അകാശത്ത് വിമാനങ്ങള്‍ മുഖത്തോട് മുഖം. മുംബൈ ആകാശത്ത് അത്തരമൊരു ദുരന്തം ഒഴിവായത് വെറും 25 സെക്കന്‍ഡുകളുടെ വ്യത്യാസത്തിലെന്ന് റിപ്പോര്‍ട്ട്. മാര്‍ച്ച് 29നാണ് ഈ സംഭവം.സീഷെല്‍സിലേക്ക് പോവുകയായിരുന്ന എത്തിഹാദ് വിമാനവും ദുബായിലേക്കുള്ള എമിറേറ്റ്‌സ് വിമാനവും ഒരേ പാതയില്‍ നേര്‍ക്കുനേര്‍ പറന്നടുത്തുവെങ്കിലും പൈലറ്റുമാരുടെ മോനോബലത്തില്‍ ദുരന്തം ഒഴിവാവുകയായിരുന്നു. രണ്ട് വിമാനങ്ങളിലെയും കോക്പിറ്റുകളിലുള്ള അപകട സൈറണ്‍ മുഴങ്ങിയതിനെത്തുടര്‍ന്ന് അവസാന നിമിഷം വിമാനങ്ങളുടെ ദിശമാറ്റിയതോടെയാണ് ദുരന്തം വഴിമാറിയത്. 400ഓളം യാത്രക്കാരാണ് രണ്ടുവിമാനങ്ങളിലുമായി ഉണ്ടായിരുന്നത്.
നേര്‍ക്കുനേര്‍ കൂട്ടിയിടിക്കുമെന്ന് ഉറപ്പായ നിമിഷങ്ങള്‍. പൊടുന്നനെ ഇരു കോക്പിറ്റുകളിലെയും ആന്റികൊളിഷന്‍ അലാറം അടിക്കുകയും വിമാനങ്ങള്‍ ഗതിമാറ്റുകയുമായിരുന്നു. ഇരുവിമാനങ്ങളും തമ്മില്‍ 25 സെക്കന്‍ഡിന്റെ മാത്രം അകലത്തിലായിരുന്നു അപ്പോഴെന്ന് അന്വേഷണ റിപ്പോര്‍ട്ടില്‍ പറയുന്നു.
മുംബൈ വിമാനത്താവളത്തിലെ എയര്‍ ട്രാഫിക് കണ്‍ട്രോളിലുണ്ടായിരുന്നവരുടെ അശ്രദ്ധയാണ് ഇതിന് വഴിവച്ചതെന്ന് സംഭവത്തെക്കുറിച്ച് അന്വേഷിച്ചവര്‍ കണ്ടെത്തിയിട്ടുണ്ട്. സീഷെല്‍സിലേക്ക് പോവുകയായിരുന്ന എത്തിഹാദ് വിമാനത്തോട് 36,000 അടി ഉയരത്തില്‍ പറക്കാന്‍ എയര്‍ ട്രാഫിക് കണ്‍ട്രോളര്‍ ആവശ്യപ്പെട്ടു. എന്നാല്‍, എതിര്‍ദിശയില്‍നിന് എമിറേറ്റ്‌സ് വിമാനം പറന്നുവരുന്നുണ്ടെന്ന് മനസ്സിലാക്കാതെയാണ് ഈ നിര്‍ദ്ദേശം നല്‍കിയത്.
വിമാനങ്ങളുടെ ദിശ സംബന്ധിച്ച് എയര്‍ ട്രാഫിക് കണ്‍ട്രോളിലുള്ളവര്‍ക്ക് അവസാന നിമിഷം വിവരം നല്‍കുന്നത് ഓട്ടോമാറ്റിക് ഡിപ്പന്‍ഡന്റ് സര്‍വൈലലന്‍സില്‍(എഡിഎസ്) നിന്നാണ്. റഡാറിന്റെ ദൃശ്യപരിധിക്കപ്പുറത്തുള്ള വിമാനങ്ങളുടെ ദിശ സംബന്ധിച്ച് ഏറ്റവും ആധികാരികമായ വിവരങ്ങള്‍ എഡിഎസില്‍നിന്ന് ലഭിക്കും. എന്നാല്‍, ഈ വിമാനങ്ങളുടെ ദിശ സംബന്ധിച്ച വിവരങ്ങള്‍ ട്രാഫിക് കണ്‍ട്രോളിലെ രേഖകളില്‍നിന്ന് നീക്കം ചെയ്തതായാണ് കണ്ടെത്തിയിട്ടുള്ളത്. അതേക്കുറിച്ച് അന്വേഷിക്കുമെന്നും വ്യോമയാന മന്ത്രാലയം വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha