തെക്കൻ കടലിൽ രൂപപ്പെട്ട പുതിയ കാലാവസ്ഥാ വ്യതിയാനം വരും ദിവസങ്ങളിൽ കേരളത്തിൽ മഴയെത്തിക്കുമെന്ന് കാലാവസ്ഥാ നിരീക്ഷണ കേന്ദ്രം അറിയിക്കുന്നു. നിലവിൽ കടലിൽ ചുറ്റിത്തിരിയുന്ന ഈ സിസ്റ്റം കരയിലേക്ക് പ്രവേശിക്കാതെ സമുദ്രത്തിൽ വെച്ച് തന്നെ ശക്തികുറഞ്ഞ് ഇല്ലാതാകാനാണ് സാധ്യതയെങ്കിലും, ഇതിന്റെ ഫലമായി സംസ്ഥാനത്തുടനീളം മഴ ലഭിച്ചേക്കും. കഴിഞ്ഞ ചൊവ്വാഴ്ച മുതൽ തന്നെ വയനാട് ഉൾപ്പെടെയുള്ള മലയോര ജില്ലകളിൽ ഇടിമിന്നലോട് കൂടിയ മഴ ആരംഭിച്ചിട്ടുണ്ട്.

കഴിഞ്ഞ ദിവസങ്ങളിൽ കോഴിക്കോട് തിരുവമ്പാടിയിലും, കോട്ടയം, പത്തനംതിട്ട ജില്ലകളുടെ വിവിധ ഭാഗങ്ങളിലും വേനൽമഴയ്ക്ക് സമാനമായ മഴ ലഭിച്ചിരുന്നു. അടുത്ത രണ്ട് ദിവസങ്ങളിൽ സംസ്ഥാനത്തിന്റെ വിവിധ ഭാഗങ്ങളിൽ ഒറ്റപ്പെട്ട മഴ തുടരാൻ സാധ്യതയുണ്ട്. വരും ദിവസങ്ങളിൽ മഴ കൂടുതൽ ഇടങ്ങളിലേക്ക് വ്യാപിക്കുമെന്നാണ് പ്രവചനം. ഉച്ചയ്ക്ക് ശേഷമുള്ള ഇടിമിന്നലിന് സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്നും നിർദ്ദേശമുണ്ട്.