കാബൂളില്‍ ഗസ്റ്റ്ഹൗസിനു നേരെയുണ്ടായ ഭീകരാക്രമണത്തില്‍ മരിച്ച ഇന്ത്യാക്കാരില്‍ ഒരു മലയാളി കൂടി. കൊല്ലം സ്വദേശിയായ ഡല്‍ഹി മലയാളി മാര്‍ത്ത ഫാരെല്‍ കൊല്ലപ്പെട്ട വിവരമാണ് ഏറ്റവും പുതിയതായി പുറത്ത് വന്നിരിക്കുന്നത്. കടവന്ത്ര സ്വദേശി മാത്യു ജോര്‍ജ് മരിച്ച വിവരം പുറത്ത് വന്നതിന് പിന്നാലെയാണ് മാര്‍ത്തയും മരണമടഞ്ഞതായി സ്ഥിരീകരിക്കപ്പെട്ടിരിക്കുന്നത്.
പാര്‍ട്ടിസിപ്പേറ്ററി റിസര്‍ച്ച് ഇന്‍ ഏഷ്യ (പിആര്‍ഐഎ) എന്ന സന്നദ്ധസംഘടനയുടെ ഡയറക്ടറായ മാര്‍ത്ത ഫാരെല്‍ അഫ്ഗാനിസ്ഥാനിലേക്ക് പോയത് ആഗാഖാന്‍ ട്രസ്റ്റ് നടത്തിയ പരിപാടിയില്‍ പങ്കെടുക്കാനായിരുന്നു. ശനിയാഴ്ച ഇന്ത്യയിലേക്ക് മടങ്ങാനിരിക്കേ ആയിരുന്ന ആക്രമണം നടന്നത്. 14 പേര്‍ കൊല്ലപ്പെട്ട സംഭവത്തില്‍ നാല് ഇന്ത്യക്കാര്‍ ഉണ്ടെന്നാണ് വിവരം. ഛണ്ഡിഗഡ് സ്വദേശി ആര്‍.കെ. ഭട്ടി, ആന്ധ്രാ സ്വദേശി സതീഷ് ചന്ദ്ര എന്നിവരാണ് മറ്റുള്ളവര്‍.
മധ്യകാബൂളിലെ കലോല പുസ്ത മേഖലയിലെ പാര്‍ക്ക് ഗസ്റ്റ് ഹൗസില്‍ ബുധനാഴ്ച രാത്രി ഒന്‍പതുമണിയോടെയാണ് അക്രമികള്‍ നുഴഞ്ഞുകയറിയത്. അത്താഴവിരുന്നും സംഗീതപരിപാടിയും ആസ്വദിക്കുകയായിരുന്ന അതിഥികള്‍ക്ക് നേരെ വെടിയുതിര്‍ക്കുകയായിരുന്നു. അമേരിക്ക, ഇറ്റലി, കസഖ്സ്ഥാന്‍ എന്നീ രാജ്യങ്ങളിലെ പൗരന്‍മാരും കൊല്ലപ്പെട്ടവരില്‍പ്പെടുന്നു. കാബൂളിലെ ഇന്ത്യന്‍ അംബാസഡര്‍ അമര്‍ സിന്‍ഹയെയാണു താലിബാന്‍ ലക്ഷ്യമിട്ടതെന്നു റിപ്പോര്‍ട്ടുകളുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha