കേരളത്തിലെത്താന്‍ സുപ്രീംകോടതിയില്‍ നിന്നും അനുമതി ലഭിച്ച അബ്ദുള്‍ നാസര്‍ മഅദ്‌നി നാട്ടിലെത്തുന്നത്് വൈകും. കോടതി ഉത്തരവിന്റെ പകര്‍പ്പ് ലഭിക്കാന്‍ വൈകുന്നതാണു കാരണം. നടപടിക്രമങ്ങള്‍ പൂര്‍ത്തിയാക്കി തിങ്കളാഴ്ചയോടെ അദ്ദേഹം കേരളത്തിലെത്തിയേക്കുമെന്നാണു സൂചന. നാട്ടിലെത്തി അമ്മയെ കാണാന്‍ വെള്ളിയാഴ്ചയാണു സുപ്രീംകോടതി മഅദനിക്ക് അനുവാദം നല്‍കിയത്. അഞ്ചുദിവസമാണ് അദ്ദേഹത്തിനു കേരളത്തില്‍ താമസിക്കാന്‍ കഴിയുക. ജാമ്യ കാലാവധി നീട്ടണമെന്നും ജാമ്യവ്യവസ്ഥയില്‍ ഇളവു വേണമെന്നും ആവശ്യപ്പെട്ടായിരുന്നു മദനി സുപ്രീംകോടതിയെ സമീപിച്ചത്.
കേസിന്റെ വിചാരണ പൂര്‍ത്തയാകാന്‍ രണ്ടു വര്‍ഷം വേണമെന്നു കേസ് പരിഗണിക്കുന്ന കോടതി സുപ്രീംകോടതിയെ അറിയിച്ചിരുന്നു. നിലവില്‍ കേസ് പരിഗണിച്ച കോടതിയില്‍ നിന്നും പുതിയ കോടതിയിലേയ്ക്കു എന്തിനു കേസിന്റെ വിചാരണ മാറ്റിയെന്നു കോടതി കര്‍ണാടക സര്‍ക്കാരിനോടു ചോദിച്ചു. ഇക്കാര്യത്തില്‍ ഉടന്‍ വിശദീകരണം നല്‍കണമെന്നും കോടതി ആവശ്യപ്പെട്ടു. വിചാരണ നീളുന്നതിന്റെ കാരണം അറിയിക്കണമെന്നും കോടതി പറഞ്ഞു. നാലു മാസത്തിനകം വിചാരണ പൂര്‍ത്തിയാകുമെന്നായിരുന്നു കഴിഞ്ഞ ഡിസംബറില്‍ കര്‍ണാടക സര്‍ക്കാര്‍ സുപ്രീംകോടതിയെ അറിയിച്ചിരുന്നത്. എന്നാല്‍ രണ്ട് വര്‍ഷം വേണ്ടിവരുമെന്ന പുതിയ വാദത്തേയും കോടതി ചോദ്യം ചെയ്തു.
വിചാരണ അനന്തമായി നീണ്ടു പോകുന്നതും ആരോഗ്യപ്രശ്‌നങ്ങളുമാണ് മദനിയുടെ അഭിഭാഷകന്‍ പ്രധാനമായും കോടതിയില്‍ ചൂണ്ടിക്കാണിച്ചത്. ഇക്കാര്യങ്ങള്‍ പരിഗണിച്ചാണു ജാമ്യവ്യവസ്ഥയില്‍ ഇളവനുവദിക്കാന്‍ കോടതി തീരുമാനിച്ചത്. ബംഗളുരു സ്‌ഫോടനക്കേസുമായി ബന്ധപ്പെട്ടാണു മദനിയെ കര്‍ണാടക പോലീസ് അറസ്റ്റ് ചെയ്തത്. ഈ കേസില്‍ ലഭിച്ച ജാമ്യത്തിന്റെ കാലാവധി അവസാനിച്ചതിനെ തുടര്‍ന്നാണു മദനി വീണ്ടും കോടതിയെ സമീപിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha