ലോകത്ത് എവിടെയുള്ള ഇന്ത്യക്കാരന്റെയും മനസ് ഇന്ത്യയിലാണ്. അതാണ് ഇന്ത്യയുടെ ശക്തി. നിങ്ങള്‍ ഒറ്റയ്ക്കല്ല. നിങ്ങളുടെ കൂടെ രാജ്യമുണ്ട്. അതുകൊണ്ട് തന്നെയാണ് നിങ്ങളെ കാണാന്‍ ഞാന്‍ എത്തിയതെന്ന് പ്രധാനമന്ത്രി നരേന്ദ്ര മോഡി. അധികാരം ഏറ്റെടുത്തതുമുതല്‍ പ്രവാസികളായ മുഴുവന്‍ ഇന്ത്യക്കാരെയും ഒരുമിച്ച് ഒരുകുടക്കീഴില്‍ കൊണ്ടുവന്ന് ഇന്ത്യയുടെ വികസനം സാധ്യമാക്കാനാണ് എന്റെ ശ്രമം. നിങ്ങളെ രാജ്യം എത്രത്തോളം സ്‌നേഹിക്കുന്നുവെന്ന് നിങ്ങള്‍ക്കറിയില്ല. യമനിലെ രക്ഷാദൗത്യം തന്നെ നിങ്ങള്‍ കണ്ടതല്ലെ..ഓരോ ഇന്ത്യക്കാരന്റെയും വില രാജ്യം മനസിലാക്കുന്നുവെന്നും നരേന്ദ്രമോഡി പറഞ്ഞു. കാനഡ സന്ദര്‍ശനത്തിനെത്തിയ മോഡിക്കു പ്രധാനമന്ത്രി സ്റ്റീഫന്‍ ഹാര്‍പര്‍ ഒരുക്കിയ വിരുന്നില്‍ പരിനായിരങ്ങളാ ഇന്ത്യന്‍ വംശജരെ അഭിസംബോധനചെയ്തുകൊണ്ട് സംസാരിക്കുകയായിരുന്നു.
\'ഖേം ചോ?\' സുഖമല്ലേ എന്നു ഗുജറാത്തിയിലുള്ള ചോദ്യം തന്നെ കാനഡയിലെ റിക്കോ കൊളീസിയത്തെ ആവേശക്കടലാക്കി. ന്യൂയോര്‍ക്കിലെ മാഡിസണ്‍ സ്‌ക്വയറില്‍ ഇന്ത്യന്‍ വംശജരായ അമേരിക്കക്കാരെ ആവേശഭരിതരാക്കിയ പ്രധാനമന്ത്രി നരേന്ദ്ര മോഡിയുടെ വാക്ചാതുര്യം കാനഡയിലെ കൊളീസിയത്തിലും ഇന്ത്യന്‍ രക്തത്തെ ത്രസിപ്പിച്ചു.
42 വര്‍ഷത്തിനു ശേഷം ആദ്യമായി കാനഡയില്‍ ഔദ്യോഗിക സന്ദര്‍ശനം നടത്തുന്ന ഇന്ത്യന്‍ പ്രധാനമന്ത്രിയെ കാണാന്‍ പതിനായിരത്തിലേറെ ഇന്ത്യന്‍ വംശജരാണ് റീക്കോ കൊളീസിയത്തില്‍ എത്തിയത്.
ഇന്ത്യയുടെ എല്ലാ പ്രശ്‌നങ്ങള്‍ക്കും ഒരേയൊരു മരുന്നേയുള്ളൂ എന്ന പ്രധാനമന്ത്രിയുടെ പ്രഖ്യാപനത്തോട് \'മോഡി, മോഡി\' എന്നു ജനം ആര്‍ത്തുവിളിച്ചു. അതു താനല്ലെന്നും വികസനമാണ് ഇന്ത്യയുടെ എല്ലാ പ്രശ്‌നത്തിനും പരിഹാരമെന്നും മോഡി വിനീതനായി.
