തിരിച്ചു വരവില് മോഡിയെ വിറപ്പിച്ച് രാഹുല് ഗാന്ധി, കോണ്ഗ്രസും താനും ഉള്ളടുത്തോളം കാലം കര്ഷകഭൂമിയില് തൊടാന് അനുവദിക്കില്ല
തന്റെ തിരിച്ചുവരവ് ഗംഭീരമാക്കി രാഹുല് ഗാന്ധി വിമര്ശകരുടെ വായടപ്പിച്ചു. ഇന്നലെ ഡല്ഹിയില് കോണ്ഗ്രസ് സംഘടിപ്പിച്ച കര്ഷക റാലിയില് കര്ഷകരെ അഭിസംബോധന ചെയ്യവേ രാഹുല് മോഡിക്കെതിരെയും ബിജെപിക്കെതിരെയും ആഞ്ഞടിച്ചു. മോഡിയും ബിജെപിയും രാജ്യത്തെ കോര്പ്പറേറ്റുകള്ക്ക് വില്ക്കുകയാണെന്നും കോണ്ഗ്രസ് ഉള്ളടുത്തോളം കാലം ബിജെപിയുടേയും മോഡിയുടേയും ആഗ്രഹം നടക്കില്ലെന്നും രാഹുല് പറഞ്ഞത് വന് കരഘോഷത്തോടെയാണ് കര്ഷകര് ഏറ്റുവാങ്ങിയത്. 57 ദിവസത്തെ അജഞാത വാസത്തിന് ശേഷം വെള്ളിയാഴ്ചയാണ് രാഹുല് ഗാന്ധി മടങ്ങിയെത്തിയത്. കോണ്ഗ്രസ് നേതാക്കള് പറഞ്ഞത് പോലെ മടങ്ങിവന്ന രാഹുല് പുതിയ ഒരു ഊര്ജ്ജമാണ് കോണ്ഗ്രസിന് നല്കിയത്. വിമര്ശകരുടെ വായടപ്പിക്കുന്ന രീതിയിലായിരുന്നു ഇത്. ക്രൗര്യവും ക്ഷോഭവും നിറഞ്ഞ സംസാരത്തില് മിതത്വം പാലിക്കാന് രാഹുല് ശ്രമിച്ചത് കോണ്ഗ്രസ് നേതാക്കള്ക്ക് തന്നെ അമ്പരപ്പുണ്ടാക്കി. രാഹുല് ഗാന്ധിയുടെ മടങ്ങിവരവിന് ശേഷമുള്ള പ്രസംഗം വന്പ്രാധാന്യത്തോടെയാണ് വിദേശമാധ്യമങ്ങള് പ്രസിദ്ധീകരിച്ചത്.
മോദിയുടെ ഭരണം കുത്തകകള്ക്ക് വേണ്ടിയാണെന്നും കര്ഷക വിരുദ്ധമാണെന്നും പറഞ്ഞുകൊണ്ടാണ് രാംലീലയില് ലക്ഷങ്ങള് അണിനിരന്ന കര്ഷകറാലിയെ രാഹുല് അഭിസംബോധന ചെയ്തത്. ഗുജറാത്ത് മോഡല് നടപ്പിലാക്കാമെന്ന് കുത്തകകള്ക്ക് വാക്കു നല്കിയാണ് മോഡി പ്രധാനമന്ത്രിയായതെന്ന് രാഹുല് ഗാന്ധി വിമര്ശിച്ചു. കര്ഷകരുടെ ഭൂമി കുത്തകള്ക്ക് നല്കുന്നത് വഴി രാജ്യത്തിന്റെ അടിത്തറ തകര്ക്കുന്ന പ്രവൃത്തിയിലാണ് മോഡി ഇപ്പോള് ഏര്പ്പെട്ടിരിക്കുന്നത്. ഭൂമിയേറ്റെടുക്കല് നിയമഭേഗദതി പാസ്സാക്കാന് അനുവദിക്കില്ലെന്നും ഡല്ഹിയിലെ കര്ഷക റാലിയെ അഭിസംബോധന ചെയ്തുകൊണ്ട് രാഹുല് ഗാന്ധി പറഞ്ഞു.
