ഭൗമാന്തരമാറ്റങ്ങള്‍ മനസിലാക്കുന്നതിന് ഇന്ത്യയുടെ വടക്കുകിഴക്കന്‍ മേഖലകളില്‍ സ്ഥാപിച്ച 293 സെന്‍സറുകളുടെ ശൃംഖല നേപ്പാളിലെ ഭൂകമ്പ സമയത്ത് ഉറക്കത്തില്‍. ദുരന്തം നഗരങ്ങളെയും മറ്റും എങ്ങനെ ബാധിച്ചെന്നു മനസിലാക്കാനുള്ള വിദഗ്ധ നീക്കത്തിനും ഇതു തിരിച്ചടിയാകും. 293 സെന്‍സറുകളില്‍ എത്രയെണ്ണം പ്രവര്‍ത്തിക്കുന്നുണ്ടെന്നും മാറ്റങ്ങള്‍ രേഖപ്പെടുത്തുന്നുണ്ടെന്നും ആര്‍ക്കുമറിയില്ല. കഴിഞ്ഞ സെപ്റ്റംബര്‍ മുതല്‍ ഇതിനുള്ള മെയിന്റനന്‍സ് തുക കേന്ദ്രം നിര്‍ത്തലാക്കിയയാണ് ഇതിനു കാരണമെന്നും ചൂണ്ടിക്കാട്ടുന്നു.
ഇന്ത്യന്‍ ഇന്‍സ്റ്റിറ്റിയൂട്ട് ഓഫ് ടെക്‌നോളജി, റൂര്‍ക്കി എന്നിവ സംയുക്തമായിട്ടാണു വടക്ക്, കിഴക്ക്, വടക്കു കിഴക്കന്‍ സംസ്ഥാനങ്ങളിലെ ജില്ലാ ഭരണകേന്ദ്രങ്ങളില്‍ സെന്‍സറുകളുടെ നെറ്റ്‌വര്‍ക്ക് സ്ഥാപിച്ചത്. കേന്ദ്ര ശാസ്ത്രസാങ്കേതിക മന്ത്രാലയമാണിതിനു പണം മുടക്കിയത്. ഭൗമശാസ്ത്ര മന്ത്രാലയം പദ്ധതിക്കുള്ള ധനസഹായം കഴിഞ്ഞവര്‍ഷം നിര്‍ത്തി. ഈ സെന്‍സറുകള്‍ നാഷണല്‍ സെന്റര്‍ ഫോര്‍ സീസ്‌മോളജി(എന്‍.സി.എസ്)ക്കു കൈമാറണമെന്നും ഐ.ഐ.ടി. റൂര്‍ക്കിയെ മന്ത്രാലയം അറിയിച്ചിരുന്നു. സര്‍ക്കാര്‍ ഏറ്റെടുത്തതിനു പിന്നാലെ, എല്ലാവരും ഇതേക്കുറിച്ചു മറന്നെന്ന് ഇന്ത്യന്‍ ഇന്‍സ്റ്റിറ്റിയൂട്ട് ഓഫ് സയന്‍സിലെ ഭൂകമ്പ എന്‍ജിനീയറിങ് സ്‌പെഷലിസ്റ്റ് റാം അയ്യങ്കാര്‍ പറഞ്ഞു. ശക്തമായ ഭൂകമ്പങ്ങള്‍ക്കുശേഷം അക്കാദമിക് സമൂഹങ്ങള്‍ ഭൂമിയിലുണ്ടാകുന്ന മാറ്റങ്ങള്‍ പഠിക്കാറുണ്ടെന്ന് ഇദ്ദേഹം പറഞ്ഞു. കെട്ടിടങ്ങളെയും മറ്റും ഇതെങ്ങനെ ബാധിക്കുമെന്നും മറ്റിടങ്ങളില്‍ എന്തൊക്കെ മാറ്റമുണ്ടായിട്ടുണ്ടെന്നു മനസിലാക്കാനും തുടര്‍ന്നുള്ള നിര്‍മാണങ്ങള്‍ എങ്ങനെയാകണമെന്നു തീരുമാനിക്കാനും ഇത് അത്യാവശ്യമാണെന്നും അയ്യങ്കാര്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha