പകൽ സമയത്ത് സംസ്ഥാനത്ത് അതികഠിനമായ ചൂട് തുടരുന്നതിനിടയിൽ ആശ്വാസവാർത്തയുമായി കാലാവസ്ഥാ നിരീക്ഷണ കേന്ദ്രം. ബംഗാൾ ഉൾക്കടലിൽ ന്യൂനമർദ്ദം ശക്തിപ്രാപിക്കുന്നതോടെ സംസ്ഥാനത്തെ വിവിധ ജില്ലകളിൽ മഴയെത്തുമെന്നാണ് പുതിയ അറിയിപ്പ്. അടുത്ത മണിക്കൂറുകളിൽ ആലപ്പുഴ ജില്ലയിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് വ്യക്തമാക്കി.

ന്യൂനമർദ്ദവും ചക്രവാതച്ചുഴിയും: ഭൂമധ്യരേഖാ പ്രദേശത്തുള്ള ഇന്ത്യൻ മഹാസമുദ്രത്തിനും തെക്ക് പടിഞ്ഞാറൻ ബംഗാൾ ഉൾക്കടലിനും മുകളിലായി നിലനിന്നിരുന്ന ന്യൂനമർദ്ദം നിലവിൽ ചക്രവാതച്ചുഴിയായി ശക്തി കുറഞ്ഞിട്ടുണ്ട്. ഇത് അടുത്ത 24 മണിക്കൂറിനുള്ളിൽ ശ്രീലങ്കൻ ഭാഗത്തേക്ക് നീങ്ങാൻ സാധ്യതയുണ്ട്. എന്നാൽ, തെക്ക് കിഴക്കൻ ബംഗാൾ ഉൾക്കടലിൽ രൂപപ്പെട്ട മറ്റൊരു ചക്രവാതച്ചുഴി അടുത്ത 48 മണിക്കൂറിനുള്ളിൽ പുതിയ ന്യൂനമർദ്ദമായി ശക്തി പ്രാപിക്കും. ഇതിന്റെ സ്വാധീനത്താലാണ് കേരളത്തിൽ മഴ സജീവമാകുന്നത്.