ഇറാക്കില്‍ ബന്ദികളാക്കപ്പെട്ട ഇന്ത്യക്കാരില്‍ 39 പേരെ ഐസിസ് ഭീകരര്‍ വെടിവച്ചു കൊലപ്പെടുത്തിയെന്ന് റിപ്പോര്‍ട്ട്. ഇറാക്കില്‍ നിന്നും രക്ഷപ്പെട്ട് എത്തിയ പഞ്ചാബ് സ്വദേശി ഹര്‍ജിത് മാസി(25)യാണ് മൊഹാലിയില്‍ മാദ്ധ്യമങ്ങളോട് ഞെട്ടിക്കുന്ന വെളിപ്പെടുത്തല്‍ നടത്തിയത്. ഇറാക്കില്‍ ബന്ദികളാക്കപ്പെട്ട ഇന്ത്യക്കാരില്‍ 39 പേരെ ഐസിസ് ഭീകരര്‍ വെടിവച്ചു കൊലപ്പെടുത്തിയെന്നും ഹര്‍ജിത് മാസി പറഞ്ഞു.
കഴിഞ്ഞ വര്‍ഷം ജൂണില്‍ ഭീകരരുടെ പിടിയില്‍ നിന്നും രക്ഷപ്പെട്ടെത്തിയ ഭീകരര്‍ തങ്ങളെ തട്ടിക്കൊണ്ടു പോകുകയായിരുന്നുവെന്നും തങ്ങളുടെ സംഘത്തില്‍ നാല്‍പത് ഇന്ത്യക്കാരും അന്‍പത് ബംഗ്‌ളാദേശികളും ഉണ്ടായിരുന്നുവെന്നും ഹര്‍ജിത് പറഞ്ഞു. പാസ്‌പോര്‍ട്ട് മടക്കിത്തരുമെന്നും എല്ലാവരെയും ഇന്ത്യയിലേക്ക് കയറ്റിവിടാമെന്നും ഭീകരര്‍ പറഞ്ഞു.
എന്നാല്‍ തുടര്‍ന്ന് അവര്‍ മറ്റൊരു സംഘത്തിന് തങ്ങളെ കൈമാറി. അവര്‍ തങ്ങളെ മറ്റൊരു സ്ഥലത്തേയ്ക്ക് കൊണ്ടു പോയി ഒരു മുറിയിലാക്കിയ ശേഷം തങ്ങള്‍ക്കു നേരെ തുരുതുരേ വെടിയുതിര്‍ക്കുകയായിരുന്നു. മറ്റൊല്ലാവരും വെടിയേറ്റു വീഴുമ്പോള്‍ താന്‍ നിലത്ത് ഏറെ നേരെ അനങ്ങാത കിടക്കുകയും പിന്നീട് രക്ഷപ്പെടുകയായിരുന്നുവെന്നും ഹര്‍ജിത് മാസി പറയുന്നു. അതേസമയം, ഹര്‍ജിത്തിന്റെ വാദം കേന്ദ്ര വിദേശകാര്യമന്ത്രി സുഷമാ സ്വരാജ് തള്ളി. ബന്ദികളായ ഇന്ത്യക്കാര്‍ ജീവിച്ചിരിപ്പുണ്ടെന്നാണ് എട്ടോളം സ്രോതസ്സുകളില്‍ നിന്ന് തനിക്ക് അറിയാനായതെന്നും അവരെ കണ്ടെത്താനും തിരിച്ചെത്തിക്കാനും കഴിയുമെന്നാണ് വിശ്വസിക്കുന്നതെന്നും സുഷമ സ്വരാജ് പറഞ്ഞു. ഹര്‍ജിത്തിന്റെ വെളിപ്പെടുത്തലിനെക്കുറിച്ച് ചോദിച്ചപ്പോള്‍ അയാളെ വിശ്വസിക്കേണ്ട കാരണങ്ങളില്ലെന്നായിരുന്നു സുഷമയുടെ മറുപടി. അയാളെ വിശ്വസിക്കുകയാണെങ്കില്‍ ബന്ദികള്‍ക്കായുള്ള തിരച്ചില്‍ തങ്ങള്‍ അവസാനിപ്പിച്ചുവെന്നാണ് അര്‍ത്ഥം. പ്രതീക്ഷ നഷ്ടപ്പെട്ടിട്ടില്ലെന്നും തങ്ങള്‍ തെളിവ് തേടുകയാണെന്നും സുഷമ സൂചിപ്പിച്ചു.
കഴിഞ്ഞ വര്‍ഷം ജൂണ്‍ 11നാണ് വടക്കന്‍ ഇറാക്കിലെ മൊസൂളില്‍ നിന്ന് ഇന്ത്യക്കാരെ ഐസിസ് ഭീകരര്‍ ബന്ദിയാക്കിയത്. ഇന്ത്യയില്‍ തിരിച്ചെത്തിയ ഹര്‍ജിത് മാസിയെ സുരക്ഷാ ഉദ്യോഗസ്ഥര്‍ നിരീക്ഷണത്തിലാക്കിയിരിക്കുകയാണെന്ന് അയാളുടെ കുടുംബാഗംങ്ങള്‍ നേരത്തെ ആരോപിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha