മധ്യപ്രദേശില് ആദ്യ മന്ത്രിസഭാ വികസനം; അഞ്ച് മന്ത്രിമാര് സത്യപ്രതിജ്ഞ ചെയ്തു; സത്യപ്രതിജ്ഞ ചെയ്തത് കോണ്ഗ്രസ് വിട്ടു ബിജെപിയില് ചേര്ന്ന രണ്ടു പേരുള്പ്പെടെ
ഏകാംഗ ഭരണത്തിന് അന്ത്യം കുറിച്ച് മധ്യപ്രദേശില് അഞ്ച് മന്ത്രിമാര് സത്യപ്രതിജ്ഞ ചെയ്ത് അധികാരമേറ്റു.കോണ്ഗ്രസ് വിട്ടു ബിജെപിയില് ചേര്ന്ന രണ്ടു പേരുള്പ്പെടെയുള്ളവരാണ് രാജ്ഭവനില് നടന്ന ലളിതമായ ചടങ്ങില് സത്യപ്രതിജ്ഞ ചെയ്ത് അധികാരമേറ്റത്.
നരോത്തം മിശ്ര, മീനാ സിങ്, കമല് പട്ടേല്,തുളസീറാം സിലാവത്, ഗോവിന്ദ് സിങ് രാജ്പുത് എന്നിവരാണ് ഇന്ന് മന്ത്രിമാരായി സത്യപ്രതിജ്ഞ ചെയ്തത്.ഗവര്ണര് ലാല്ജി ടണ്ടണ് സത്യപ്രതിജ്ഞ ചൊല്ലി കൊടുത്തത്.
ബി.ജെ.പി അട്ടിമറിയിലൂടെ ഭരണം നേടിയെങ്കിലും ഒരുമാസമായി മുഖ്യമന്ത്രിയല്ലാതെ മറ്റ് മന്ത്രിമാരൊന്നും സത്യപ്രതിജ്ഞ ചെയ്തിരുന്നില്ല. ലോക്ക്ഡൗണ് മൂലമാണ് മന്ത്രിസഭാ വികസനം നടത്താതിരുന്നതെന്നായിരുന്നു റിപ്പോര്ട്ട്.
നിലവില് ഒരോ മന്തിമാര്ക്കും രണ്ട് വകുപ്പുകള് വീതം നല്കിയെന്നാണ് വിവരം. ലോക്ക് ഡൗണ് അവസാനിക്കുന്ന മെയ് മൂന്നിന് വീണ്ടും മന്ത്രിസഭാ വികസനം ഉണ്ടാകുമെന്നാണ് കരുതുന്നത്.
രാജ്യത്ത് കൊറോണ പടരുന്ന സാഹചര്യത്തിലാണ് കോണ്ഗ്രസ് നേതൃത്വത്തിലുള്ള കമല്നാഥ് സര്ക്കാരിനെ അട്ടിമറിച്ച് ബിജെപി അധികാരം പിടിച്ചത്. കോണ്ഗ്രസ് നേതാവായിരുന്ന ജോതിരാദിത്യ സിന്ധ്യയും 22 എംഎല്എമാരും കോണ്ഗ്രസില്നിന്നു രാജിവച്ചു ബിജെപിയില് ചേര്ന്നതോടെയാണ് മധ്യപ്രദേശില് കോണ്ഗ്രസ് സര്ക്കാര് താഴെ വീണത്.
https://www.facebook.com/Malayalivartha