കാബൂള് ആക്രമണത്തില് കൊല്ലപ്പെട്ടവരില് രണ്ടു മലയാളികള്
കാബൂളില് പാലസ് ഗസ്റ്റ്ഹൗസിനു നേരെയുണ്ടായ താലിബാന് ഭീകരാക്രമണത്തില് കൊല്ലപ്പെട്ടവരില് മലയാളികളായ കൊച്ചി കടവന്ത്ര സ്വദേശി മാത്യു ജോര്ജ്, കൊല്ലം സ്വദേശിയായ ഡല്ഹി മലയാളി മാര്ത്ത ഫാരെല് എന്നിവരും ഉള്പ്പെടുന്നു. സംഭവത്തില് നാല് ഇന്ത്യക്കാരുള്പ്പടെ 14 പേരാണ് കൊല്ലപ്പെട്ടത്. ഛണ്ഡിഗഡ് സ്വദേശി ആര്.കെ. ഭട്ടി, ആന്ധ്രാ സ്വദേശി സതീഷ് ചന്ദ്ര എന്നിവരാണ് കൊല്ലപ്പെട്ട മറ്റു ഇന്ത്യക്കാര്. കൊല്ലപ്പെട്ടവരില് അമേരിക്ക, ഇറ്റലി, കസഖ്സ്ഥാന് എന്നീ രാജ്യങ്ങളിലെ പൗരന്മാരുമുണ്ട്.
മധ്യകാബൂളിലെ സമ്പന്നര് താമസിക്കുന്ന കലോല പുസ്ത മേഖലയിലെ അഫ്ഗാന് ആഭ്യന്തരമന്ത്രാലയത്തിനു സമീപമുള്ള പാര്ക്ക് പാലസ് അതിഥിമന്ദിരത്തില് ഡിന്നറിനെത്തിയവരാണു കൊല്ലപ്പെട്ടത്. കാബൂളിലെ ഇന്ത്യന് അംബാസഡര് അമര് സിന്ഹയെയാണു താലിബാന് ലക്ഷ്യമിട്ടതെന്നു കരുതുന്നു.
അഫ്ഗാന് സര്ക്കാരിന്റെ വിദേശ ഫണ്ട് വിനിയോഗവുമായി ബന്ധപ്പെട്ട ഇന്റേണല് ഓഡിറ്റിങ്ങിനായി നാലുവര്ഷം മുന്പാണു മാത്യു കാബൂളിലേക്കു പോയത്. ഡല്ഹിയില് മാത്യു ജോലി ചെയ്തിരുന്ന ചാര്ട്ടേഡ് അക്കൗണ്ട് സ്ഥാപനം കാബൂളിലെ ജോലിക്കു നിയോഗിക്കുകയായിരുന്നു.
ബുധനാഴ്ച രാത്രിയും മകന് ദീപുവുമായി ഫോണില് സംസാരിച്ച മാത്യു ജോര്ജ് പുറത്ത് എന്തോ ആക്രമണം നടക്കുന്നതായും എന്നാല് താന് മുറിയില് സുരക്ഷിതനാണെന്നും പറഞ്ഞിരുന്നു. പിന്നീടു ബന്ധപ്പെടാന് ശ്രമിച്ചപ്പോള് മറുപടിയുണ്ടായില്ല. വ്യാഴാഴ്ച രാവിലെ എംബസിയില്നിന്നു മരണം സ്ഥിരീകരിച്ചു വീട്ടില് അറിയിപ്പു ലഭിച്ചു.ദീര്ഘകാലം അപ്പോളോ ടയേഴ്സ് ചീഫ് ഫിനാന്സ് മാനേജരായിരുന്നു മാത്യു ജോര്ജ്. കഴിഞ്ഞ ഡിസംബറില് നാട്ടിലെത്തി മടങ്ങിയതായിരുന്നു.
കൊല്ലം സ്വദേശിയായ മാര്ത്ത ഫാരെല് പാര്ട്ടിസിപ്പേറ്ററി റിസര്ച്ച് ഇന് ഏഷ്യ (പിആര്ഐഎ) എന്ന സന്നദ്ധസംഘടനയുടെ ഡയറക്ടറാണ്. ആഗാഖാന് ട്രസ്റ്റ് നടത്തിയ പരിപാടിയില് റിസോഴ്സ് ട്രെയിനറായി പോയതായിരുന്നു മാര്ത്ത. ശനിയാഴ്ച ഇന്ത്യയിലേക്ക് മടങ്ങാനിരിക്കുകയായിരുന്നു ഇവര്.
ഡിന്നറും സംഗീതവിരുന്നും നടന്ന അതിഥിമന്ദിരത്തില് നുഴഞ്ഞുകയറിയ അക്രമികള് എകെ 47 തോക്കുപയോഗിച്ചു വിദേശികളെ വകവരുത്തുകയായിരുന്നു. ബുധനാഴ്ച രാത്രി ഒന്പതുമണിയോടെയാണു വെടിവയ്പുണ്ടായത്. അഞ്ചുമണിക്കൂര് സുരക്ഷാസേനയുമായുള്ള ഏറ്റുമുട്ടല് തുടര്ന്നു. അതിഥിമന്ദിരത്തില് കുടുങ്ങിയ അന്പതോളം പേരെ സേന രക്ഷപ്പെടുത്തി. സംഭവത്തെ പ്രധാനമന്ത്രി നരേന്ദ്ര മോദി അപലപിച്ചു.
https://www.facebook.com/Malayalivartha
