അജ്ഞാതവാസത്തിന് ശേഷം കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയുടെ കിസാന്‍ പദയാത്ര മഹാരാഷ്ട്രയില്‍ തുടങ്ങി. വിദര്‍ഭ അമരാവതിയിലെ അഞ്ചു ഗ്രാമങ്ങളിലാണ് രാഹുല്‍ യാത്ര ചെയ്യുക. കൃഷിനാശത്തെ തുടര്‍ന്ന് ആത്മഹത്യ ചെയ്ത കര്‍ഷകരുടെ വീടുകളില്‍ സന്ദര്‍ശനം നടത്തിയും പരാതികള്‍ കേട്ടുമാണ് പതിനഞ്ചു കിലോമീറ്റര്‍ നീളുന്ന പദയാത്ര രാഹുല്‍ തുടരുന്നത്. ഇന്നലെ രാവിലെ ഗുഞ്ച് ഗ്രാമത്തില്‍ നിന്നാണ് പദയാത്ര ആരംഭിച്ചത്. കോണ്‍ഗ്രസ് പതാകയേന്തിയ പ്രവര്‍ത്തകരുടെയും കര്‍ഷകരുടെയും കൂടെയാണ് രാഹുലിന്റെ യാത്ര.
യാത്രയ്ക്കിടെ വഴിയില്‍ വച്ചുകണ്ടുമുട്ടുന്ന ഗ്രാമീണരുമായും രാഹുല്‍ ചര്‍ച്ച നടത്തുന്നുണ്ട്. അവരുടെ പ്രശ്‌നങ്ങള്‍ക്ക് നടപടി ഉണ്ടാകുമെന്നും രാഹുല്‍ പറഞ്ഞു. രാവിലെ 10 മണിയോടെ ഇവിടെ 35 ഡിഗ്രി സെല്‍ഷ്യസ് ആണ് ചൂട് രേഖപ്പെടുത്തിയത്. ഉച്ചകഴിയുന്നതോടെ ചൂട് 43 ഡിഗ്രി കടക്കുമെന്നാണ് സൂചന. രാഹുലുമായി സംസാരിക്കുന്നതിന് റോഡിന് ഇരുവശവും ഗ്രാമീണര്‍ തടിച്ചുകൂടി നില്‍ക്കുകയാണ്.

കര്‍ഷകരുടെ കുടിലുകളില്‍ കയറി അവരുമായി സംസാരിക്കാനും രാഹുല്‍ ശ്രമിക്കുന്നുണ്ട്. അതേസമയം, രാഹുലിന്റെ പദയാത്ര രാഷ്ട്രീയ നാടകവും ഫോട്ടോ പരിപാടിയുമാണെന്നാണ് ബി.ജെ.പിയുടെ വിമര്‍ശനം. ആം ആദ്മി പാര്‍ട്ടി നേതാവും ലോക്‌സഭ തെരഞ്ഞെടുപ്പില്‍ രാഹുലിനോട് ഏറ്റുമുട്ടി പരാജയപ്പെട്ട സ്ഥാനാര്‍ത്ഥിയുമായ കുമാര്‍ വിശ്വാസും വിമര്‍ശനവുമായി എത്തിയിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha