ഇന്ത്യന്‍ പ്രധാനമന്ത്രി നരേന്ദ്ര മോഡിയ്‌ക്കെതിരെ രൂക്ഷ വിമര്‍ശനം പറയുന്ന എതിരാളികള്‍ക്ക് പ്രത്യേകിച്ചും രാഹുല്‍ ഗാന്ധിക്ക് മറുപടിയുമായി മോഡി രംഗത്ത്. ബയോഡാറ്റ നോക്കിയല്ല തന്നെ പ്രധാനമന്ത്രിയാക്കിയത്. ഇതിന് പിന്നില്‍ കഠിന പരിശ്രമമുണ്ട്. ജനങ്ങളുടെ വിജയമാണ് പ്രധാനമന്ത്രി പദവിയിലെത്താന്‍ കാരണമായതെന്ന് മോഡി പറഞ്ഞു. ഇന്ത്യയിലെ ഓരോ ജനങ്ങളോടും നന്ദി പറയുന്നുവെന്നും മോഡി പറഞ്ഞു. ഷാങ്ഹായില്‍ ഇന്ത്യന്‍ സമൂഹത്തെ അഭിസംബോധന ചെയ്തു കൊണ്ട് സംസാരിക്കുകയായിരുന്നു അദ്ദേഹം. പ്രധാനമന്ത്രിയുടെ ചൈനയിലെ അവസാനത്തെ പരിപാടിയായിരുന്നു ഇത്. 

2014ലെ ലോക്‌സഭാ തിരഞ്ഞെടുപ്പില്‍ ചരിത്ര വിജയം സ്വന്തമാക്കിയതിന്റെ ഒന്നാം വാര്‍ഷിക ദിനത്തിലായിരുന്നു മോദിയുടെ ഷാങ്ഹായ് പ്രസംഗം. മുന്‍ യുപിഎ സര്‍ക്കാറിനെ വിമര്‍ശിച്ചുകൊണ്ടു കൂടിയാണ് മോദി തന്റെ പ്രസംഗം അവസാനിപ്പിച്ചത്. പാവപ്പെട്ട ഒരു അമ്മയുടെ ചായവില്‍പ്പനക്കാരനായ മകനാണ് ഞാന്‍. എന്നെ പ്രധാനമന്ത്രി പദവിയില്‍ എത്തിച്ചതില്‍ ഇന്ത്യയിലെ സാധാരണക്കാരായ ജനങ്ങളുടെ ജയമാണ് കണ്ടതെന്നും മോഡി പറഞ്ഞു.
53 മിനുറ്റു നീണ്ടു നിന്ന പ്രസംഗത്തില്‍ മോദി സദസ്സിനെയും കൈയിലെടുത്തു. മിനി ഇന്ത്യയെന്നാണ് മോദി സദസിനെ അഭിസംബോധന ചെയ്തത്. എനിക്ക് വിശ്വസിക്കാന്‍ സാധിക്കുന്നില്ല. ഒരു വര്‍ഷത്തിനു ശേഷം ഇന്ത്യയില്‍ നിന്നു ദൂരെ മറ്റൊരു മിനി ഇന്ത്യയില്‍ നില്‍ക്കാന്‍ സാധിക്കുമെന്ന്. നിങ്ങളുടെ അനുഗ്രഹം തുടര്‍ന്നും എനിക്ക് വേണം. നിറഞ്ഞ കയ്യടികളോടെയാണ് മോദിയുടെ വാക്കുകളെ സ്വീകരിച്ചത്.

