ലോക്ഡൗണുകള്‍ രാജ്യത്തിന്റെ സാമ്പത്തിക പ്രക്രിയയെ നേരിട്ടു ബാധിക്കുമെന്നും കൊറോണ വൈറസ് മഹാമാരി രാജ്യത്തിന്റെ ഭാവിയെ പ്രതികൂലമായി ബാധിക്കുമെന്നും റിസര്‍വ് ബാങ്ക് ഓഫ് ഇന്ത്യയുടെ മുന്നറിയിപ്പ്.

ലോകം സാമ്പത്തികമാന്ദ്യത്തിലേക്കു പോകാന്‍ സാധ്യതയുണ്ടെന്നും റിസര്‍വ് ബാങ്ക് മുന്നറിയിപ്പു നല്‍കുന്നുണ്ട്. രാജ്യാന്തര ഉത്പാദനം, വിതരണം, വ്യാപാരം, ടൂറിസം എന്നീ മേഖലകളില്‍ ഉണ്ടായിട്ടുള്ള അസ്ഥിരത ചെറുകിട സാമ്പത്തിക രംഗത്തെ ഇരുളടഞ്ഞതാക്കുമെന്ന് ധനനയ റിപ്പോര്‍ട്ടില്‍ ആര്‍ബിഐ ചൂണ്ടിക്കാട്ടുന്നു. രാജ്യത്തിന്റെ വളര്‍ച്ചാനിരക്കിനെയും ഇതു ബാധിക്കും.

കോവിഡ് പ്രതിരോധത്തിനായി രാജ്യത്ത് ഏര്‍പ്പെടുത്തിയ 21 ദിവസത്തെ ലോക്ഡൗണ്‍ 16-ാം ദിവസത്തിലേക്ക് കടക്കുമ്പോഴാണ് രാജ്യത്തിന്റെ ഭാവിയെക്കുറിച്ച് ആശങ്കപ്പെടുത്തുന്ന റിപ്പോര്‍ട്ട് ആര്‍ബിഐ പുറത്തുവിട്ടത്. സാമ്പത്തിക രംഗത്തെ രാജ്യത്തിന്റെ തിരിച്ചുവരവിനെ കുറിച്ചുള്ള കാഴ്ചപ്പാട് തന്നെ കോവിഡ് വ്യാപനത്തോടെ മാറിമറിയും. കോവിഡിന്റെ തീവ്രതയും വ്യാപനവും കാലദൈര്‍ഘ്യവും വിലയിരുത്തുകയാണെന്നും ആര്‍ബിഐ അറിയിച്ചു.

ലോകമെമ്പാടും ലോക്ഡൗണ്‍ തുടരുന്ന സാഹചര്യത്തില്‍ വിതരണശൃംഖല തകരാറിലാകാനും ആളുകള്‍ സാധനങ്ങള്‍ വാങ്ങിക്കൂട്ടുന്ന സ്ഥിതിവിശേഷം ഉടലെടുക്കാനും സാധ്യതയുണ്ടെന്നും സാമ്പത്തികവിദഗ്ധര്‍ ചൂണ്ടിക്കാട്ടുന്നു. 2019-20 സാമ്പത്തിക വര്‍ഷത്തിന്റെ നാലാം പാദത്തില്‍ വിലക്കയറ്റം 6.7 ശതമാനമാകും. 2021 ജനുവരി-മാര്‍ച്ചില്‍ 3.2 ശതമാനം വര്‍ധനയും ആര്‍ബിഐ പ്രവചിക്കുന്നു. ഭക്ഷ്യവസ്തുക്കള്‍ക്കു വിലകുറയാനും ഭക്ഷ്യേതര ഉത്പന്നങ്ങള്‍ക്കു വില കൂടാനുമാണ് സാധ്യത.