ബോളിവുഡ് നടന്‍ സുശാന്ത് സിംഗിന്റെ മരണവുമായി ബന്ധപ്പെട്ട് കാമുകിയും നടിയുമായ റിയാ ചക്രവര്‍ത്തിയുടേയും സഹോദരന്‍ ഷൗവിക്ക് ചക്രവര്‍ത്തിയുടേയും മറ്റ് നാലു പേരുടെയും ജാമ്യഹര്‍ജി കോടതി തള്ളി. നടന്റെ മരണവുമായി ബന്ധപ്പെട്ട് കണ്ടെത്തിയ മയക്കുമരുന്ന് ഇടപാടുമായി ബന്ധപ്പെട്ട കേസിലാണ് പ്രത്യേക കോടതിയാണ് ജാമ്യം നിഷേധിച്ചത്.

ആറ് പേരെയും നേരത്തേ നാര്‍ക്കോട്ടിക് കണ്‍ട്രോള്‍ ബ്യൂറോ അറസ്റ്റ് ചെയ്തിരുന്നു. റിയയ്ക്കും ഷൗവിക്കിനും പുറമേ സുശാന്തിന്റെ മാനേജര്‍ സാമുവേല്‍ മിറാന്‍ഡ, ജോലിക്കാരന്‍ ദീപേഷ് സാവന്ത്, ബാന്ദ്ര സ്വദേശി സെയ്ദ് വിലാത്ര, അബ്‌ദേല്‍ ബസിത് പരിഹാര്‍ എന്നിവരാണ് ജാമ്യം തേടി കോടതിയെ സമീപിച്ചത്.

താന്‍ നിരപരാധിയാണെന്നും തന്നെ കള്ളക്കേസില്‍ കുടുക്കിയിരിക്കുകയാണെന്നും റിയ തന്റെ ഹര്‍ജിയില്‍ വ്യക്തമാക്കിയിരുന്നു. അനധികൃത ഇടപാടുകള്‍ക്ക് പണം ഉപയോഗിച്ചു കുറ്റവാളികളുടെ വിവരം രഹസ്യമായി സൂക്ഷിച്ചു എന്നീ കുറ്റങ്ങളാണ് റിയയ്ക്കും സഹോദരനും എതിരേ ചുമത്തിയിട്ടുള്ളത്.

ജാമ്യം നിഷേധിക്കപ്പെടാന്‍ തക്ക കുറ്റകൃത്യം റിയയോ സഹോദരനോ ചെയ്തിട്ടില്ലെന്നും ഒരു ചെറിയ അളവില്‍ മയക്കുമരുന്ന് സൂക്ഷിക്കുക മാത്രമാണ് ചെയ്തതെന്നും ലഹരിമരുന്ന് കടത്ത് ഇടപാടിലോ അത്തരം കാര്യങ്ങള്‍ ചെയ്യുന്നവരെ ഒളിപ്പിക്കാന്‍ സഹായിക്കുകയോ റിയ ചെയ്തിട്ടില്ലെന്ന് റിയയുടെയും സഹോദരന്റെയും അഭിഭാഷകന്‍ കോടതിയില്‍ പറഞ്ഞു.

എന്നാല്‍ കേസില്‍ ഉള്‍പ്പെട്ടിട്ടുള്ള എല്ലാവരും പരസ്പരം ബന്ധം ഉള്ളവരാണെന്നും ആറു പേരുടേയും കേസുകള്‍ ഒറ്റപ്പെട്ടതായി കരുതാന്‍ കഴിയില്ല എന്നായിരുന്നു പ്രോസിക്യൂഷന്റെ വാദം. എന്‍സിബിയ്ക്ക് വേണ്ടി രംഗത്ത വന്നത് അതുല്‍ സര്‍പാണ്ഡേ ആയിരുന്നു. കേസ് ഒരു നിര്‍ണ്ണായക ഘട്ടത്തില്‍ നില്‍ക്കുമ്ബോള്‍ പ്രതികള്‍ക്ക് ജാമ്യം നല്‍കുന്നത് തെളിവ് നശിപ്പിക്കാന്‍ കാരണമാകുമെന്നായിരുന്നു സര്‍പാണ്ഡേ വാദിച്ചത്.

ചെറിയ അളവില്‍ ആണെങ്കില്‍ പോലും കേസിലെ മയക്കുമരുന്ന് നിര്‍ണ്ണായകമാണെന്നും ചെയ്ത കുറ്റം കൂടുതല്‍ ഗൗരവം അര്‍ഹിക്കുന്ന കാര്യമാണെന്നും പ്രോസിക്യൂഷന്‍ വാദിച്ചു. കുറ്റക്കാരായ എല്ലാവരില്‍ നിന്നും മയക്കുമരുന്നിന്റെ അംശം കണ്ടെത്തിയിരുന്നതായി എന്‍സിബിയും കോടതിയില്‍ പറഞ്ഞു.