അമേരിക്കയിലേയും ജര്‍മ്മനിയിലേയും ഓസ്‌ട്രേലിയയിലെയും സന്ദര്‍ശനത്തിന് സമാനമായിട്ടായിരുന്നും മോദിക്ക് വേണ്ടി ചൈനയിലും സദസ് ഒരുക്കിയത്. ആയിരങ്ങള്‍ തിങ്ങിക്കൂടിയ ചടങ്ങില്‍ മോദിയുടെ ഒരോ വാക്കുകളേയും കൈയടിയോടെയും ആര്‍പ്പുവിളികളോടെയുമാണ് സദസ് നെഞ്ചേറ്റിയത്. 
ഇന്ത്യയുടെ ഭാവി അവതാളത്തിലാണെന്നും ഗുജറാത്തിന് പുറത്തുള്ള കാര്യങ്ങള്‍ തനിക്ക് അറിയില്ലെന്നും പറഞ്ഞാണ് എതിരാളികള്‍ തന്നെ ആക്രമിക്കുന്നതെന്നും മോഡി പറഞ്ഞു. ഞാന്‍ കഠിനാധ്വാനം ചെയ്യുന്നതിന് ഒരു കുറവും വരുത്തിയിട്ടില്ല. ഒരു ദിവസം പോലും ലീവെടുക്കാതെയാണ് ജീവിക്കുന്നത്. അവധിയോ വിശ്രമമോ ഇല്ലാതെയാണ് രാജ്യത്തിനു വേണ്ടി പ്രവര്‍ത്തിക്കുന്ന വ്യക്തിയാണ് താനെന്നും മോഡി കൂട്ടിച്ചേര്‍ത്തു.

നേരത്തെ ചൈനയിലെ ബിസിനസ് മേധാവികളുടെ യോഗത്തില്‍ പ്രസംഗിച്ച മോദി ഇന്ത്യയും ചൈനയും തമ്മിലുള്ള ചരിത്രബന്ധം ഏറ്റുപറഞ്ഞു. ലോകത്ത് ഏറ്റവും പഴക്കമുള്ള രണ്ട് സംസ്‌കാരങ്ങളാണ് ഭാരതവും ചൈനയുമെന്നും അദ്ദേഹം പറഞ്ഞു. 
ഇന്ത്യയിലെ ചൈനീസ് നിക്ഷേപങ്ങള്‍ക്ക് വ്യക്തിപരമായി ശ്രദ്ധ നല്‍കുമെന്നു ചൈനീസ് കമ്പനികളുടെ സിഇഒ മാരുമായി നടത്തിയ കൂടിക്കാഴ്ച്ചയില്‍ മോദി പറഞ്ഞു. 2200 കോടി ഡോളറിന്റെ 21 വ്യാപാര കരാറുകളില്‍ ഇന്ത്യന്‍, ചൈനീസ് കമ്പനികള്‍ ധാരണാപത്രം ഒപ്പിട്ടു.

മൂന്നു ദിവസത്തെ ചൈന സന്ദര്‍ശനത്തിന്റെ അവസാന ദിനം മെയ്ക്ക് ഇന്‍ ഇന്ത്യ പദ്ധതിക്കാണ് നരേന്ദ്ര മോദി ഊന്നല്‍ നല്‍കിയത്. ഇന്ത്യയിലെ വ്യവസായ പ്രമുഖരും മോദിക്കൊപ്പം പങ്കെടുത്തു. 2200 കോടി ഡോളറിന്റെ 21 വ്യപാര കരാറുകളില്‍ ഇന്ത്യന്‍ കമ്പനികളും ചൈനീസ് കമ്പനികളും തമ്മില്‍ ധാരണയായി.

മോശം കാലാവസ്ഥയില്‍ വിളനാശം സംഭവിച്ച കര്‍ഷകരുടെ പ്രശ്‌നങ്ങള്‍ ശരിക്കും മനസിലാക്കാതെ വിദേശപര്യടനത്തില്‍ മുഴുകുന്ന പ്രധാന മന്ത്രി മോദിക്കാണ് \'അച്ഛേ ദിന്‍\' വന്നതെന്നും, രാജ്യത്തെ ജനങ്ങള്‍ കഷ്ടപ്പാടിലാണെന്നും രാഹുല്‍ ഗാന്ധി മോഡിക്കെതിരെ തുറന്ന് പറഞ്ഞിരുന്നു. തെലങ്കാനയില്‍ കോണ്‍ഗ്രസ് പാര്‍ട്ടി നടത്തുന്ന പതിനഞ്ച് കിലോമീറ്റര്‍ സഞ്ചരിക്കുന്ന പദയാത്രയില്‍ പങ്കെടുത്ത് സംസാരിക്കവേയാണ് രാഹുല്‍ മോദിയെ കടന്നാക്രമിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha