ഇന്നലെ വൈകീട്ട് 1,12,160 രൂപയായിരുന്നു പവന്‍ വില. പശ്ചിമേഷ്യയിലെ യുദ്ധത്തിന് അയവുണ്ടാകുമെന്ന പ്രതീക്ഷയിലാണ് വില ഇന്നലെ രണ്ടുതവണ കുതിച്ചത്. എന്നാല്‍, യുദ്ധം തുടരുമെന്ന യുഎസ് പ്രസിഡന്റ് ഡോണള്‍ഡ് ട്രംപിന്റെ പ്രസ്താവന പ്രതീക്ഷകള്‍ തെറ്റിച്ചു. എണ്ണവില ഉയരുകയും സ്വര്‍ണവില ഇടിയുകയുമായിരുന്നു.

ഇന്ന് രാവിലെ പവന് 1120 രൂപ ഇടിഞ്ഞിരുന്നു. പിന്നാലെ ഉച്ചകഴിഞ്ഞ് 1800 രൂപ കൂടി ഇടിഞ്ഞു. യുദ്ധം തുടരുമെന്ന ട്രംപിന്റെ പ്രസ്താവന, എണ്ണവില ഉയര്‍ന്നത് എന്നിവ കൂടാതെ ഡോളര്‍ ശക്തിപ്പെട്ടതും സ്വര്‍ണവിലയെ ഇടിച്ചു. ആഗോളവിപണിയില്‍ സ്വര്‍ണം ട്രോയ് ഔണ്‍സിന് 165 ഡോളര്‍ ഇടിഞ്ഞ് 4620 ഡോളറിലെത്തി. ഒരു ഘട്ടത്തില്‍ 4560 ഡോളര്‍ വരെ ഇടിഞ്ഞിരുന്നു. വെള്ളിവില ആറ് ശതമാനത്തിലേറെ ഇടിഞ്ഞ് ട്രോയ് ഔണ്‍സിന് 71.12 ഡോളറിലെത്തി.

പശ്ചിമേഷ്യയിലെ യുദ്ധത്തിന്റെ തുടക്കത്തില്‍ സ്വര്‍ണവില വന്‍തോതില്‍ വര്‍ധിച്ചിരുന്നെങ്കിലും അസംസ്‌കൃത എണ്ണവില കുതിച്ചതോടെ വന്‍ ഇടിവ് നേരിടുകയായിരുന്നു. മാര്‍ച്ച് ഒന്നിന് 1,26,920 എന്ന നിലയിലായിരുന്നു പവന്‍ വില. പിന്നീട് മാര്‍ച്ച് 23ന് 99,480 രൂപ വരെ താഴ്ന്നു. ശേഷമാണ് വീണ്ടും വില ഉയര്‍ന്നത്.