ദേശീയ ഗാനത്തെ അനാദരിച്ച ടി.ഡി.പി എം.എല്‍.എമാരെ തെലങ്കാന സഭാ സമ്മേളനത്തില്‍ നിന്ന് സസ്‌പെന്‍ഡ് ചെയ്തു
ദേശീയ ഗാനത്തെ അനാദരിച്ചതിനെ തുടര്‍ന്ന് തെലുങ്കാനയിലെ പ്രതിപക്ഷ കക്ഷിയായ തെലുങ്കുദേശം പാര്‍ട്ടിയിലെ എം.എല്‍.എമാരെ നിയമസഭയുടെ ബഡ്ജറ്റ് സമ്മേളനത്തില്‍ പങ്കെടുക്കുന്നതില്‍ നിന്ന് സ്പീക്കര്‍ സസ്‌പെന്‍ഡ് ചെയ്തു. സസ്‌പെന്‍ഡ് ചെയ്യപ്പെട്ടിട്ടും സഭയില്‍ നിന്ന് പുറത്തു പോകാന്‍ കൂട്ടാക്കാതിരുന്ന എം.എല്‍.എമാരെ മാര്‍ഷലുകള്‍ എത്തി പുറത്താക്കി.
നിയമസഭാ സമ്മേളനം ആരംഭിച്ച ശനിയാഴ്ചയാണ് സംഭവം നടന്നത്. ഗവര്‍ണര്‍ ഇ.എസ്.എല്‍ നരസിംഹന്‍ നയപ്രഖ്യാപന പ്രസംഗം തുടങ്ങുന്നതിന് മുന്പും അവസാനവും ദേശീയഗാനം പാടിയിരുന്നു. ഇതിനിടെ ടി.ഡി.പി എം.എല്‍.എമാര്‍ ബഹളം വയ്ക്കുകയും സ്പീക്കറുടെ ചെയറിനു നേരെ പേപ്പറുകള്‍ ചുരുട്ടി എറിയുകയായിരുന്നു. ടി.ആര്‍.എസ് സര്‍ക്കാര്‍ കൂറുമാറ്റം പ്രോത്സാഹിപ്പിക്കുകയാണെന്ന് ആരോപിച്ച് പ്‌ളക്കാര്‍ഡുകളും ടി.ഡി.പി എം.എല്‍.എമാര്‍ ഉയര്‍ത്തിക്കാട്ടി. ഇതാണ് നടപടിക്ക് കാരണമായത്.
അതേസമയം എം.എല്‍.എമാര്‍ക്കെതിരായ നടപടി പുന:പരിശോധിക്കണമെന്ന് പ്രതിപക്ഷ നേതാവ് കെ.ജനറെഡ്ഡിയും ബി.ജെ.പി നിയമസഭാകക്ഷി നേതാവ് കെ.ലക്ഷ്മണും സ്പീക്കറോട് അഭ്യര്‍ത്ഥിച്ചിരുന്നു. ടി.ഡി.പിയുടെ കക്ഷി നേതാവ് ദയാകര്‍ റാവുവിനെ സംസാരിക്കാന്‍ സ്പീക്കര്‍ അനുവദിച്ചെങ്കിലും അദ്ദേഹം അവസരം പ്രയോജനപ്പെടുത്തിയില്ലെന്ന് നിയമസഭാ കാര്യങ്ങളുടെ ചുമതലയുള്ള മന്ത്രി ഹരീഷ് റാവു ചൂണ്ടിക്കാട്ടി
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
