പ്രിയങ്ക ​ഗാന്ധിയെ വിമർശിച്ച് കേന്ദ്രമന്ത്രി സ്മൃതി ഇറാനി രംഗത്ത്. പാർട്ടിയിൽ സ്ഥാനം ഉറപ്പാക്കാൻ വേണ്ടിയാണ് പ്രിയങ്ക ​ഗാന്ധി വദ്ര പതിവായി ഉത്തർപ്രദേശിന്‍റെ കാര്യത്തില്‍ അമിത താത്പര്യം പ്രകടിപ്പിക്കുന്നതെന്ന് സ്മൃതി ഇറാനി പറഞ്ഞു. ''സ്വന്തം പാർട്ടിയായ കോൺ​ഗ്രസിൽ മാത്രമാണ് പ്രിയങ്ക ​ഗാന്ധി സജീവമായിട്ടുള്ളത്. കാരണം സ്വന്തം പാർട്ടിയിൽ സ്ഥാനം നേടാൻ വേണ്ടിയാണ് അവർ പ്രവർത്തിക്കുന്നതെന്നും അവർ വ്യക്തമാക്കി.'' ലക്നൗവിലെ ഹിന്ദുസ്ഥാൻ സമാ​ഗം പരിപാടിയിൽ പങ്കെടുത്ത് സംസാരിക്കവെയായിരുന്നു സ്മൃതി ഇറാനി ഈ കാര്യം പറഞ്ഞത്. കഴിഞ്ഞ ജനുവരിയിലായിരുന്നു പ്രിയങ്ക ​ഗാന്ധി കോൺ​ഗ്രസ് പാർട്ടിയിലെ ഔദ്യോ​ഗിക സ്ഥാനം ഏറ്റെടുത്തത്.

എന്നാൽ പൊതുതെരഞ്ഞെടുപ്പിൽ കോൺ​ഗ്രസ് പാർട്ടിക്കേറ്റ പ്രഹരം തടയാൻ പ്രിയങ്ക ​ഗാന്ധിക്ക് സാധിച്ചില്ല. സഹോദരനും മുൻ കോൺ​ഗ്രസ് പ്രസിഡന്റുമായിരുന്ന രാഹുൽ ​ഗാന്ധി അമേഠിയിൽ പരാജയപ്പെടുകയും ചെയ്തു . പിന്നീട് ദില്ലി തെരഞ്ഞെടുപ്പിലും കോൺ​ഗ്രസിന് നേട്ടമൊന്നും സംഭവിച്ചില്ല. ദില്ലി ഇലക്ഷനിലെ പരാജയത്തിന് ശേഷമാണ് കോൺ​ഗ്രസിന് വേണ്ടി പോരാടാനുള്ള സമയമാണിതെന്ന് പ്രിയങ്ക ​ഗാന്ധി അം​ഗീകരിച്ചത്.