വിദ്യാർഥി വിസയിൽ യുകെയിലെത്തിയ മലയാളി യുവാവിനെ താമസസ്ഥലത്ത് മരിച്ച നിലയിൽ കണ്ടെത്തി. കൊല്ലം ജില്ലയിലെ കൊട്ടിയം സ്വദേശി ശ്രീരാജ് (26) ആണ് വിടപറഞ്ഞത്.

ലിവർപൂൾ വിമൻസ് ഹോസ്പിറ്റലിലെ ക്ലെറിക്കൽ വിഭാഗത്തിൽ താൽക്കാലിക ജീവനക്കാരനായി ജോലി ചെയ്തു വരികയായിരുന്നു. കഴിഞ്ഞ രണ്ട് ദിവസമായി ഫോണിൽ കിട്ടാതായതോടെ ആശങ്കയിലായ സുഹൃത്തുക്കൾ വിവരമറിയിച്ചതിനെ തുടർന്ന് പൊലീസ് അപ്പാർട്മെന്റിൽ എത്തി പരിശോധിച്ചപ്പോൾ മുറിക്കുള്ളിൽ മരിച്ച നിലയിൽ ശ്രീരാജിനെ കണ്ടെത്തുകയായിരുന്നു.

ലിവർപൂൾ യൂണിവേഴ്സിറ്റിയിൽ മെക്കാനിക് എൻജിനീയറിങ് പഠനത്തിനായി വിദ്യാർഥി വീസയിൽ എത്തിയ ശ്രീരാജ് പഠനത്തോടൊപ്പം താൽക്കാലിക ജീവനക്കാരനായും ജോലി ചെയ്തു വരികയായിരുന്നു. മൃതദേഹം നിലവിൽ മേഴ്സിസൈഡ് പൊലീസ് ഇൻക്വസ്റ്റ് നടപടികൾ പൂർത്തിയാക്കി മോർച്ചറിയിലേക്ക് മാറ്റി.