കൊത്തി കൊത്തി അവര്‍ കേരളത്തിനടുത്തെത്തി; ഉത്തരേന്ത്യയില്‍ ആയിരക്കണക്കിന് ഹെക്ടര്‍ കൃഷിനാശം വിതച്ച വെട്ടുകിളികളെ തമിഴ്‌നാട്ടിലും കണ്ടെത്തിയതായി റിപ്പോര്‍ട്ടുകള്‍; അതിര്‍ത്തിയില്‍ ആശങ്ക
ഉത്തരേന്ത്യയില്‍ ആയിരക്കണക്കിന് ഹെക്ടര്‍ കൃഷിനാശം വിതച്ച വെട്ടുകിളികളെ തമിഴ്‌നാട്ടിലും കണ്ടെത്തിയതായി റിപ്പോര്‍ട്ടുകള്‍. തമിഴ്‌നാട്ടിലെ കൃഷ്ണഗിരി, നീലഗിരി ജില്ലകളിലാണ് വെട്ടുകിളികളുടെ സാന്നിധ്യം കണ്ടെത്തിയിരിക്കുന്നത്. കൃഷ്ണഗിരിയില്‍ ഏക്കര്‍ കണക്കിന് കൃഷി വെട്ടുകിളി കൂട്ടം നശിപ്പിച്ചതായാണ് വിവരം.
പാടങ്ങളിലാണ് വെട്ടുകിളികള്‍ വിഹരിക്കുന്നത്. കൃഷ്ണഗിരിയെ കൂടാതെ വയനാട്-മലപ്പുറം ജില്ലകളുമായി അതിര്‍ത്തി പങ്കിടുന്ന നീലഗിരി ജില്ലയിലും വെട്ടുകിളികളുടെ സാന്നിധ്യം കണ്ടെത്തിയിട്ടുണ്ട്. അതേസമയം ഉത്തരേന്ത്യയില്‍ വ്യാപകനാശം വിതച്ച വെട്ടുകിളികളല്ല തമിഴ്‌നാട്ടിലേതെന്നാണ് വിദഗ്ദ്ധര്‍ പറയുന്നത്. പ്രാദേശികമായി കണ്ടുവരുന്ന വെട്ടുകിളികൂട്ടമാണ് ഇതെന്നും ഇവ ദീര്‍ഘദൂരം സഞ്ചരിക്കാന്‍ സാധ്യതയില്ലെന്നും അവര്‍ അഭിപ്രായപ്പെടുന്നു. അതേസമയം ഉത്തരേന്ത്യയില്‍ നാശം വിതച്ച വെട്ടുകിളിക്കൂട്ടം ദക്ഷിണേന്ത്യയില്‍ പ്രവേശിക്കാന്‍ സാധ്യതയുണ്ടെന്ന് കേന്ദ്രസര്‍ക്കാര്‍ മുന്നറിയിപ്പ് നല്‍കി. കര്‍ണാടകയടക്കമുള്ള സംസ്ഥാനങ്ങള്‍ ഇതേതുടര്‍ന്ന് അതീവ ജാഗ്രതയിലാണ്.
രാജ്യത്ത് കാര്‍ഷിക മേഖലയില്‍ പ്രതിസന്ധി സൃഷ്ടിച്ചു തുടരുന്ന വെട്ടുകിളി ആക്രമണത്തില്‍ പ്രതിരോധം ശക്തമാക്കുകയാണ്. കേന്ദ്ര സംസ്ഥാന സര്‍ക്കാരുകള്‍. അഞ്ചു സംസ്ഥാനങ്ങളിലെ 377 കേന്ദ്രങ്ങളില്‍ ആയി 53,997 ഹെക്ടര്‍ സ്ഥലത്ത് മരുന്ന് തളി ഉള്‍പ്പടെ ഉള്ള പ്രതിരോധ പ്രവര്‍ത്തനം നടത്തിയതായി കാര്‍ഷിക മന്ത്രാലയം അറിയിച്ചു. അന്‍പതിനായിരം ഹെക്ടര്‍ പ്രദേശത്ത് ഇതുവരെ വെട്ടുകിളിക്കൂട്ടം കൃഷി നാശം ഉണ്ടാക്കിയിട്ടുണ്ട്. കൂടുതല്‍ ഇടങ്ങളിലേക്ക് വ്യാപിക്കാതെ ഇരിക്കാനുള്ള നടപടികള്‍ തുടരുകയാണ് കേന്ദ്രവും സംസ്ഥാനങ്ങളും. കര്‍ണ്ണാടക, തെലങ്കാന ഉള്‍പ്പടെ 17 സംസ്ഥാനങ്ങള്‍ക്ക് കേന്ദ്രം മുന്നറിയിപ്പ് നല്‍കിയിട്ടുണ്ട്. അതിനിടെ വെട്ടു കിളി അക്രമണം രൂക്ഷമായ മേഖലകളിലെക്ക് ഉള്ള വിമാന സര്‍വീസുകള്‍ക്ക് വ്യോമയാന മന്ത്രാലയം മാര്‍ഗ നിര്‍ദേശം പുറത്തിറക്കി. സര്‍വീസ് ഒഴിവാക്കുകയോ രാത്രികാലങ്ങളില്‍ സര്‍വീസ് ക്രമികരിക്കുകയോ വേണമെന്നാണ് വിമാന കമ്പനികള്‍ക്കുള്ള മാര്‍ഗ നിര്‍ദേശം. വിമാനം ഉയര്‍ന്നു പൊങ്ങുമ്പോഴും താഴുമ്പോഴും വെട്ടുകിളികള്‍ ഭിഷണിയാണെന്നാണ് വ്യോമയാന മന്ത്രാലയത്തിന്റെ വിലയിരുത്തല്‍.
https://www.facebook.com/Malayalivartha