അതിവേഗമുള്ള വികസനത്തിനു തുടക്കമിട്ടുകഴിഞ്ഞു. നേരത്തേ ദിവസം രണ്ടു കി.മീ. റോഡ് നിര്‍മിച്ചിരുന്ന സ്ഥാനത്ത് ഇന്നു 11 കി.മീ. നിര്‍മിക്കുന്നു. 10 മാസം കൊണ്ടുതന്നെ രാജ്യത്ത് വിശ്വാസ്യതയുടെ അന്തരീക്ഷമുണ്ടാക്കാന്‍ കഴിഞ്ഞു. ജനങ്ങളുടെ മനസും ഏറെ മാറിക്കഴിഞ്ഞെന്ന് \'കിത്‌നാ ബദല്‍ ഗയാ ഇന്‍സാന്‍...\' എന്ന സിനിമാ ഗാനം മൂളിക്കൊണ്ട് അദ്ദേഹം പറഞ്ഞു.
\'രാജ്യത്തെ മലിനപ്പെടുത്താന്‍ തുനിഞ്ഞവര്‍ അതു ചെയ്ത് കടന്നുപോയി. ഞങ്ങള്‍ അതു വൃത്തിയാക്കിയിട്ടേ പോകൂ\' മുന്‍ യു.പി.എ. സര്‍ക്കാരിനെതിരായ കുറ്റപ്പെടുത്തലും ഹിന്ദിയിലായിരുന്നു.
സ്‌കാം ഇന്ത്യ അഴിമതിയുടെ ഇന്ത്യ എന്നായിരുന്നു കുറച്ചു മുമ്പു വരെ ഇന്ത്യയുടെ പ്രതിച്ഛായ. അത് സ്‌കില്‍ ഇന്ത്യ വൈദഗ്ധ്യമുള്ള ഇന്ത്യ എന്നാക്കി മാറ്റും. യുവത്വമാണ് ഇന്ത്യയുടെ ഏറ്റവും വലിയ സമ്പത്ത്. എണ്‍പതു കോടി യുവാക്കള്‍, 80 കോടി സ്വപ്‌നങ്ങള്‍, ശക്തമായ 160 കോടി കരങ്ങള്‍... ഇന്ത്യക്ക് എന്തൊക്കെത്തന്നെ എത്തിപ്പിടിക്കാനാകില്ല!
യുവാക്കള്‍ക്കു തൊഴിലവസരങ്ങള്‍ ലഭ്യമാക്കണം. തൊഴിലന്വേഷകര്‍ എന്ന നിലയില്‍ നിന്ന് അവരെ തൊഴില്‍ ദാതാക്കളായി മാറ്റാനാണു ശ്രമം. മുഴുവന്‍ ലോകത്തിനും ആവശ്യമായ വിദഗ്ധ തൊഴിലാളികളെ നല്‍കാന്‍ ഇന്ത്യയെ പര്യാപ്തമാക്കും. ഒരു ഹോളിവുഡ് സിനിമ നിര്‍മിക്കുന്നതിനേക്കാള്‍ കുറഞ്ഞ ചെലവില്‍ ചൊവ്വയെ തൊട്ട ഇന്ത്യക്ക് ആ സ്വപ്‌നവും വിജയമാക്കാന്‍ കഴിയും.
കാനഡയുമായി തനിക്ക് എന്നും മികച്ച സൗഹൃദമാണ് ഉണ്ടായിരുന്നതെന്നു സ്റ്റീഫന്‍ ഹാര്‍പറുമായി പങ്കിട്ട വേദിയില്‍ മോഡി പറഞ്ഞു. താന്‍ ഗുജറാത്ത് മുഖ്യമന്ത്രിയായിരിക്കെ 2003ല്‍ ഗുജറാത്ത് വികസനത്തില്‍ കാനഡയുടെ സഹകരണമുണ്ടായി. ഇന്ന് ഇന്ത്യയുടെ കാര്യത്തില്‍ ആ സഹകരണം വിപുലമാകുന്നു. ദീര്‍ഘമായ ആ സൗഹൃദത്തെ ഏറെ വിലമതിക്കുന്നു എന്ന് തന്നെ നേരത്തേ മറ്റൊരു കാഴ്ചപ്പാടില്‍ കണ്ടിരുന്ന പാശ്ചാത്യ രാജ്യങ്ങളെ പരോക്ഷമായി കുറ്റപ്പെടുത്തിക്കൊണ്ട് മോഡി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha