്റെ ഒരു ഭാഗം താഴെയുള്ള ടെന്റിനു മുകളിലേക്കു വീഴുകയായിരുന്നു. സംഭവ സമയത്തു സംവിധായകൻ ഷങ്കർ ടെന്റിനു തൊട്ടടുത്ത് തന്നെ ഉണ്ടായിരുന്നു . എന്നാൽ അദ്ദേഹത്തിനു പരുക്കില്ല. കമൽ ഹാസനും നായിക കാജൽ അഗർവാളുമുൾപ്പെടെയുള്ളവർ മീറ്ററുകൾ മാത്രം അകലെ മോണിറ്ററിനു മുന്നിലായിരുന്നു.
https://www.facebook.com/Malayalivartha