കോണ്‍ഗ്രസ് അധ്യക്ഷ സോണിയ ഗാന്ധിക്കെതിരേ മോശം പരാമര്‍ശം നടത്തിയ കേന്ദ്രമന്ത്രി ഗിരിരാജ് സിംഗ് ലോക്‌സഭയില്‍ മാപ്പ് പറഞ്ഞു. രാവിലെ സഭ തുടങ്ങിയപ്പോള്‍ തന്നെ മന്ത്രിക്കെതിരേ പ്രതിഷേധവുമായി കോണ്‍ഗ്രസ് അംഗങ്ങള്‍ രംഗത്തെത്തിയിരുന്നു. രാജ്യത്തെ എല്ലാ വനിതകളെയും അപമാനിക്കുന്ന വാക്കുകളാണ് മന്ത്രി ഉപയോഗിച്ചതെന്ന് കോണ്‍ഗ്രസ് അംഗങ്ങള്‍ ആരോപിച്ചു. തുടര്‍ന്ന് സഭ നിര്‍ത്തിവെച്ചു.

11.45ന് സഭ വീണ്ടും സമ്മേളിച്ചപ്പോള്‍ മന്ത്രി പരാമര്‍ശത്തില്‍ ഖേദം പ്രകടിപ്പിക്കുകയായിരുന്നു. പ്രസ്താവനയില്‍ വ്യാപക പ്രതിഷേധം ഉയര്‍ന്നതിനാല്‍ മന്ത്രി നേരത്തെ തന്നെ ഖേദം പ്രകടിപ്പിച്ചിരുന്നു. രാജീവ് ഗാന്ധി, വെള്ളക്കാരിക്കു പകരം ഒരു നൈജീരിയക്കാരിയെയായിരുന്നു വിവാഹം കഴിച്ചിരുന്നെങ്കില്‍ അവരെ കോണ്‍ഗ്രസ് നേതാവായി അംഗീകരിക്കുമായിരുന്നോ എന്ന് ഒരു സ്വകാര്യ ചടങ്ങില്‍ ഗിരിരാജ് നടത്തിയ പ്രസംഗമാണ് വിവാദമായിരുന്നത്.

സോണിയയുടെ നേതൃത്വം കോണ്‍ഗ്രസുകാര്‍ അംഗീകരിച്ചത് അവരുടെ വെളുപ്പു നിറം കണ്ടിട്ടാണെന്നാണ് ഗിരിരാജ് സിങ് പറഞ്ഞത്. പാര്‍ലമെന്റില്‍ പോലും ഹാജരാകാതെ അനിശ്ചിതകാലത്തേക്ക് അവധിയെടുത്ത് പോയ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിക്കെതിരെയും ഗിരിരാജ് സിങ്ങ് വിമര്‍ശനമുയര്‍ത്തി.

എവിടെപ്പോയെന്നു പോലും ഇനിയും കണ്ടെത്താനാകാത്ത മലേഷ്യന്‍ എയല്‍ലൈന്‍സ് വിമാനത്തിന്റെ അവസ്ഥ പോലെയാണ് രാഹുലിന്റേത് എന്നും ഗിരിരാജ് സിംഗ് പരിഹസിച്ചിരുന്നു. എന്നാല്‍, ഗിരിരാജ് സിംഗിനെതിരെ മറുപടിയുമായി സോണിയാ ഗാന്ധി ദിവസങ്ങള്‍ക്ക് മുമ്പ് മുന്നോട്ട് വന്നിരുന്നു. ഗിരിരാജിന് ഇടുങ്ങിയ ചിന്താഗതിയാണെന്നും അത്തരം ഇടുങ്ങിയ ചിന്താഗതികളുള്ളവര്‍ നടത്തുന്ന പ്രസ്താവനകള്‍ക്ക് മറുപടി പറയേണ്ടതില്ലെന്നും സോണിയ വ്യക്തമാക്കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha