കോവിഡ് വാക്സീന്: വിതരണം ഏകോപിപ്പിക്കാനും, നടപടികള്ക്ക് മേല്നോട്ടം വഹിക്കാനും സംസ്ഥാന, ജില്ലാ തലങ്ങളില് സമിതികള് രൂപീകരിക്കാന് സംസ്ഥാനങ്ങളോട് കേന്ദ്രം
കോവിഡ് വാക്സീന് വിതരണത്തിന് ഒരുങ്ങാന് ആവശ്യപ്പെട്ട് കൊണ്ട് സംസ്ഥാനങ്ങള്ക്ക് കേന്ദ്രം കത്തയച്ചു. വാക്സീന് വിതരണം ഏകോപിപ്പിക്കാനും, നടപടികള്ക്ക് മേല്നോട്ടം വഹിക്കാനും സംസ്ഥാന, ജില്ലാ തലങ്ങളില് സമിതികള് രൂപീകരിക്കാന് കേന്ദ്ര ആരോഗ്യ സെക്രട്ടറി രാജേഷ് ഭൂഷണാണ് സംസ്ഥാനങ്ങള്ക്ക് അയച്ച കത്തില് നിര്ദേശം നല്കിയത്.
ചീഫ് സെക്രട്ടറി അധ്യക്ഷനായ സ്റ്റിയറിങ് കമ്മിറ്റിയും, ആരോഗ്യവകുപ്പ് പ്രിന്സിപ്പല് സെക്രട്ടറിയുടെ നേതൃത്വത്തില് ടാസ്ക് ഫോഴ്സും സംസ്ഥാന തലത്തില് രൂപീകരിക്കണം. ജില്ലാ കലക്ടര് അധ്യക്ഷനായി ജില്ലാ ടാസ്ക് ഫോഴ്സിനും രൂപം നല്കാനും കത്തില് പറയുന്നു.
ഡിസംബര് അവസാനത്തോടെയോ അടുത്ത വര്ഷം ആദ്യമോ പരീക്ഷണം പൂര്ത്തിയാക്കി വാക്സീന് നല്കാന് ആകുമെന്നാണ് പ്രതീക്ഷിക്കുന്നത്. വാക്സീന് വിതരണം ഒരു വര്ഷത്തോളം നീണ്ടു നില്ക്കുന്ന പ്രക്രിയ ആയിരിക്കും. മറ്റു ആരോഗ്യ പ്രവര്ത്തനങ്ങളെ ബാധിക്കാതെ ഇത് പൂര്ത്തിയാക്കണം. വിവിധ വകുപ്പുകളുടെ ഏകോപനം അത്യാവശ്യമായിരിക്കും. വാക്സീന് സംബന്ധിച്ച ഊഹാപോഹങ്ങള് പ്രചരിപ്പിക്കുന്നത് തടയാന് മുന്കൂട്ടി നടപടികള് സ്വീകരിക്കേണ്ടതും കമ്മിറ്റികളുടെ ചുമതല ആയിരിക്കും.
അതിനിടെ, കോവിഡ് വ്യാപനം കണക്കിലെടുത്ത് കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, മലപ്പുറം, വയനാട്, കണ്ണൂര് ജില്ലകളിലെ നിരോധനാജ്ഞ നീട്ടി. നവംബര് 15 വരെയാണ് നിയന്ത്രണം. കോഴിക്കോട് ജില്ലയില് ഒരാഴ്ച കൂടി നിരോധനാജ്ഞ തുടരും. തുര്ന്നുള്ള കാര്യം ചര്ച്ച ചെയ്ത് തീരുമാനിക്കുമെന്ന് കലക്ടര് അറിയിച്ചു. തിരുവനന്തപുരം, പാലക്കാട് ജില്ലകളില് ഇന്ന് തീരുമാനമെടുക്കും.
ഒരു മാസം മുന്പ് പ്രഖ്യാപിച്ച നിയന്ത്രണങ്ങള് ഇന്ന് അവസാനിക്കാനിരിക്കെ ജില്ലകളിലെ സാഹചര്യം വിലയിരുത്തി കലക്ടര്മാര്ക്ക് തീരുമാനിക്കാമെന്ന് സര്ക്കാര് വ്യക്തമാക്കിയിരുന്നു. നിരോധനാജ്ഞ നീട്ടിയ ജില്ലകളില് പൊതു സ്ഥലങ്ങളില് അഞ്ചിലധികം പേര് കൂട്ടം ചേരാന് പാടില്ല. കണ്ടെയിന്മെന്റ് മേഖലയില് വിവാഹം, ശവസംസ്കാരം ഒഴികെ പൊതുപരിപാടികള്ക്ക് നിരോധനം തുടരും.
https://www.facebook.com/Malayalivartha