ലോകം മുഴുവന് ചുറ്റി പ്രധാനമന്ത്രി ആഘോഷിക്കുന്ന മേക്ക് ഇന് ഇന്ത്യ പദ്ധതിയെയും രാഹുല് വിമര്ശിച്ചു. കര്ഷകരുടെ ഭൂമി തട്ടിയെടുക്കാനുള്ള ഗുജറാത്ത് മോഡല് തന്ത്രമാണ് മേക്ക് ഇന് ഇന്ത്യയിലൂടെ നടക്കുന്നത്. കര്ഷകരെ ദ്രോഹിക്കുന്ന കേന്ദ്രസര്ക്കാര് നയങ്ങള്ക്കെതിരായ പ്രക്ഷോഭങ്ങള്ക്ക് താന് മുന്നിലുണ്ടാകുമെന്നും അദ്ദേഹം പറഞ്ഞു. കേന്ദ്രസര്ക്കാര് കര്ഷകരെയും തൊഴിലാളികളെയും മറന്നു. രാജ്യത്ത് കര്ഷകര് ഏറെ ആശങ്കയിലാണ്. കര്ഷകരെ തഴഞ്ഞ് കോര്പ്പറേറ്റുകള്ക്ക് വേണ്ടി പ്രവര്ത്തിക്കുന്ന സര്ക്കാറാണ് ഇപ്പോള് പ്രവര്ത്തിക്കുന്നത് എന്ന തോന്നലാണ് ഇപ്പോള് ഇന്ത്യയിലെ കര്ഷകര്ക്കുള്ളത്. യുപിഎ അധികാരത്തില് ഉണ്ടായിരുന്നപ്പോള് കര്ഷകര്ക്ക് വേണ്ടി ചെയ്യാന് കഴിയുന്ന കാര്യങ്ങളെല്ലാം ചെയ്തിരുന്നുവെന്നും കോണ്ഗ്രസ് ഉപാധ്യക്ഷന് അവകാശപ്പെട്ടു.
ഇന്ത്യയിലെ ജനങ്ങളുടെ കണ്ണുനീര് ഒപ്പാന് തനിക്ക് സാധിച്ചുവെന്ന് വിദേശ രാജ്യങ്ങളില് പോയി മോദി പറയുന്നുണ്ട്. എന്നാല് ഇതു കാണുമ്പോള് സത്യത്തില് സങ്കടമാണ് വരുന്നത്. അദ്ദേഹം പ്രധാനമന്ത്രി പദത്തിനും സ്വന്തംനിലയിലും നീതിനല്കുന്നില്ല. കര്ഷകരെ അവരുടെ ഭൂമിവില്ക്കേണ്ട അവസ്ഥയില് എത്തിച്ചു. നമ്മള്ക്ക് വികസനവും വലിയ നിര്മ്മാണ മേഖലയും വേണം എന്നാല് അവര്ക്കൊപ്പം കര്ഷകരെയും അവരുടെ കുട്ടികളെയും വേണം രാഹുല് പറഞ്ഞു.
മോദിയുടെ ഭരണത്തിന് കീഴില് കര്ഷകര് ഭയന്നുകൊണ്ടാണ് ജീവിക്കുന്നത്. സ്വന്തം മണ്ണില് എന്താണ് സംഭവിക്കുന്നത് എന്ന് പോലും അറിയാന് സാധിക്കാത്ത അവസ്ഥയാണുള്ളത്. നാളെ എന്താകുമെന്ന് അറിയില്ല. കര്ഷകരുടെ അവകാശത്തിനായി ഞാന് പോരാടും. 2013ല് യുപിഎ സര്ക്കാര് കൊണ്ടുവന്ന ഭൂമിഏറ്റെടുക്കല് ബില്ലില് മോദി സര്ക്കാര് കൊണ്ടുവന്ന മാറ്റം കര്ഷകരെ ആശങ്കപ്പെടുത്തുന്നുണ്ട്. കര്ഷകരെ പ്രധാനമന്ത്രി നരേന്ദ്ര മോദി അപമാനിച്ചുവെന്നും രാഹുല് ആരോപിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
