രാഷ്ട്രപതിഭവനില്‍ ഒരു ശുചീകരണ തൊഴലാളിക്ക് കോവിഡ്. ഈ സാഹചര്യത്തില്‍ രാഷ്ട്രപതി ഭവനിലെ നൂറോളം പേരെ ക്വാറന്റീന്‍ ചെയ്തതായി റിപ്പോര്‍ട്ട്. നാലു ദിവസം മുമ്പാണ് ഇവിടെ ജോലി ചെയ്യുന്ന തൊഴിലാളിക്ക് കോവിഡ് സ്ഥിരീകരിച്ചത്. ഇതേത്തുടര്‍ന്ന് സെക്രട്ടറി തലത്തിലുള്ള ഉദ്യോഗസ്ഥരോടും അവരുടെ കുടുബാംഗങ്ങളോടും വീടുകളില്‍ ക്വാറന്റീനില്‍ കഴിയാന്‍ ആവശ്യപ്പെട്ടു. എന്നാല്‍ മറ്റു തൊഴിലാളികളെ സെന്‍ട്രല്‍ ഡല്‍ഹിയില്‍ ക്വാറന്റീന്‍ സൗകര്യം ഒരുക്കി അവിടേക്കു മാറ്റി. ശുചീകരണ തൊഴിലാളികള്‍ ഒഴികെയുള്ളവരുടെ ഫലം നെഗറ്റീവ് ആണെന്നാണു വിവരം. രാജ്യത്ത് ഇന്ന് കോവിഡ് രോഗികളുടെ എണ്ണം 18,601 ആയതായി കേന്ദ്ര ആരോഗ്യ മന്ത്രാലയം അറിയിച്ചു. 590 പേരാണ് ഇതുവരെ മരിച്ചത്. 2000 പേര്‍ക്ക് കോവിഡ് സ്ഥിരീകരിച്ച ഡല്‍ഹിയിലാണ് മഹാരാഷ്ട്ര കഴിഞ്ഞാല്‍ ഏറ്റവും കൂടുതല്‍ രോഗികള്‍.

ജില്ലയില്‍ രോഗം വലിയ ഭീഷണി പരത്തുന്ന ഈ സാഹചര്യത്തിലും ദില്ലി-ഗാസിയാബാദ് അതിത്തിയില്‍ ഇന്ന് വാഹനങ്ങളുടെ നീണ്ട നിരയാണ് പ്രത്യക്ഷമായത്. ഇതേ തുടര്‍ന്ന് ഇവിടെ ഗതാഗതം താത്കാലികമായി നിര്‍ത്തിവച്ചു. അവശ്യ സേവനങ്ങള്‍ക്ക് പോകുന്നവരേയും പാസ് ഉള്ളവരേയും മാത്രമേ കടത്തി വിടൂ എന്നാണ് ദില്ലി പൊലീസ് അറിയിക്കുന്നത്. അതിനിടെ ദില്ലിയില്‍ മൂന്ന് പോലീസ് ഉദ്യോഗസ്ഥര്‍ക്ക് കൂടി കോവിഡ് സ്ഥിരീകരിച്ചു. നബി കരിം മേഖലയിലെ പോലീസ് ഉദ്യോഗസ്ഥര്‍ക്ക് ആണ് രോഗം സ്ഥിരീകരിച്ചത്. ദില്ലിയിലെ അതിതീവ്ര രോഗബാധിതമേഖലകളില്‍ ഒന്നാണ് നബി കരീം. രോഗവ്യാപനം ശക്തമായതിനാല്‍ ദില്ലിയിലെ മാധ്യമപ്രവത്തകര്‍ക്കും കൊവിഡ് പരിശോധന നടത്തുമെന്ന് ദില്ലി മുഖ്യമന്ത്രി അരവിന്ദ് കെജ്രിവാള്‍ അറിയിച്ചു.

അതേസമയം രാജ്യത്ത് കോവിഡ് ബാധിച്ചവരുടെ എണ്ണം പതിനേഴായിരത്തി അറുന്നൂറ്റി അമ്പത്തിയാറായി. മരണം 559 ആണ്. ഡല്‍ഹിയില്‍ 5 മേഖലകള്‍ കൂടി തീവ്രബാധിത മേഖലയായി പ്രഖ്യാപിച്ചു. ഇതോടെ ഹോട്സ്പോട്ടുകളുടെ എണ്ണം 84 ആയി. കോവിഡ് സ്ഥീരീകരിച്ചിരുന്ന പീത്സ വിതരണം ചെയ്യുന്ന യുവാവിന്റെ പുതിയ പരിശോധനാഫലം നെഗറ്റീവ് ആണ്. 93 പുതിയ കേസുകള്‍ കൂടി സ്ഥിരീകരിച്ചതോടെ ഗുജറാത്തില്‍ കോവിഡ് ബാധിതരുടെ എണ്ണം 1939 ആയി.

ഡല്‍ഹിയിലെ ആദ്യ പ്ലാസ്മ തെറപ്പി വിജയകരമെന്ന് മാക്സ് ആശുപത്രി അധികൃതര്‍ അറിയിച്ചു. അതേസമയം പട്പട്ഗഞ്ച് മാക്സ് ആശുപത്രിയിലെ 5 മലയാളി നഴ്സുമാര്‍ക്ക് കൂടി കോവിഡ് സ്ഥിരീകരിച്ചു. മൂന്ന് മലയാളി നഴ്സുമാര്‍ക്ക് നേരത്തെ ഇവിടെ കോവിഡ് സ്ഥിരീകരിച്ചിരുന്നു.